Uman Wakad Mazu
1 Wakad kulond dizu, yitang yimekena ya Yehova yilejen jinsangu jivud piur pa ngikadil yend yakad kumekan. (Kus. 19:1-3; Ro. 1:20) Chawiy chimwing kand, chaku chetu chiwamp, ngikadil ya Ukristu, ni mutapu wa kudjal kwa kwikepish yipanin uman wakad mazu. (1 Pi. 2:12; 3:1-4) Rufanyidin kwikal rusot ra umwing ni umwing wetu “chakwel alimish dilejan dia Nzamb, Mupandish wetu, mu yom yawonsu” ku mutapu tukata kwiyendish ayinetu.—Titus 2:10.
2 Mutapu ik chitwishikina kud antu akad kuwanyin kuwej kuwap ku mafundish ma Bibil? Chinech chitwishikin kusu kusutil ku umutakel wa Dizu dia Nzamb ni ku dikand dia spiritu utumbila. (Kus. 119:105; 143:10) Dizu dia Nzamb “didi diom, ni usu, ni kutwa kupandiken mpak ya musamun yitwila mitambu yaad.” (Heb. 4:12) Dikat kwandam kamu nakash mud etu ni kutukwash kumudjal muntu musu. (Kol. 3:9, 10) Spiritu utumbila ukat kusongish mu etu ngikadil yisangarishina, mud kudimuk, kuwap, kwitudish, ni kwilam. (Gal. 5:22, 23) Ov, tukat kushil muntu ni muntu ipend dizu dia Nzamb ni spiritu wend chakwel yikala ni usu mu mwom wetu?—Efe. 4:30; 1 Tes. 2:13.
3 Antu Akwau Amening: Pitushicha kwambatan nich yijil ya Yehova ni kwikasikesh kumekesh ngikadil yend, antu akwau amening. Mud chilakej, shinshikin, ikundj umwing wadingau ni kuswingish kud ambay nend a mudimu mulong wading mwiswimp. Nambaz umwing wadingay ni kusal nend mu biro umwing chisu chawonsu wadinga umukwatin nich usey ni kalimish. Chinech chamubachika kumwipul nambaz mulong wak wadingay ushalijadin nakash ni akwau. Ndiy wamurumburila anch chaku chend cha kalimish chadinga chibudikin cha kusadil yijidik ya Bibil mu mwom wend. Ndiy wamuleja kand ruchingej ripandakena kuwap ra Want. Ikundj winou wasambisha kwilej Bibil ni waya kamu kurutu djat ku dibabatish. Chisu chachirikay kwolikwau, anamakwend ashimoka nakash mulong wa chaku chend chiwamp, ni avud pakach pau niyawiy itiyija uyakin.
4 Ku mudimu, ku shikol, ap mu kushakam nau anamakwetu ni amutej netu, tukutwish kusutil ku chaku chetu chiwamp, pamwing nich uman wetu, kuyibachik antu akwau kumutumbish Nzamb.—Mat. 5:16.