Kangal Widjidjek Kulejan!
1 Pitukata kwirijek mulong wa kuya ni kulejan ku chis ni chis, chikangesh chijim tukata kutan chikutwish kwikal ayinetu. Yitongijok ya kuburen kufanyin yikutwish kutwikadish in kwidjidjek chakwel kuya ni kulejan uyakin kud ‘antu a mitapu awonsu.’ (1Tim. 2:4) Pakwez tufanyidinap kutong anch tukutwishap kulejan rusangu ruwamp. Ov mulong wak?
2 Udi Uruu wa Yehova: Yehova ulejen dizu diend kusutil ku Baibel. Pitukata kuyitwadil antu akwau uruu winou, tukat kulejanang yitongijok yend, yidiap yitongijok yetu bwat. (Rom 10:13-15) Chisu chikatau antu kulik kutesh uruu wa Want, akat chakin kamu kumulikang Yehova. Ap mwamu, tukatap kuziy. Tukwet ruchingej anch uruu winou ukez kushik ku michim ya antu asotina kukarumuk ku mikadil ya mangand ni ajingunina maswir mau ma muspiritu.—Ezek. 9:4, New World Translation; Mat. 5:3, 6.
3 Yehova Ukat Kuyipwit Antu: Muntu walika kututesh machuku ma kwinyim ukutwish kututesh katat mulong mikadil yend yakarumukin ni ngikadil ya muchim wend yadutin kal. Katat Yehova ukutwish kumekesh rusot rend ruwamp pantaliken ni muntu mwinou ni ‘kumupwitin kud ndiy.’ (Yohan 6:44, 65) Anch chinech chashiken, tusotil kwikal tayad chakwel atusadila kud Yehova ni kututakel kud mwangel mu kutan antu mud inay.—Kuj. 14:6.
4 Nzamb Utwinkin Spiritu Wend: Spiritu utumbila ukat kutukwash kulond ‘patok wakad wom nich usu wa Yehova.’ (Midimu 14:1-3) Chitwija anch tukwet ulabu winou wa ukwash mu mudimu wetu, kitukezap kwidjidjek kulond uyakin kud amutej netu, ambayetu a mudimu, ambayetu a shikol, anamakwetu, ap kud antu ilejina nakash ap ampich.
5 Yesu Watufundisha Mutapu wa Kusal: Yesu wasadila yipul ya kwijik yitonginay muntu, wasadila yilikej ya kashinsh ni yiswapela kutesh, ni kutongin piur pa Mifund. Ndiy warumburila uyakin mu mulad umwing uswapela, usangareshina, ni udiokila ku muchim wend. Yiney yichidi kand milad yiwamp ni nlel muten. (1 Kor. 4:17) Mikadil mutukata kulejan yikutwish kushalijan, pakwez usu wa uruu wa Want ukatap kukarumuk bwat.
6 Twitapidil dilau dia kwikal asadidilau kud Yehova mulong wa kuyikwash antu mu mulad umwing wa pakampwil ni mwi njil ya mwom. Kangal twidjidjek amboku! Tujijamanany ni kumulikil Yehova “chakwel atwinkisha chisu chiwamp” chakwel tutwisha kulejan rusangu ruwamp kud antu akwau.—Kol. 4:2-4.