Yakul ku Yipul Yen

◼ Ov chisu ik chifanyidina kusal chisak cha rudim ra wingendj?

Ang teritwar wa chikumangen ukwet antu avud akata kulond rudim ra wingendj, amakurump afanyidin kusal yawonsu yikutwishau chakwel kutenchik mudimu wa kulejan mu rudim rinira. (km 7/02 p. 1; km 3/98 p. 3-4) Chitwishikin anch antu akata kulond rudim ra wingendj apalangen mu materitwar ma yikumangen yaad ap yivud yidia piswimp-piswimp. Pa chinech, kalam wa munyimuku ukupan umutakel uswiridikina, ni kuyikwash chad lel yikumangen kusadil pamwing mu mudimu wa kulejan. Chisu chimwing ni chikwau, chitwishikin kutenchik kusal diskur dia pibur ap Dilejan dia Tour de Garde chakwel kujingunin uvud wa antu akukumangana ku yikumangan yikusadika mu rudim ra wingendj.

Akutwish kusal chisak cha mu rudim ra wingendj ching anch awanyishin yom yiney yitinau: (1) Anch kudi in kulejan ap antu asangaredina akata kutesh nawamp rusangu ruwamp mu rudim riner ra wingendj. (2) Anch kudi mukurump ap nkwash’a midimu uwanyishinau nawamp chakwel kwimanyin ni kutakel chikumangan ap chimwing pa rubing. (3) Anch chisak cha amakurump chisotin kukwash chisak. Anch yitinau yiney ayiwanyishin, amakurump akwijikish biro wa mutiy chakwel lel chisak chikala chijikena patok ni kupwa akutwish kupan yany yikwau ya kulondul.

Yisak yivud yikat kusambishang nich Dilejan dia Buku dia Chikumangen rubing ni rubing. Kupwa, amakurump akutwish kwitiyin kuwejinaku yikumangan yikwau, mud Diskur dia pibur ni Dilejan dia Tour de Garde. Misamb No. 2, 3, ni 4 ya Shikol ya Mudimu wa Uteokras akutwish kuyisal mu kalas ka kaad anch kudi mukurump ap nkwash’a midimu ukutwisha kulond rudim rinira ni kusadil mud mwin kupan yiyul. Pakwez, chisak chikwinung pamwing nich chikumangen mulong wa diskur dia malejan, milong yijim ya chikunku cha kutang Baibel, ni Chikumangan cha Mudimu. Akutwish kand kutenchik yikumangan mulong wa midimu ya chingand mulong wa chisak.

Awonsu adia mu chisak akusadil pamwing mwishin mwa wintakel wa chisak cha amakurump. Amakurump afanyidin kutakel mutapu wisikena ni kumekesh kusanger kwau mu kuwanyish maswir ma chisak. Chisu chikwendilay chikumangen chikwashina chisak, kalam wa munyimuku ukez kand kutenchik kusadil pamwing ni chisak chinech mulong wa kuchitung muspiritu. Nich chiyukish cha Yehova, chisak cha rudim ra wingendj chikez kushiken ku kwikal chikumangen.