“Ov Kwisu Nikutwisha Kutan Chisu?”
1 Kwinoku kudi kudilol kwa antu avud pakach petu, mulong mwom wetu wizwil too nich mijikit. Achilonda kal anch chisu chidi cha usey nakash ni chidi chikemp nakash mulong wa ukwash wetu. Chawiy lel kwisu tukutwisha kutan chisu chakwel kusal yom yidia chakin ya usey ukash, mud kutang ni kwilej Dizu dia Nzamb?— Filp. 1:10
2 Cha usey, chidiap kusot kwikal nich chisu chijim, pakwez kukwat chiyul cha chom tusotina kusal mu chisu chin tukweta. Tukwet etu awonsu pa rubing asaa 168, asaa akwau 100 tukat kuyisutish mu kulal ni kusal mudimu. Chawiy lel mutapu ik tukutwisha kusadil asaa ashadilaku mu mutapu umwing uwamp? Efes 5:15-17 utukasikeshin kwend ‘kangal mud ayisup pakwez mud antu ababela, lamany chisu cha muten . . . , ijikany mud mudia rusot ra Yehova.’ Chinech chimekeshin kuswir kwa kusadil sens yisu yawonsu yimekena chakwel kusal yom yilondilay Yehova anch yawiy yidia ya usey.
3 Yesu wilikeja chirung chetu nich machuku ma Nowa. (Luka 17:26, 27) Antu ading akwatiken nich milong yivud ya mwom wa dichuku ni dichuku. Pakwez, Nowa watana chisu cha kutung waat ujim nakash ni kulejan. (Heb. 11:7; 2Pita 2:5) Ov mutapu ik watwishay kutan chisu chinech? Nich kutek rusot ra Nzamb pa ndond ya kusambish ni kumuziyil kusal yom ‘mud mwamulejau.’—Dis. 6:22.
4 Ov Chom ik Chifanyidina Kwikal pa Ndond ya Kusambish? Yesu walonda anch: “Muntu kakwikalap mwom ku mabot kusu, pakwez ching ku dizu diawonsu dikubudika mu kan mwa Yehova.” (Mat. 4:4, NW) Rubing ni rubing, tukat kutambul “yakudia [ya muspiritu] pa chisu chiwanyidina.” (Luka 12:42, NW) Chakwel kudia yakudia ya muspiritu nawamp ni kutaninamu ukwash wakin, chitufanyidin kwikal ni program wakad kujing wa kutang ni kwilej kwa muntu ipend. Nich kujikitish kwetu mulong wa yakudia ya muspiritu, tukatap kuyiman mud yakudia yifanyidina kudia maumau, mud mukutwishay muntu kudia yakudia ya ku mujimbu maumau. Pakwez, kujikitish kwetu kukutubachik kwitekin chisu cha kwilej ni kusanger yom ya muspiritu.
5 Kudia kuwamp kwa yakudia ya muspiritu kukutwish kututwal ku mwom wa chikupu. (Yohan 17:3) Kufanyidin kwikal pa ndond ya kusambish mu program wetu wa dichuku ni dichuku. Ov tukutwish kutan chisu chifanyidina cha kutang Baibel dichuku ni dichuku ni kwirijek mulong wa yikumangan ya Ukristu? Mwawiy, tukutwish. Kupwa kand, tukez kutambul “difut dijim” dimuchingedina muntu mwawonsu wija ni usadila rusot ra Nzamb.—Kus. 19:7-11