Tumutumbishany Yehova nich midimu yiwamp

¹ Anch rinkind umwing mukash watut, chidi chom chiwamp mud ik kuman ndond ya kwikangin! Anch yidi ndond yimwing ya chirungil ni ya diking ni anch antu ashichamu adi antu in kwakan, ukusangar kushakamamu. Mudimu wa Want wa kulejan uyitwadil antu kwi ndond mud yiney ya kwikangin ku ditenchik dia Satan. Ov ngikadil yetu ya dichuku ni dichuku yikutwish kuyikwash akwau kuman mutapu ndond yiney yidia ya kwikangin? Mwawiy, mulong Yesu walonda anch antu ‘akuman midimu yetu yiwamp ni kumutumbish Tatukwetu udia mwiur.’​—⁠Mat. 5:⁠16.

² Ov mutapu ik tukutwisha kushakam chakwel anch midimu yetu yiyipwitina antu akwau kud Yehova ni ku dirijek diend? Anch twalik mazu ma Yesu madia mu Luka 6:31 ni 10:27 makarumuna mwom wetu dichuku ni dichuku. Chinech chikutubachik kumekesh rukat rifanyidina mulong wa akwetu antu, chikutwikadish ashalijadina ni mangand minam makad rukat ni makad kutongin akwau.

³ Nambaz umwing wadinga mu weny mu wat pa karung wamana mband umwing wadinga ni rinzung (rinzwizu) mulong wa mem ni katwishap kusend mwanend mukemp. Nambaz wamukwasha kumulamin mwan. Mband winou pamwipulay mutapu ukutwishay kumekesh kujikitish kwend, nambaz walonda anch: ‘Yitesha amboku Atuman’a Yehova anch ez ni kukwendil.’ Mwamu mwasalay mband winou, ni katat ndiy ni nfumwend ikadil kal Atuman. Midimu yiwamp yiney yayikwasha kutambul uruu wa Want.

⁴ Mwom wetu wawonsu aukasidinaku: Ngikadil yetu nau antu tushicha nau (amutej), pitudia ku mudimu ap ku shikol, ni pa chisu cha kwiswedish yikat kuyinkishang antu akwau chitongijok kanang piur petu ni piur pa relijon wetu. Chawiy lel, tuwapidil kwiyipul ayinetu anch: ‘Ov mutapu ik winmenau am ni dijuku diam kud antu? Ov antu tushicha nau amening chikumbu chetu ni dibur (rupang) dietu yinangina ni yirijekinau nawamp? Ov arund netu a mudimu ni a shikol atumen mud antu akata kulimish chisu ni akweta mushiku? Ov akwau amen mutapu wetu wa kwileng mud wa kwikepish ni wa kalimish?’ Midimu yetu yiwamp yikutwish kwikadish difukwil dia Yehova chom chimwing cha kusanger nakash kud akwau.

⁵ Pita wayibabesha in Kristu anch akez kuyisupish. (1 Pit. 4:⁠4) Tufanyidin kutal nawamp anch ngikadil yetu kangal yikal musul wa kutulondil nayimp. (1 Pit. 2:12) Anch midimu yetu ya dichuku ni dichuku yikat kumutumbish Nzamb utukata kwifukwil, chawiy lel, tukez kwikal mud yimunyik yitekinau pa ndond ya piur, yiyipwitidina antu akwau kwi ndond ya kwikangin yirijekinay Yehova.​—⁠Mat. 5:​14-16.