Etu Tukez Kwendin Mu Dijin Dia Yehova Nzamb Wetu

“Etu, ku mutambu wetu, tukez kwendin mu dijin dia Yehova Nzamb wetu chikupu ni chikupu.”—MIKE 4:5, NW.

1. Piur pa ngikadil, mwikadil wadinga nchik mu machuku ma Nowa, ni mutapu ik wadingay Nowa ushalijadina?

ENOK ndiy muntu wa kusambish wisambidinau mu Bibil anch wadinga ni kwend pamwing ni Nzamb. Wa kaad wadinga Nowa. Rusangu ritulejin anch: ‘Nowa wadinga muntu uwanyidina salal. Wayinga pakach pa akwau a pa chirung chend, ndiy wenda pamwing ni Nzamb wakin.’ (Disambishil 6:9) Pa chisu cha Nowa, antu avud apumbuka ku difukwil dishitwila. Mwikadil uyimp awikadisha kand uyimp nakash kudiau angel akad kushishaman inunga chakad kufanyin nau amband ni avala an atazukau anch Anefilim, “antu akash, in usu,” ap anch ‘amakundj in katumb,’ a pa machuku minima. Chidiap cha kushimok anch divu dizulijana too nich chisum! (Disambishil 6:2, 4, 11) Ap mwamu, Nowa wiyingisha amwinend ni wadinga “mulej wa kutentam.” (2 Pita 2:5) Pamulejau kud Nzamb kutung wat mulong wa kupandishinamu mwom, Nowa nich kuziyil “wasala mudi mwamulejinau yom yawonsu kudi Nzamb, ndiy wayisala.” (Disambishil 6:22) Chakin kamu, Nowa wenda pamwing ni Nzamb.

2, 3. Chilakej ik chiwamp chatushilay Nowa?

² Paul wamuteka Nowa pa dipang diend dia atuman ashishamena pafunday anch: “Ku ritiy kwawiy kwamubabeshilau Nowa kudi Nzamb ku yom yakad kal kumekan, ndiy warijeka wat chakwel apandishilimu dijuku diend; kwawiy kwafishilay nich mangand, ndiy wikala nswan wa kutentam kwalondula ritiy.” (Hebereu 11:7) Chidi chilakej chiwamp mud ik! Chadingay nich kashinsh anch mazu ma Yehova makuwanyin, Nowa wasadila chisu, usu, ni mapit chakwel kuwanyish mbil ya Nzamb. Chawiy chimwing, ilel unou antu avud akat kulik midimu ya ku mujimbu mu mangand minam ni akat kusadil chisu chau, usu wau, ni mapit mau mulong wa kuziyil kwi mbil ya Yehova. Ritiy rau ridi rijim nakash ni rikez kuyipandish ayinau pamwing ni antu akwau.—Luka 16:9; 1 Timote 4:16.

³ Kusadil ritiy kwafanyidina kamu kwikal kukash kudiay Nowa ni dijuku diend mud muchadinga kudiay Enok, ngakend a Nowa, twisambidina mu rusangu ratakedila. Pa chirung cha Nowa ni cha Enok, in kwifukwil akin adinga akemp nakash—antu chinan kusu amekana in kushishaman ni apanda ku Mabeb ma mem. Nowa walejana kutentam mu mangand mamwing ma chisum ni ma masandj. Chikwau kand, ndiy ni dijuku diend atunga wat ujim wa mabay mu kwirijek mulong wa mabeb ma pa mangand mawonsu, ap anch muntu ap umwing wadinga kand kal amanap mabeb ma mem mud minam. Chinech chadinga cha wingendj kud antu adinga ni kuyital.

4. Chilim ik cha antu a pa chirung cha Nowa chakasikeshinay Yesu?

⁴ Cha musangar, pisambinay Yesu ya machuku ma Nowa, kisambinap chisum, relijon wa makasu, ap masandj—ap anch yom yiney yadinga yiyimp nakash. Kurumbuk kwakasikeshinay Yesu kwadinga kulik kwa antu kutesh dibabesh diadingau ni kupan. Ndiy walonda anch awiy adinga “ni kudia ni kuna, ading ni kwatan ni kwachik, ni kushik pa dichuku diandamay Nowa mu wat.” Kudia, kuna, kwatan, kwachik, kupangish—ov, uyimp wading pisu? Adinga kwau ashich mu mwom “ufanyidina”! Pakwez mabeb mading mezin, ni Nowa wading ni kulejan kutentam. Mazu mend ni mwikadil wend yafanyidina kwikal dibabesh kud awiy. Pakwez, awiy “kijikap ni pimeza mabeb mayijiyish awonsu shutit.”—Mateu 24:38, 39.

