Ov, Akutesh Nchik?
1. Ov, mulong wak mudimu wa kulejan ukutwish wikal ukash, ni mulong wak tukat kujijamen kuusal?
1 Dichuku dia Yehova diezin swa-swa, kudi katat maswir majim nakash ma kusot kuyikwash antu akwau avud chakwel aka ronganyin rakin ra Nzamb ni ijika rutong rend mulong wa antu. (Yoh. 17:3; 2 Pi. 3:9, 10) Pa yisu yimwing chiding chikash kusal mwamu, mulong antu avud alikining kwau ap akutwish atuswingish mulong wa mudimu wetu wa kulejan. (2 Pi. 3:3, 4) Chikalap nchik mwamu, tukwet mayingishin mawonsu ma kwitiyij anch kuchidi ni katat antu amwing mu teritwar wetu akwitiyija rusangu ruwamp anch arutesh. Chad antu inay akutesh nchik anch kwikil muntu wa kuyilej?—Rome 10:14, 15.
2. Chilakej cha kambuy Paul chitukasikeshin mutapu ik?
2 Kura Nich Rupompat: Mulong wa kuwap kwa antu asotina kutesh uruu wa Want, kangal twalik kuulejan. Filipoi wawiy musumb wa kusambish wa mwi Mputu wasambela kumutesha kambuy Paul palejanay rusangu ruwamp. Chisu chamufundau cha makasu Paul pamwing ni Silas, awonsu aad ayichinta yibul nich misel ni ayidjibwila mu rukan. (Mid. 16:16-24) Pakwez, chom chinech chiyimp chayishikena chamwovishap Paul wom wa kulejan. Payay mu Tesalonika, musumb ulondwilaku mu weny wend wa umishoner, ndiy ‘wajijamana mwi Nzamb.’ (1 Tes. 2:2) Ov, chilakej cha Paul chidiap diyingish dietwetu chakwel ‘kangal twaziyany’?—Gal. 6:9.
3. Yom ik yikutwisha kuyishikij antu amwing adinga ni kulik kutesh akarumuna michim yau?
3 Antu avud adinga ni kulik pasak, michim yau yakarumukin kal. Kanvundangesh ka nfalang, mayej, rufu mu dijuku, ap kutesh jinsangu jiyimp jisutina mu mangand yikutwish yasal anch michim yikarumuka. (1 Kor. 7:31) Antu amwing adingau ni kukangesh kudi anvaj au ayinau apamin kal ni asotil kutesh. Kudandamen kwetu kulejan kuyinkishin antu inay mutapu wa ‘kutazuk pa dijin dia Yehova’ pikuchidiaku chisu ap.—Rome 10:13.
4. Chom ik chitwinkishininga usu chakwel tudandamena mu mudimu ‘pakad kulik’?
4 “Kalikap”: Kumukat kwetu Nzamb ni mutej netu kukutubachik tudandamena ‘pakad kulik’ kusal mudimu wa kulejan ni wa kuyikadish in kwilej, mudi mwasalau atwimbuy mu mivu chitot ya kusambish. (Mid. 5:42) Ilel antu avud akwet “ushon ni kwakam mulong wa yom yitakanena” yisadikina ilel. (Ezek. 9:4) Ruchingej ni kwipimish ik kutaninau antu inay pakatau kutesh rusangu ruwamp! Ap palikiningau antu avud kutesh, tukwet kashinsh ka Mifund anch Yehova usangaredin nakash usu utusadila.—Heb. 13:15, 16.