Ov Mulong Wak Kudandamen Kulejan?
1 Ov mudimu wa kulejan Want washikin mu chisak chen pasutil kal chisu chilemp? (Mat. 24:14) Anch mwawiy, ukutwish kutongin anch teritwar wa chikumangen amuwanyishin kal kumulejan nawamp win kamu. Katat chisu ulejena, pamwing ap antu avud ukata kusankanijan nau ameken mud kakatap kusanger uruu wa Want. Ap mwamu, tal yilondinau piur pa in kwilej a Yesu mu buku Prophétie d’Isaïe II paj 141: “Mu jindond jimwing, yibudikin ya mudimu wau yimeken mud yikemp nakash kwisikej nich kujimb kwa mudimu ni usu usadilau. Chikalap nchik mwamu, akat kujijaman.” Ov mulong wak kudandamen kulejan?
2 Tuvurikany Jeremiy: Kujijaman kwetu kushinshamena mu mudimu wa kulejan kufanyidinap kwengamin pa mutapu ukuteshau antu ap bwat. Jeremiy walejana mivu 40 mu teritwar umwing ap anch antu akemp nakash awiy amutesha ni avud alika kutesh uruu wend. Ov mulong wak wadandamenay Jeremiy kulejan? Mulong ndiy wadinga ni kusal mudimu wamwinkishau kud Nzamb kusal ni kwijik kwend yela kushiken mu machuku ma kurutu yawiy yamubachika kudandamen kulond nich mushiku.—Jer. 1:17; 20:9, NW.
3 Mwikadil wetu udi kamu wa chilik chimwing. Yesu watwinkisha mbil ya ‘kurumburil rusangu ruwamp kudi antu, ni kumekesh uman wetu anch, ndiy kamu winou watondau kud Nzamb, mulong wa kuyirumburish antu aom ni afu.’ (Midimu 10:42) Uruu tukata kusend udi wa kufa ni kupand kud antu akuutesha. Antu akez kuyirumburish kulondulijan nich mutapu ukatau kwakul ku rusangu ruwamp. Chawiy lel, chisend chetu chidi kamu cha kusal mud mwatwinkishau mbil. Ap anch antu alik kututesh, chinech chitwinkishin chisu cha kuyimekeshin rukat retu rijim ni kwipan kwetu kud Yehova nich kudandamen kusal yitufanyidina kusal. Pakwez kudi yivud ya kusal.
4 Tukat Kutaninamu Ukwash: Kusalang rusot ra Nzamb, wikalap nchik mutapu wakwilau antu adia mu teritwar, kukat kutwinkish chisambu cha mu muchim, kusanger yitusadina ni musangar, yom yakad kutwish kuman mwi njil yikwau ap yimwing. (Kus. 40:8) Mwom wetu ukat kwikalang nich dirumburik dia kashinsh ni rutong. Anch tukat kuusadil nakash mu mudimu wa kulejan, muchim wetu ni manangu metu yikat kushindamen nakash pa ruchingej ni musangar wa kushakam mu mangand masu ma Nzamb. Kushakam kulondulijan nich kushilamu kwa Mifund kukat kukudish mwom wetu wa muspiritu ni kukasikesh urund wetu ni Yehova.
5 Ap anch tumenap yibudikin ya katat mu mujikit wetu wa kulejan, chitwishikin anch twakunin kal mbut ya uyakin mu muchim wa muntu yikeza kusapuk chisu chimenay Yehova anch chawiy chifanyidina. (Yohan 6:44; 1 Kor. 3:6) Kwikil muntu ap umwing pakach petu wija uvud wa antu akeza kwilej piur pa Want kusutin ku usu usadinau antu a Yehova, ikala a ndond tushicha ap a mu mangand mawonsu.
6 Nich kusal swa kupandakan mud chadinga pakur, tufanyidin kudimukin yany ya Yesu yilondwila ey: “Babalany, chishany ku mes, mulong kiwijanyap chisu chikushika yom yiney. Yom yinikulejinanya en niyilejen kand kudi antu awonsu anch: ‘Chishany ku mes!’ ” (Marko 13:33, 37) Komb lel, etu awonsu tudandamenany kulejan rusangu ruwamp ra Want, tusangareshany muchim wa Yehova pitusadila mudimu winou wa kutumbish dijin diend dijim ni ditumbila.