Tusambishany Malejan ma Bibil ku Chis ni Kusutil ku Telefon
1, 2. Mutapu ik tukutwisha kwambatanish program wetu wa dilejan dia Bibil mulong wa kuyikwash antu akwatikena nich yivud ya kusal?
1 Nlel antu akwet yivud ya kusal. Pakwez, avud akat kusanger yom ya muspiritu. Mutapu ik tukutwisha kuyikwash kuwanyish maswir mau ma muspiritu? (Mat. 5:3) In kulejan avud atwishin kwilej Bibil nau antu ku chis chau ap kusutil ku telefon. Ov, ukutwish kutanduril mudimu wey mu mutapu winou?
2 Chakwel kusambish malejan ma Bibil, tufanyidin kwirijek chakwel kusambish dilejan dia Bibil kwawonsu kumekena mutapu wa kuchisal. Mutapu ik ni ndond ik chikutwisha kusadikin?
3. Mulong wak kusambish dilejan pa mambamb ma kusambish, ni mutapu ik chikutwisha kusadik?
3 Ku Chis: Chisu ukusankana muntu usotila kwisamb piur pa Bibil, buril pa paragraf warijekang kurutu kwa muten, mud paragraf wa kusambish wa difundish dia 1 mu broshir Nzamb Witin, ni kusambish. Tang paragraf, shinshikin chipul, ni kwisambin verse umwing ap maad majimbwilau. Chisu chivud chinech chikutwish kusadik kamu kapamp kamwing ku chis mu aminit atan kushik ku dikum. Anch muntu wasanger minsamb, tenchikany chakwel kwez kushinshikin paragraf ulondwikaku ap mapagraf maad pa chisu chikwau.—Yiyul yikwau piur pa mutapu wa kusambish kapamp kamwing malejan yidi mu Mudimu Wetu wa Want wa Chiwong 2002, p. 6.
4. Mutapu ik tukutwisha kusambish dilejan dia Bibil ku chis chisu tusadila kuchirikinamu kusu?
4 Ukutwish kusal chilik chimwing chakwel kusambish malejan ma Bibil chisu usadila kuchirikinamu kusu. Chilakej, ukutwish kusambish kwisambin broshir Nzamb Witin ni kulejan dijin dia Nzamb, nich kusadil difundish dia 2, paragraf wa 1-2. Pa kuchirikinamu kukwau, ukutwish kwisambin yilejenay Bibil piur pa ngikadil ya Yehova, nich kusadil paragraf wa 3-4. Piur pa minsamb yikulondula, ukwisambinany paragraf wa 5-6 ni chipich chidia pa paj wa 5 chakwel kukasikeshin mutapu utukwashina dilejan dia Bibil kumwijik Yehova. Yawonsu yiney yikutwish kusadikin ku chis.
5, 6. (a) Mulong wak antu amwing asotiling kwilej Bibil kusutil ku telefon? (b) Mazu ik tukutwisha kusadil chisu tumwitina muntu kwilej kusutil ku telefon?
5 Kusutil ku Telefon: Antu amwing akutwish kusot kamu kwilej Bibil kusutil ku telefon pa ndond pa kwilej kwa kumanijan mpal ni mpal. Shinshikin rusangu rilondwila er: Padingay ni kulejan ku chikumbu ni chikumbu, nambaz umwing wamusankana mband changadim udia maku ni ukweta midimu yivud ya kusal. Pichamukasikena nambaz kumanijan kand nend ku chikumbu, ndiy wakwata mupak wa kumutazuk ku telefon. Mband changadim winou wamurumburila anch kadingap chakin ni chisu cha kwisambin Bibil. Nambaz walonda anch: “Mu aminit 10 ap 15, ukutwish kwilej chom chimwing chisu, ap ku telefon.” Mband wamwakula anch: “Chiwamp, anch lel kwilejin ku telefon, nitiy kal!” Kupwa kwa machuku makemp, asambisha kwilejin ku telefon.
6 Ov, amwing pakach pa antu ukata kwendin akusot kwilej Bibil kusutil ku telefon? Ukutwish kupakish mutapu warumburilau kal ou, ap ukutwish kusu kulond anch: “Anch usotil, tukutwish kwisambin Bibil kusutil ku telefon. Ov, chinech chikukusangaresh?” Anch twambatanish program wetu wa dilejan dia Bibil nich mikadil ya antu akwau, tukutwish kuyikwash “kutan ronganyin ra Nzamb.”—Jnsw. 2:5; 1 Kor. 9:23.