5. Ngikadil ik yadinga yiswiridinay Nowa ni dijuku diend?

⁵ Mu kushinshikin yasuta pa muten winiwa, tumen manangu mu yasalay Nowa. Pakwez, mu machuku ma kurutu kwa Mabeb, chita kukankaman chakwel kwikal ushalijadina ni muntu win mwawonsu. Chamwita Nowa ni dijuku diend kwikal nich ritiy rikash chakwel kutung wat ujim ni kuwizwish nich umwing ni umwing wa annam kushalijan. Ov, amwing pakach pa antu inay akemp ashishamena asota yisu yimwing kwikal nich mwom “ufanyidina”? Ap anch adinga ni yitongijok yiney, awiy kaziyap mu kujijaman kwau. Kwinyim kwa mivu yivud—kupandakanamu yikutwishay muntu ap wisu pakach petu kujijaman mu ditenchik dined dia yom—ritiy ra Nowa ramushikija ku dipandish diend ku Mabeb. Pakwez, Yehova waleta dirumburish padiau antu adinga ni kushakam “muchifanyidina” mu mwom ni aburena kwau kwijik kurumburik kwa chirung chadingau ni kushakam.

Chisum Chiyikwatin Kand Antu

6. Mwikadil ik wadinga uchidandamedina kwinyim kwa Mabeb?

⁶ Kupwa kwa mem ma Mabeb kuum, antu ikala nich disambishil disu. Pakwez, antu ading achidi akad kuwanyin, ni “yitongijok ya muchim wa muntu” yadandamena kwikal ‘yiyimp kudiok kamu ku kukul kwend.’ (Disambishil 8:21) Chikwau kand, ap anch ayilembil katwishinap kand kwikarumun kwikal antu, awiy ading achisadil nich usu. Mangand ma antu akad Nzamb mamekesha swa anch madinga mu “chikas cha Satan” ni mud kamu ilel unou, in kwifukwil akin afanyidin kurish nich ‘kudimok kutenchikinay Djabul.’—1 Yohan 5:19; Efes 6:11, 12.

7. Mutapu ik wavulijana chisum mu mangand kupwa kwa Mabeb?

⁷ Kudiosh kamu pa chisu cha Nimerod, kupwa kwa Mabeb, divu dizula kand too nich yisal ya chisum ya muntu. Mud chibudikin cha kuvulijan kwa antu ni kuya kurutu kwa winchij, chisum chaya kal kurutu nakash mu kusut kwa chisu. Mu mivu ya kwisambishil, kwadinga mpak ya musamun ni murumb, ut wa nseu ni nseu, ni ditemb. Katat kwikadil kal ut wa ntot ni ditemb dia njit, kupwa kand ut wa mbaz ni mat makwau makash ma kwisambishil kwa chitot cha 20 cha mivu. Njit ja Mangand ja I jaleta mat masu makwatishena wom, mud kajil wa yikung wa njit, ditemb dia njit dikweta makar ma yikung, mashuw ma mem ma kwas nich njit, ni ut wa kutek ulemb mu rinkind. Mwi njit jinej, mat minam majipin kal tutikit ni tutikit twa antu. Ov, yawiy yachingejinau? Bwat.

8. Mutapu ik wawanyina Kujingunik 6:1-4?

⁸ Mu muvu wa 1914, Yesu wadila Want wa mwiur wa Nzamb, ni “dichuku dia Mwant” diasambisha. (Kujingunik 1:10) Mu chishimushimu chisambidinau mu buku wa Kujingunik, amulejen Yesu mud Mwant upandakena wendidila pa kabar utok. Amakundj akwau in kwendin pa atubar amulondwil, umwing ni umwing ufanikeshin riyind rimwing rikuyikwata antu. Umwing wau wendidin pa kabar usunz, ni amwinkisha mbil ya “kudiosh chisambu pansh, chakwel ajipijan muntu ni mukwau; amwinkisha mpak ya musamun yijim.” (Kujingunik 6:1-4) Kabar winou ni mwin kwendinap afanikeshin njit, ni mpak ya musamun yiney yijim yifanikeshin kujipan kujim kwa mat ma njit ma katat makweta usu nakash. Mu mat minam mwiwejidin kal ilel mat ma nikleyer, makutwisha kushesh tutikit ni tutikit twa antu; maroket makutwishau kuyidjibwil antu adia kulemp nakash ku akilometre ni akilometre; pamwing kand nich mat makash masheshina antu avud kapamp kamwing ma shimi ni bioloji.

