Mulong wak Tukata Kuchirik Chisu ni Chisu

1. Chipul ik chipwilingau piur pa mudimu wetu wa kulejan?

¹ Mu jindond jivud, chisu ni chisu tulejening mu teritwar wetu mwawonsu. Tudandamedin kwendil ku yikumbu yawiy yimwing chisu ni chisu, ap anch mwin chikumbu watuleja kal anch kakatinap. Mulong wak tudandamedina kuyendil antu alika kwitiyij uruu?

2. Diyingish ik dia kusambish ditubachikina kudandamen mu mudimu wa kulejan?

² Kumukat Yehova ni Akwetu Antu: Diyingish dia kusambish ditukata kudandamen mu mudimu wa kulejan didi kumukat kwetu Yehova. Muchim wetu utubachikin tudandamen kuyilej antu akwau ya Nzamb wetu mujim. (Luka 6:45) Kumukat kwetu Yehova kutubachikin tuziyila ku yijil yend ni tuyikwasha antu akwau asala chilik chimwing. (Jinsw. 27:11; 1 Yohan 5:3) Kujamish kwetu kushinshamena mu mudimu winou kwimedinap pa mutapu wakwikalau antu. Ap payizengolau in Kristu a mu mivu chitot ya kusambish, adandamena kulejan “kalikap”. (Midimu 5:42) Anch antu alik kutesh, pa ndond pa kuchirik kwinyim, tukat kujamish, ni tukat kumekesh kujimb kwa rukat retu ni kwipan kwetu kudi Yehova.

3. Ov, kuyikat antu kutukwashin nchik kudandamen kulejan?

³ Tujamishin kand mulong tumukatin mukwetu muntu. (Luka 10:27) Yehova kasotilap anch muntu ap umwing asheshika. (2 Pi. 3:9) Ap mu teritwar tukata kusal chisu ni chisu, tukat kutanangamu antu asotila kumusadil Yehova. Chilakej, pa ditung dia Guadeloupe, muntu 1 pa antu 56 udi Kaman wa Yehova, muvu wadiap ou ababatishin antu 214. Antu 20000 akumangen ku Chivurikish, piswimp muntu 1 pa antu 22 pa antu adia pa ditung!

4. Mutapu ik ukata kuswimp materitwar?

⁴ Kukarumuk mu Teritwar: Mwikadil wa teritwar wetu ukat kukarumwok chisu chin chawonsu. Chisu tuyila kumwendil muntu walikina kututesh, pamwing ap muntu mukwau wa mu dijuku—wakad kal kuteshangap uruu wetu—ukutwish kutwak ni kututesh. Ap tukutwish kutan antu asu asokidinap amekeshina kusanger. An atutumb apama kal ashicha ku chikumbu. Antu inay akutwish kusot kutesh uruu wa Want.

5. Yom ik yikutwisha kusal anch antu itiyija?

⁵ Antu ni yawiy akarumukining. Kambuy Paul wadinga pasak “mwin kusalan ni mwin kwakamishan ni kurumbok.” (1 Tim. 1:13) Chawiy chimwing, antu avud amusadidila Yehova ilel kadingap ni kusanger uyakin pa chisu kanang. Amwing adinga ni kupompat ap rusangu ruwamp rin. Mikadil ya mangand chiyiswimpina, in rupompat amwing ap antu adinga ni kulik kubangaku akutwish kusot kutesh. Akwau akutwish kand kusot kutesh nakash kupwa kwa kuman mar, mudi rufu mu dijuku, kushadish mudimu, kukangany nfalang, ap mulong wa ukash wa mujimbu.

6. Mulong wak tufanyidina kudandamen kulejan nich mushiku?

⁶ Ditenchik dined dia yom diyil kwisudiel yadi, pakwez mudimu wetu wa kulejan ni wa kufundish uyil kamu kurutu. (Is. 60:22) Chawiy lel, tudandamedin kulejan nich mushiku ni twikasikeshin kulam yitongijok yiwamp. Muntu mukwau tukwambamba nend ukutwish kututesh. Tufanyidin kudandamen kulond! ‘Mulong anch twasal mwamu tukez kwipandish etu pamwing nau antu akututesha.’—1 Tim. 4:16.