Tudandamenany bil Kukimb Want
1 Kutek Want wa Nzamb pa ndond ya kusambish mu mwom ni kudandamen kusal mwamu chidiap chiswapela chisu tukata kukakalijan nich mar ma ekonomi ap milong yikwau. Ov mutapu ik tukudandamena bil kukimb Want chisu kukata kwikal mar? Ov tukusal nchik anch atwinkish mudimu utwitina kuburen ku yikumangen ap usadikina pa chisu chimwing ni cha mudimu wetu wa chingand? Ov Want ufanyidin kwikal pa ndond ya kaad mu mwom?
2 Ritiy Rikash Ridi ra Usey: Chisu chitekinau ritiy retu mu choziu mu ngikadil mud yiney, kangal twavuramen kushilamu kwa Yehova ni kukasikesh kwa Yesu mulong wa ukwash wa Nzamb anch tukat bil kukimb Want. (Kus. 37:25; Mat. 6:31-34) Yipwichik ya mangand ni mar makutwish kujadish kuman kwetu ni kutukangesh kudandamen kukimb Want wa piur nakash. Antu amwing akat kulikidil ruchingej ra kwikal nich ndond ya katumb mu mudimu ap kukimb kwa nfalang kwikala chom cha kusambish mu mwom. Pakwez, mud kamu Paul, tufanyidin kushinshikin nawamp chom chidia kamu cha usey nakash mu mwom.—Flp. 3:7, 8.
3 Yitenchik Yiswiridikina Kusal: Mwin kulejan umwing walonda anch: “Muchim wam wading mu midimu yam ya kwisak—wawiy nadinga nikatina nakash. Nadinga ni kutong kand anch nikutwish kudandamen kwikal Kaman oku nipanin chisu cham chivud mu yisakin ya wingend-a-mushing wam.” Pakwez wadinga ni kutong kamu nakash anch ukutwish kusal yivud chakwel kumusadil Yehova. Mu kusut kwa chisu ndiy walika wingend-a-mushing wadinga ni kumukangesh kuya kurutu muspiritu. Pipanay kamu mu mudimu wa Want, watwisha kulond anch: “Katat nikat kwiyov anch mwom wam upandiken kuwap ku mes ma Yehova, chinech chawiy chom cha usey.”
4 Chidi cha kushiman anch, Atuman avud asha kal midimu ya ku mujimbu ni ruchingej ra kwikal nich nfalang jivud, ni kuswapesh mwom wau, ni kusal mudimu wa chisu chawonsu. Mwamu mwasalau akadivar ansangarum, ankwash’a mudimu ni amakurump ajich, kupwa kwa kwilej ku Shikol ya Mafundish ma Mudimu, atambwil yisend ya mudimu yipandakena kuwap. Nich kulondul chilikej chiwamp cha Paul, akat kusanger chakin kamu mitapu ya kukwatikesh mwom wau nich yom ya dishin ya mu mwom.—1Kor. 11:1; 1Tim. 6:6-8; Heb. 13:5.
5 Ap anch mangand makat kudiburil mutapu wetu wa kuman mwom, tukwet chiyukish cha Yehova. (1Kor. 1:26-31) Ov chidiap cha kukasikesh kwijik anch ndiy ukez kutusadil sens mud chifanyidina ni ukez kutukwash kuwanyish mudimu wend? Chisu tukweta katat mulong wa kulejan kudil kwa Want wa Nzamb chikezap kuchirik kand. Komb chawiy katat chisu cha kudandamen bil kukimb Want mu mwom wetu.