Tutil Matu ku Kubabesh kwa Yehova

9. Mutapu ik ufanikena mangand ma katat ni madingaku kurutu kwa Mabeb?

⁹ Mu machuku ma Nowa, Yehova wayishesha antu mulong wa chisum chikash cha antu ayimp akwashau kud Anefilim. Ov, chidi nchik nlel? Ov, mangand madi makad chisum kupandakanamu muchadinga? Chakin kamu bwat! Chikwau kand, mud mu machuku ma Nowa, ilel antu abangidin ching yisakin yau ayinau, apakishin kwau kushakam “muchifanyidina”, alikin kutesh kubabesh kulejenau. (Luka 17:26, 27) Ov, kudi kand diyingish dia kwidjidjek anch Yehova kakezap kand kuyishesh antu? Bwat.

10. (a) Dibabesh ik dipaninau chisu ni chisu mu uprofet wa Bibil? (b) Yisu njil yimwing kusu ya manangu ya kulondul ilel?

¹⁰ Yitot ya mivu kurutu kwa Mabeb, Enok wabwaka ya disheshik difanyidina kushiken pa chirung chetu. (Jud 14, 15) Yesu niyend wisambina kwez kwa “mar mapandakena.” (Mateu 24:21) Aprofet akwau niyawiy apana kubabesh piur pa chisu chinicha. (Ezekiel 38:18-23; Daniel 12:1; Jowel 2:31, 32) Ni mu buku wa Kujingunik, tutangin kurumburil kukash kwa disheshik dined. (Kujingunik 19:11-21) Etu awonsu, tumwimburijin Nowa ni tusadil mud in kulejan a kutentam. Tutil matu ku kubabesh kwa Yehova ni tukat kuyikwash nich rukat amutej netu kusal chilik chimwing. Chawiy lel, mud Nowa, twendin pamwing ni Nzamb. Chakin kamu, chidi cha usey anch muntu win mwawonsu usotila mwom adandamena kwend pamwing ni Nzamb. Ov, mutapu ik tukutwisha kwend ni Nzamb kwikalap nchik yipwichik yiturishina nich dichuku ni dichuku? Tuswiridin kukudish ritiy rikash mu kuwanyin kwa rutong ra Nzamb.—Hebereu 11:6.

Tudandamenany Kwend Pamwing ni Nzamb mu Yisu Yivundangena

11. Mutapu ik tuyimburijina in Kristu a mu mivu chitot ya kusambish?

¹¹ Mu mivu chitot ya kusambish, in Kristu azizidilau many ayela anch adi a “Mwi Njil.” (Midimu 9:2) Mwom wau wawonsu wikungina pa ritiy mudiay Yehova ni Yesu Kristu. Endina mwi njil ya Nsalejau. Ilel, in Kristu ashishamena mwamu musadilau.

12. Chom ik chashikena kupwa kwa Yesu kusal chilay cha kudish chisak cha antu?

¹² Usey wa ritiy umekedin mu chinship chimwing chasadika mu mujikit wa Yesu. Dichuku dimwing, Yesu wasala chilay, wadisha chisak cha amakundj piswimp 5000. Antu ashimoka nakash ni kusangar. Pakwez, tal yashikena kupwa. Tutangin anch: “Mwamu antu chamanau yilay yasalay, awiy alond anch: ‘Mwinou kamu muprofet ukweza mu mangand.’ Chawiy Yesu chijikay anch awiy asotil kwez ni kumuparil ku usu kumudish want, ndiy waya kand ku mukandu amwinend.” (Yohan 6:10-15) Uchuku winiwa ndiy waya kwindjing. Kulik kwa Yesu kumutond kwamutondau chakwel ikala mwant kwayiziyisha antu avud. Chikwau kand, ndiy wamekesha anch wadinga mwin manangu nakash chakwel kwikal mwant ni wadinga nich ulabu wa kuwanyish maswir ma ku mujimbu ma antu. Pakwez, chisu cha Yehova cha kumutek ndiy mud Mwant uyikedila chading kand kal chiwanyina. Chikwau kand, Want wa Yesu wadinga wa mwiur, kiwadingap wa pansh.

