Izwila Nich Musangar wa Kwikal mu Uumwing Nend Yehova ni Mwanend Chinship Chipandikena Usey cha Muvu Chikusadik pa Rish 28
1 Mu kushinshikin Yakudia ya Urel ya Nsalejetu kupwa kwa kuzwek kwa muten pa Rish 28, 2002, tumekeshin anch tukwet musangar ujim wa kwikal mu uumwing nend Yehova Nzamb pamwing ni Yesu Kristu. Pa chinship chinech cha pakampwil, atushal a in Kristu azizidilau many akez kusangar cha pakampwil kwikal mu “uumwing” pamwing ni answan akwau a Want, pamwing ni Tatuku ni Mwanend. (1 Yohan 1:3; Efe. 1:11, 12) Mamiliyon ma “amikoku akwau” akez kutongijokin nakash piur pa chisu cha pakampwil chikwetau cha kwikal mu uumwing nend Yehova ni Mwanend, kwikal nich muchim umwing ni manangu pamwing nau mu kuwanyish mudimu wa Nzamb! —Yohan 10:16.
2 Kusadil Pamwing mu Urund wa Piswimp: Yehova ni Yesu ading chisu chin chawonsu mu uumwing wa musangar. Awiy adinga ni urund wa piswimp kusambish kamu chisu chilemp nakash kurutu kwa kumutang muntu. (Mike 5:2) Mwamu lel akudisha kamu moj ukash wa rukat ridimukina mwaad wau. Chidiay manangu mafanikeshinau ni muntu, Mwanat winou padingay mu mivu yend ya kurutu kwa kwez panap pansh mud muntu watwisha kulond anch: “Namusangarishanga pichiku ni pichiku, nasangaranga kand kurutu kwend machiku mawonsu.” (Jinsw. 8:30) Chasutishay mivu yivud nakash yakad kutwish kuchind mu urund wa piswimp ni Musul wa rukat chinech chikala chakin kamu nich usu ujim padiay Mwan a Nzamb!—1 Yohan 4:8.
3 Chadingay ni kutongin kuswir kwa dipandish dia ukamuntu, Yehova wamutonda Mwan wa kuval kwend amwinend, muntu wadinga nich rukat ra pakampwil mulong wa antu, chakwel apana yakupesh ya difut, yakupesh yitwinkishina ruchingej rimwing kusu. (Jinsw. 8:31) Mud kamu mudiau Yehova ni Mwanend mu uumwing mu kuwanyish rutong rimwing, tudi ni yetu mu uumwing ni yawiy ni mu uumwing muntu ni mukwau mu moj wa rukat rukash, ni kusal rusot ra Nzamb nich musangar.
4 Tumekeshany Kujikitish Kwetu kwa Kashinsh: Anch twikal ku Chivurikish ni kutesh nawamp nich kalimish, tukutwish kumekesh kujikitish kwetu kwakin mulong wa rukat ra Yehova ni yakupesh ya Mwanend mulong wetwetu. Kukasikeshin kukez kwikal piur pa chilikej cha rukat ra Yesu, kushinshaman kwend djat ni ku rufu mu kupan kwa difut, ni winyikel wend mud Mwant wa Want utenchikinau kud Nzamb, ni yiyukish yikeza kulet Want winou kud ukamuntu. Akez kutuvurish kand kuswir kwa kudandamen kumekesh ritiy retu, kusal mudimu nich mushiku kwambatan nich rusot ra Yehova mud ‘ambay a mudimu mu uyakin.’—3 Yohan 8; Jak. 2:17.
5 Tuyikwashany Antu Akwau Kusadil Netu Pamwing: Chisak cha amakurump chifanyidin kusal usu wa pakampwil mulong wa kuyikasikesh Atuman awonsu akad kutulang kand rapor wau wa mudimu, adia mu teritwar kwez kukumangan ku Chivurikish cha rufu ra Kristu. (Mat. 18:12, 13) Salany dipang dia antu awonsu afanyidinau kwendin chakwel kangal avuramen muntu ap umwing ni kuyitazuk awonsu muntu ni muntu pa rend.
6 Ov uyij antu akwau akutwisha kwez ku Chivurikish? Sambish kusal usu wa kuvuvurish kusanger kwau mulong wa chinship chinech. Yitazuka nich chirungil, ni kuyak nawamp nich musangar. Tusalany usu wetu wawonsu chakwel kuyitazuk antu tukata kwilej nau Baibel ni antu akwau amekeshina kusanger, ni yid ya dijuku dietu nau antu a chijiken kwez ku chinship chinech cha usey ukash cha muvu. Yiyukish ya difut yitwinkishin etu awonsu ni muntu mwawonsu ukata kwilej “usey ujim upandakena wa kumwijik Kristu Yesu.” (Filp. 3:8) Antu inay akata kutek ritiy rau mu yakupesh ya Kristu akutwish kutambul ruchingej rijijamena ra mwom wa chikupu.—Yoh. 3:16.
7 Kangal twadiburil usu ukutwisha kwikal nich Chivurikish padi antu a michim yiwamp. Kwasutin kal mivu yaad mu disang dia ngand ya Papouasie-Nouvelle-Guinée, antu 11 asangera uyakin akasa weny wa asaa 17 mu kawaat kakemp mu karung umwing ubwabwangena nich mambek mulong wa rinkind mukash chakwel kushik ku Chivurikish. Ov mulong wak? Alonda anch: “Twading ni kusot kusal musambu wa Chivurikish cha Kristu pamwing nau ambayetu in kumwifukwil Yehova; komb weny wading nich usey ufanyidina.” Tongijokinap bil mushiku wamekeshau antu inay ni kujikitish kwau mulong wa kwikal mu uumwing ni Yehova, Mwanend, ni akadivar in Kristu!
8 Twitany kusambish dilejan dia Baibel nau antu awonsu amekeshina kusanger. Tuyikasikeshany chakwel kukumangan ku yikumangan pakad kujing ni kwisambin ni antu akwau piur pa uyakin ukatau kwilej. Tuyikwashany chakwel ‘endina mu chimunyik’ nich ‘kusadil uyakin’ ni kusadil yany ya Baibel mu mwom wau. (1 Yohan 1:6, 7) Tuyikwashany kukudish urund wa piswimp ni Yehova ni kudandamen kukudish kusanger kwau mulong wa chisu chinech cha usey ujim cha kusal mu uumwing rusot rend.
9 Didi dilau mud ik dia kwikal mu uumwing nich musangar mu ‘yitongijok yimwing chad nich muchim umwing ni kurish mu umwing mulong wa kujimbish ritiy rilejenau mu rusangu ruwamp’! (Filp. 1:27, 28) Tuchingejany nich musangar chakwel kukumangan etu awonsu pamwing nau akadivar netu ku Chivurikish pa Rish 28, nich kupan kujikitish kud Yehova ni kud Mwanend! — Luka 22:19.