‘Ov Akutwish Nchik Kutesh?’
1 Yesu wakasikeshina nich kulond anch: “Chifanyidin rusangu ruwamp arulejan bil kudi antu a michid yawonsu.” (Mar. 13:10) Wikalap nchik usu tusadila nich mushiku, kuchidi kand yitot ya mamiliyon ya antu akad kal kutambul uman wa muntu ipend. Maguvernema mamwing makat kujidikang mudimu wetu. Ngand jivud jikwet antu avud akata kwiwejinaku swa mu chirung chikemp. Chawiy lel, ‘ov akutwish nchik kutesh?’—Rom 10:14.
2 Tumuchingejinany Yehova: Tufanyidin kuvurik anch Yehova wij mwikadil wa muchim wa antu awonsu. Yikalap nchik mwikadil ukwetay muntu, anch ukat kukimb nich kashinsh uyakin piur pa Nzamb, ukez kuutan.—1Jins. 28:9.
3 Aburaham winana nakash piur pa antu a mu Sodom ni Gomor. Pakwez Nzamb wamuleja nich kashinsh anch kakutwishap kushesh Sodom anch ez atanamu kusu antu atentamina dikum. (Dis. 18:20, 23, 25, 32) Yehova kand kal asheshap mwin kutentam pamwing ni muntu muyimp, mud muchamekana kusutin kukwolik kwa Lot nau anend amband.—2 Pita 2:6-9.
4 Elija wading ni kutongin anch washala kusu amwinend mud mwin kumusadil Nzamb wakin. Pakwez, Yehova wamuleja nich kashinsh anch kadingap kwend amwinend kusu ni mudimu wasambishay wading ufanyidin kamu kuupwish. (1Ant 19:14-18, NW) Ov mutapu ik udia mashakamin pa chirung chetu?
5 Twikalany Nich Yivud ya Kusal mu Mujikit wa Nzamb: Kitwijap, mu chilik chikusadika mudimu wa kulejan. Yehova ndiy amwinend ukweta chisend cha mudimu winou ni ukat kusadil angel end chakwel kuutakel. (Kuj. 14:6, 7) Ndiy amwinend mwin kukwat chiyul cha chilik chikushikena mudimu wa kupan uman kud antu a michid yawonsu. Anch Yehova wakwat mipak, ukutwish kuman anch uruu wa Want wapalangan kal mutapu umwing wa kwel anch tukutwishap kutongin anch antu avud nakash akutwish “kutesh dizu dia rusangu ruwamp ni kwitiyij.” (Midimu 15:7, NW) Yom yisadilay Yehova yikez kusadik kwambatan nich mudiay—Nzamb wa rukat, wa manangu, ni utentamina.
6 Chidi chisend chetu kusadil kwambatan nich rusot ra Yehova, kusal chipandakena kuwap chakwel muntu ni muntu ashikena ku kutesh rusangu ruwamp.—1Kor. 9:16.