13, 14. Chitongijok ik chamekeshau antu avud, ni mutapu ik wapakau ritiy rau?

¹³ Pakwez, runtu rakwata mupak wa kumulondul Yesu ni amutana, mud mulondilay Yohan, “ushad ukwau wa karung.” Ov, mulong wak wamulondulau kupwa kwendendiy kulik want welau kumudish? Avud pakach pau amekesha kuman kwa mujimbu, isambina yakudia ya ku mujimbu yapanay Yehova mwi mpay pa machuku ma Moses. Ading atongidin anch Yesu ukudandamen kuyinkish yakudia ya ku mujimbu. Yesu wajingunina yitongijok yau yiyimp, chawiy wasambisha kuyilej uyakin wa muspiritu wadinga ufanyidina kuyikwash kutenchik yitongijok yau. (Yohan 6:17, 24, 25, 30, 31, 35-40) Pakwez, amwing anunganijana mulong wendendiy, nakash kamu paletay chilakej chinech: “Chakin chakin nakulejany anch, ching en wadiany kamu mbij ja Mwan a muntu ni kuna mash mend, chamwamu kupand kwikil mu en. Ukudia mbij jam ni kuna mash mam ukwet mwom wa chikupu; am nikez kamulangwish pa dichuku dia kwisudiel.”—Yohan 6:53, 54.

¹⁴ Chisu ni chisu yilakej ya Yesu yayibachika antu kumekesh anch chakin kamu asotin kwend pamwing ni Nzamb. Chilakej chinech ni chawiy chadinga nich rutong rawiy rimwing. Chaleta mpwich nakash. Tutangin anch: “Chawiy in kwilej end avud chateshau yom yiney alond anch: ‘Mazu minam makasiken; nany ukutwisha kumwov?’” Yesu warumburila anch ading afanyidin kutesh kurumburik kwa muspiritu kwa mazu mend. Ndiy walonda anch: “Chidi spiritu ukata kupan mwom; mbij kijifanyidinip kwau chom; ni mazu minalondang kudi en madi [s]piritu ni mwom.” Pakwez, antu avud kasotap kutesh, ni rusangu rilondil anch: “Pa dizu dined in kwilej avud achirika panyim, kendap kand nend.”—Yohan 6:60, 63, 66.

15. Chitongijok ik chiwamp chadingau nich amwing a in kwilej a Yesu?

¹⁵ Chikalap nchik mwamu, kadiap in kwilej awonsu a Yesu akula mutapu winou. Chakin kamu anch, in kwilej ashishamena niyawiy kateshap kwau nawamp kurumburik kwa yom yalonday Yesu. Pakwez, adinga nich ruchingej rikash mudiay Yesu. Pita, umwing wa in kwilej ashishamena, walejana yovil ya awonsu ashala palonday anch: “Mwant, tukuya kudi nany? Ey yey ukweta mazu ma mwom wa chikupu.” (Yohan 6:68) Yidi ngikadil yiwamp ya manangu, ni chilakej chiwamp mud ik!

16. Ov, chitwishikin nchik kupakiu, ni chitongijok ik tufanyidina kukudish?

¹⁶ Ilel unou, chitwishikin anch niyetu atupaka mutapu umwing mud mwayipakau in kwilej a kusambish. Ku mutambu wetu, tukutwish kuziy anch yakushilamu ya Yehova yalik kuwanyin swa mud mutusotila. Tukutwish kutong anch yirumburil ya Bibil yidia mu mikand yetu yengamidina pa Bibil yikasiken kutesh. Ngikadil ya mbay netu mwin Kristu yikutwish kutuziyish. Ov, chikwikal chiwamp kulik kwend pamwing ni Nzamb mulong wa chinech ap mulong wa mayingish mafanikena nich? Bwat kwau! In kwilej amusha Yesu amekesha yitongijok ya ku mujimbu. Tufanyidin kwipuk kusal mud mwasalau.

