Tukudishany Musangar Wetu mu Kulejan
1 Musangar wa kulejan rusangu ruwamp—ov waumanap kal mu mudimu wey? Anch tubabelap, mangand mayimp matunyingumukina makez kutwikadish akad mushiku wa kulejan, ni kutushadishin musangar wetu. Kusadil mu teritwar mudia antu akad kwitiyij kukutwish ni kwawiy kand kutuziyish. Ov jinzau ik tufanyidina kusadil chakwel kukudish musangar wetu mu kulejan?
2 Twikalany Nich Kuman Kuwamp: Kulam mwikadil wa manangu uwamp kuding kwa ukwash nakash. Njil yimwing ya kusal mwamu yidi kutongijokin pa chisend chetu chijim cha kwikal ‘ambay a mudimu a Nzamb.’ (1Kor. 3:9) Yesu niyend udi pamwing netu mu kuwanyish kwa mudimu winou. (Mat. 28:20) Ni ndiy ukat kutukwash nich chisak cha angel. (Mat. 13:41, 49) Tukutwish kwikal nich kashinsh, anch usu wetu akat kuutakel kud Nzamb. (Kuj. 14:6, 7) Komb lel wikalap nchik mutapu ukutwishau kwakul antu kanang ku mudimu wetu, chakul cha mwiur chidi chakul chimwing cha musangar ujim nakash!
3 Twirijekany Nawamp: Kwirijek nawamp ni kwawiy kukat kuwejinaku musangar wetu. Kwikal tayad mulong wa mujikit kuswiridinap kwau kwipan mu midimu yivud. Kukutwish kusend kwau kusu aminit akemp chakwel kushinshikin manans ma kwisambin mu magazet ma katat ap mu mikand ya kupan mwi ngond winou. Tutondany mazu mamwing ma kupan nich gazet madia mu mutu wa mulong “Yitukutwisha Kulond Piur pa Magazet,” mu Mudimu Wetu wa Want. Tushinshikinany wenjil wa Chiwong 2002, “Yiyul ya Mazu ma Kusambish Nich Misamb mu Mudimu wa Chingand.” Ap kand tutalany mu buku Comment raisonner mulong wa mazu ma kusambish nich misamb makweta mabuj. Anch akuvundangeshin nich chikangesh misamb chimwing chilangwishinau antu wisambinany nau chisu ni chisu, irijeka nich chakul chikutwisha kuminy yirumburil yau ni kupwitin manangu ku mutu wa mulong ulangwishina kusanger. Buku Comment raisonner udi wa ukwash ukash mu kusalang mwamu. Kusadilang yom yiney ya ukwash kukez kutwinkish ruchingej tukweta nich kuswir chakwel kulejan nich musangar.
4 Tulembilany Nich Mushiku: Dilembil didi dia usey nakash mulong wa musangar wa chikupu. Mulong tukat kusal mudimu wa Yehova, tukwet kuswir kwa kumwit nich mushiku spiritu wend, dibuj dimwing dia spiritu winou didi musangar. (Gal. 5:22) Yehova ukez kutwinkish usu wa kudandamen kulejan. (Filp. 4:13) Kulembil mulong wa mujikit wetu kukutwish kutukwash kuman yom mu mutapu ufanyidina chisu tukata kuman yom yakad kusangaresh. (Midimu 13:52; 1 Pita 4:13, 14) Anch twakwachik nich wom, dilembil dikutwish kutukwash kujijaman nich mushiku ni musangar. —Midimu 4:31.
5 Tukimbany Yisu ya Kupan uman: Mwawiy, mudimu wetu udi wa musangar nakash chisu tukata kutwish kuyitan antu ni kuyinkish uman. Kukarumun program wey wa kuya ku chikumbu ni chikumbu mu yisu kushalijan, pamwing ap urel nakash ap pikuchidiaku muten urel, kukutwish kwikal nich yibudikin yiwamp nakash. Chisu chin chawonsu wendina ukat kusankanang antu mwi njil, mu makashiny, mu weny wa mu motak, ap mu kwipwish usweral mwi ndond ya kwiswedishin. Ov mulong wak kulik kurijek ap kusu misamb ya kusambish yiswimp ni kwisamb nau antu amekena kwikal nich ngikadil ya urund? Ap kand ukutwish kusal mudimu wa ku mujimbu ap kuya ku shikol ya leta, ndond ukata kwisamb dichuku ni dichuku ni antu akwau. Ukutwish kwikal ni chisu cha kupan uman nich kwau kwisambin mutu wa mulong umwing wimanyidina pa Mufund ukutwisha kulangwish kusanger. Yiyul yiwamp yidi pa paj wa kusambish wa wenjil wa Mudimu Wetu wa Want wa Chiwong 2002. Usu winou wawonsu ukutwish kukudish mu mutapu ujim nakash chilik cha musangar wa muntu mu mudimu wa kulejan.
6 Mulong musangar ukat kutukwash kujijaman, chidi cha usey kuulam! Anch tukat kusal mwamu, tukwangul difut dijim pakeza kushik mudimu winou wakad kwez kusadik kand kwisudiel. Ruchingej riner arinar rikutwish kuwejinaku musangar wetu mu mudimu wa kulejan.—Mat. 25:21.