Majuku Makweta Ukash wa Muspiritu—Ov Mutapu Ik?
1 Majuku ma in Kristu madi ma kujikitish mulong ‘makat kusadil kudandamen kud Nzamb mu majuku mau.’ (1 Tim. 5:4) Pakwez, nich yipwichik yivud yiyimp yitunyingumukina yikutwisha kuziyish ritiy retu, chidi cha usey anch majuku masala usu nakash chakwel kushal makash muspiritu. Ov mutapu ik ukutwishau kuchisal?
2 Sadilany Umutu mud Chasalay Kristu: Mitu ya majuku yifanyidin kumwilikej Yesu Kristu mu mutapu wa kusadil chisend chikwetau cha kukasikesh yid ya majuku mau. Chidiap kusu anch Yesu wamekesha rukat kud etu kusutin ku yakupesh ya rufu rend, pakwez Yesu udandamedin ‘kukat ni kudish’ chikumangen. (Efe. 5:25-29) Anvaj in rukat akat kulondulang chilikej chinech cha rukat ridimukina nich kuyikwash muspiritu yid ya majuku mau dichuku ni dichuku. Chinech chirumburikin kutakel dilejan dia dijuku dia Baibel rubing ni rubing, kwikal nich mambamb ma muspiritu chisu chawonsu pichitwishikina, ni kupwish kapamp kamwing milong anch yalank.—Kuv. 6:6, 7.
3 Mu Mudimu wa Chingand: Yid yawonsu ya dijuku yifanyidin kutesh anch kupan uman kud antu akwau piur pa Yehova ni piur pa jintong jend chidi chikunku cha usey cha difukwil diawu. (Isa. 43:10-12, NW) Anch en anvaj usotinany anch anen ikala Atuman’a Yehova ashinshamena, ufanyidinany kamu kusambish pachidiau anikanch nakash kutenchik michim yau mulong wa mudimu wa kulejan. Isambinany mulong wak chidia cha usey kwipan mu mudimu winou ni kuusal rubing ni rubing. (Mat. 22:37-39) Kupwa irijekany chakwel akubachikijangay chisu ni chisu mu mudimu wa chingand.
4 Kudishany kusanger mulong wa mudimu wa kulejan nich kwitekinaku chisu, pa chisu cha dilejan dia dijuku dia rubing ni rubing mulong wa kurijek ni kuchirikinamu mazu ma kusambish nich misamb makweta mabuj. Yinkishany anen diyiy dia muntu ni muntu ipend mu mudimu wa kulejan, dikutwisha kuyikwash kuya kurutu kwambatan nich chimbu cha mivu yau ni ukaliweny wau. Kupwa kwa kusutish chisu pamwing nau mu mudimu wa kulejan, isambinany piur pa mutapu umenau kuwap kwa muchim wa Yehova ku mutambu wau. Shimuninany uman ukutwisha kukasikesh ritiy rau. Chawiy lel majuku mavud makutwish ‘kupak ni kushinshik chakin anch Nsalejetu udi muwamp,’ awiy akez kwikal piswimp nakash nenday Yehova, ni ndiy ukez kuyikasikesh chakwel kurish nich “kuyip kwawonsu.”—1 Pit. 2:1-3, TMK.
5 Ku Yikumangan: Chipandiken kuwap mud ik anch yid ya dijuku yikwashijana umwing ni mukwau chakwel kukumangan pamwing ku yikumangan yawonsu ya chikumangen, nakash kamu anch umwing wau wovil kuziy, uziyil muchim, ap kusambish kufa muspiritu! Nambaz umwing changadim walonda anch: “Chisu chikatay kuchirik tatukwam, kudiokal ku mudimu, uziyining nakash. “Pakwez nikat kumulejang mulong umwing wa usey ukwisambinau ku chikumangan cha urel winiwa, ni chinech chikat kumukasikesh kuya ku yikumangan. Kupwa anch ni yam novil kuziy, ndiy ukata kwinkasikesh kuya.”—Heb. 10:24, 25.
6 Mu Mijikit ya Kusadil Pamwing: Majuku mafanyidin kusadil yom pamwing, mud midimu ya ku chikumbu. Majuku mafanyidin kand kwitekin chisu cha kwiswedish mu mutapu uwamp. Kudia pamwing, kuya kwipuwangesh mu kwend, kusengan masengan pamwing, ni kuya kuyendil anvaj ap arund yidi yisu yimwing ya musangar nakash.—Mul. 3:4.
7 Majuku ma in Kristu makweta ukash makat kupandakan yikokujol ya dichuku ni dichuku yikutwisha kuziyish usu wau wa muspiritu. Anch asejin kamu nakash kud Yehova, akat kumanang anch ndiy ukat kuyinkish ukash.—Efe. 6:10.