“Twasadil Kal Mudimu mu Teritwar Wetu Tupamp Tuvud!”

¹ Ov watonginap kal anch usadilany mudimu chisu ni chisu mu teritwar wen chakwel mwikil kwau antu adia mud amikoku achishadilamu? Pamwing ap wading ni kutong anch: ‘Nij mutapu ukwakulau antu. Ov mulong wak kuya kand ni kuchirikin antu akad kumekesh kusanger?’ Chinech chidi chakin anch materitwar mavud asadilingamu mudimu chisu ni chisu. Pakwez, chom chinech chifanyidin kuchiman mutapu uwamp, kangal kuchiman mu mutapu uyimp. Ov mulong wak mwamu? Shinshikin yiyingish yinying yilondwila ey.

² Malembil Metu Amakwil: Yesu walonda anch: “Yakwangul yidi yivud, pakwez in mudimu wa kwangul adi akemp. Mulembijekany mwin chir chakwel ukutum in mudimu wa kwangul avud.” (Luka 10:⁠2) Mivu makum yasutina twading ni kumulembil Yehova mulong wa ukwash uvud. Mu jindond jivud, tukwet katat kuswir kwa kuwejinaku kwa in kusal mudimu, ni tukat kulejan ni kuwanyish teritwar chisu ni chisu. Mulong Yehova wakwil malembil metu, ov chinech chifanyidinap kutwinkish musangar?

³ Kudandamen Kuletining Mabuj Mawamp: Ap mu materitwar mukatau kulejan chisu ni chisu, antu akat kwitiyang uruu wa Want ni kushiken kwikal ni ronganyin ra uyakin. Chawiy lel, tufanyidin kuya ni kuchirikinamu kakwau ni kakwau nich ruchingej ra kuyitan antu akweta michim yitentamina. (Isa. 6:​8-11, NW) Mud mwasalau in kwilej a Yesu akusambish, “yangany” kud antu adia mu teritwar wen, ni kwikasikesh kulangwish kusanger kwau piur pa Want wa Nzamb.​—⁠Mat. 10:​6, 7.

⁴ Mu Portugal rubing ni rubing yikumangen yivud yikat kulejanang mu teritwar wau, pakwez awiy akat kuman kand antu afanakena mud amikoku. Nambaz umwing wadinga ni yitongijok yimwing yiwamp. Ulondil anch: “Kurutu kwa kutumbuk kuya mu mudimu dichuku ni dichuku pamanch, nikat kumwit Yehova ukwash wa kutan muntu usangaredina dilejan dia Baibel.” Dichuku dimwing wirijeka mulong wa kwilej nau in kusal mudimu mu chikumbu cha mwin kukilan ni kukas nswich. Kupwa, ching, muntu umwing kusu ndiy wamekesha kusanger mulong wa kwilej. Muntu winou walonda anch: “Akwau kasangerap kwau, pakwez am nichikatishin.” Kushiken pakach pa ngond ndiy wadinga ni kutakel malejan maad ma Baibel masambishay amwinend. Kupwa kand kwinyim kwa kutambul dibatish, ni ndiy wasambisha mudimu wa uchibol!

⁵ Akat Kusal Mudimu : Rusangu ruwamp akat kurilejan, mud kamu mwalonday Yesu. (Mat. 24:14) Ap mu jindond mudia antu akata “kulik kututesh,” akat kuyitek chijingidij kusutil mujikit wa kulejan. Tuchingejin anch antu amwing akwikal akad kutesh ap in kulik uyakin. Pakwez, antu a mutapu winou chifanyidin kuyijikish nawamp kamu piur pa dirumburish dia Yehova dikweza.​—⁠Ezek. 2:​4, 5, NW; 3:​7, 8, 19, NW.

⁶ Kand kal Tupwisha Mudimu: Chidiap chiwanyidina kud etu kukwat chiyul cha kwimik mudimu wa kulejan. Yehova wij nawamp kamu chisu chikeza kusul mudimu winou. Ndiy wij anch mu teritwar wetu muchidi kand antu akutwisha kwitiy kand rusangu ruwamp. Nlel, antu amwing akat kulond anch yiyikatishinap, pakwez kukarumuk kukash mu mwom wau​—⁠kushadish mudimu, mayej makash, rufu ra mukatish​—⁠yikutwish kuyikadish in kutesh nakash pa chisu kanang. Mulong wa yitongijok yiyimp ap mulong wa kwikal akwatikena nich yom yivud ya kusal chakwel kutesh, antu avud kand kal ateshap chakin yitukata kulejan. Kuchirikin kuyital kwa urund chisu ni chisu kukutwish kuyikadish in kushinshik ni kutesh.

⁷ Antu akudila mu mivu ya katat ni akweta majuku mau ayinau akwatin mwom nich kashinsh nakash ni akat kwipul yipul yikutwisha kwakul ching kusu Dizu dia Nzamb. Mband umwing nvaj changadim wayitazuka Atuman aad ku chikumbu chend ni kulond anch: “Pinadinga changadim mukemp, nadingap ni kutesh mulong wak maku wading ni kuyopat Atuman ni kuyilej anch kadingap ni kuyisanger, oku usotilany kwen kulondil piur pa Baibel. Kupwa nitekina chiyul mu manangu mam anch nakul, nachik, ni kwikal ni kwol kwam, Nikez kuyitazuk Atuman’a Yehova kwez kwol kwam ni kwinrumburil Baibel.” Mwamu mwasalay, chom chayisangaresha nakash Atuman eza ni kumutal.

⁸ Ov Tukutwish Kwikasikesh Nakash? Chitwishikinap kwikal chisu chawonsu antu tukata kwendil akata kwikadish mud chikasiken kusal mudimu chisu ni chisu mu teritwar. Yisu yimwing ayinetu tukat kuchisal chikala chikasikena. Ov tukat kusambish nich yitongijok yiyimp? Chinech chikutwish kwikal ni usu mu yitongijok yetu, mutapu wetu wa kulond ni chifu chetu. Tumekeshany spiritu muwamp ni chifu chikweta musangar. Tupakishany kand kwisamb nau. Tukarumunany mazu metu ma kusambish nich misamb, ni kwikasikesh kumarijek. Pamwing ap ukutwish kukarumun chipul chey cha kusambish nich ap kusadil mufund windjing mu kwisamb kwen. Yita akadivar nau anambaz akwau yamenau anch yikwet mabuj pasadilau mu teritwar wau. Tusalany mudimu nau in kulejan kushalijan ni ayibol, ni kushinshikin chikadishina mudimu wau ni mabuj.

⁹ Yehova witiyidin ni kuyukish mudimu wa kulejan wa Want, ni kusal kwetu mudimu winou kumekeshin rukat retu kud ndiy ni kud mutej netu. (Mat. 22:​37-39) Komb tuwanyishany mudimu wetu sens, wakad kuziy mulong wa kusal chisu ni chisu mu teritwar.