“Kitudiap a Pakach pa Antu Akata Kuchirik Panyim”

17. Yom ik yikutwisha kutukwash kudandamen kwend pamwing ni Nzamb?

¹⁷ Kambuy Paul walonda anch: “Mazu mawonsu ma Mukand wa Nzamb madiokala ku spiritu wa Nzamb.” (2 Timote 3:16) Yehova utulejin patok, kusutil ku yom yidia mu Bibil anch: “Njil ya kuya yawiy ey. Yangany mwinimwa.” (Isay 30:21) Kuziyil ku Dizu dia Nzamb kukat kutukwash ‘kubabel mutapu tukata kwend.’ (Efes 5:15) Kwilej Bibil ni kutongijokin pa yom twilejina kukat kutukwash “kwendil mu yakin.” (3 Yohan 3) Chakin kamu, mud mwalonday Yesu, ‘spiritu ukat kupan mwom; mbij kijifanyidinap kwau chom.’ Umutakel umwing kusu wa kuchingejin ukutwisha kutakel nzau jetu udi umutakel wa muspiritu, udiokila ku Dizu dia Yehova, ku spiritu wend, ni ku dirijek diend.

18. (a) Chom ik chakad manangu chisadiningau antu amwing? (b) Ritiy ra mutapu ik tufanyidina kukudish?

¹⁸ Ilel unou, antu akata kujiman mulong wa yitongijok ya ku mujimbu ap mulong wa kuburen kuwanyin kwa yikatau kuchingej, yisu yivud akat kuchirik kwinyim ni kusot kwisakin sens yom ya mangand. Chishadishinau chitongijok chau cha kuswakej, awiy kameningap kand usey wa ‘kuchish ku mes,’ ni akat kutond kulondul ntong ja mujimbu pa ndond pa kutek yisakin ya Want pa ndond ya kusambish. (Mateu 24:42) Chidiap cha manangu kwendin mwi njil yiney. Tal mazu ma kambuy Paul: ‘Pakwez etu kitudiap a pakach pa antu akata kuchirik panyim ku disheshik; tudi pakach pa akweta ritiy ni kushik ku kwipandishil mupim.’ (Hebereu 10:39) Mud Enok ni Nowa, tushich mu yisu yivundangena, pakwez mud awiy, twitapidil dilau dia kwend pamwing ni Nzamb. Chitwendina pamwing ni Nzamb, tukwet ruchingej rikash anch tukez kuman kuwanyin kwa yakushilamu ya Yehova, uyimp ukez kujiy, ni mangand masu matentamina makez kwez. Ridi ruchingej ripandakena kuwap mud ik!

19. Mutapu ik urumburilay Mike mwom wa in kwifukwil akin?

¹⁹ Uprofet wa Mike udiokila ku spiritu wa Nzamb walonda piur pa michid ya mangand anch yikez ‘kwendin muntu ni muntu mu dijin dia nzamb wend.’ Kupwa wilondila amwinend nau in kwifukwil ashishamena ni kulond anch: “Etu, ku mutambu wetu, tukez kwendin mu dijin dia Yehova Nzamb wetu chikupu ni chikupu.” (Mike 4:5, NW) Anch mupak wey udi mud wenday Mike, shal piswimp nend Yehova yikalap nchik yisu yivundangena mutushicha. (Jakobu 4:8) El katat rusot ra muchim wa muntu ni muntu pakach petu rikala ra kwend pamwing ni Yehova Nzamb wetu chikupu ni chikupu!

Ov, Mutapu ik Ukwakula?

• Kwilikan ik kudia pakach pa machuku ma Nowa ni m’ilel?

• Njil ik yalondulay Nowa ni dijuku diend, ni mutapu ik tukutwisha kwimburij ritiy rau?

• Yitongijok ik yiyimp yamekeshau in kwilej amwing a Yesu?

• In Kristu akin akwatin mupak wa kusal chom ik?

[Chipich chidia pa paj wa 30]

Mud mu machuku ma Nowa, antu nlel akwatiken nakash nich mijikit yau pichuku-pichuku

[Chipich chidia pa paj wa 31]

Mud atutwambil a Want, ‘kitudiap a pakach pa antu akata kuchirik panyim’