Kudishany Chingand cha Rudim ra Wingendj

1. Chom ik chidingaku pitusadilinga mudimu wa kulejan mu teritwar wetu?

¹ Yesu Kristu walonda anch rusangu ruwamp akez kurilejan mu mangand mawonsu chakwel rikala “uman kudi michid yawonsu.” Kashalapol umwing ni umwing uteshin nawamp kurumburik kwa mazu minam ni chawiy chikatau kusal mudimu wa kukun dizu ni wa kulejan. (Mat. 24:14; 28:19, 20) Pituyilinga ni kulejan ni kuyikadish in kwilej, chisu ni chisu tukutwish twayitan antu a michid kushalijan alondina jindim jishalijadina ni jetwetu. Niyau afanyidin kutesh uruu wa Want chakwel ashikena ku kukwat mupak wa kwikal ku mutambu wa uyakin kurutu dichuku dijim dia Yehova dieza. (Mal. 3:18) Mutapu ik tukutwisha kukudish chingand cha rudim ra wingendj mu teritwar wetu?

2. Mwi njil ik tukata kumwimburij Yehova pitwisambininga ni antu alondila rudim rikwau?

² Ikalany Nich Yitongijok ya Yehova Mulong wa Antu Alondila Rudim Rindjing: Pakwel anch tumekesha rukat ra Yehova rakad kasolikany kudi muntu ni muntu udia mu teritwar wetu, tufanyidin twikala nich impu yikash ya kuyikwash antu chakwel ashikena ku kwikal nich ronganyin rakin ra Nzamb wakin, Yehova, chikalap nchik rudim rilondilau. (Kus. 83:18; Mid. 10:34, 35) Ap anch twasidin bil padiau antu alondila rudim ra chikumangen chetu, tufanyidin kuta muchim ku maswir ma antu alondila rudim rindjing ni kukimb jinjil mutukutwisha kuyilejin niyau uruu wa Want wa Nzamb. Kuyimatik antu alondila rudim rukwau kukutwishap kwakwatijan nich rutong ra Yehova ra kuyilej uman antu a michid yawonsu. Mutapu ik lel tukutwisha kuyikwash antu akad kulond rudim retu?

3. Chom ik cha mudimu wa ukwash chitukweta, ni mutapu ik tukutwisha kwirijek mulong wa kuchisadil?

³ Sadilany Une bonne nouvelle pour les gens de toutes nations: Ka broshir kinak akatenchika mulong wa kukasadil pa chisu tutanininga antu alondila rudim rishalijadina ni retwetu. Sendany ka broshir kinak chisu chawonsu, ilejany wijikany yom yawonsu yidiamu ni irijekany mulong wa kukasadil. Chakwel anch umutalany swa-swa, fundany jindim kushalijan jilondiningau mu teritwar wen. Anch kudi mikand mu jindim jinej, chikwikal chiwamp uyisadilany mulong wa kuyipan kudi antu kupwa kwa kusadil uruu udia mu ka broshir kinak.

4. Mutapu ik tukutwisha kusadil ka broshir Nations mu mudimu wetu wa kulejan?

⁴ Anch watanany mu mudimu wa kulejan muntu ulondila rudim rikwau ni anch wijap kamu ang rudim ik rilondilay, sambish nich kumurumburil chibur cha ka broshir kinak. Kupwa muleja chipich cha mangand piur pa chibur chidia mukach, Muleja ngand yiushichinga, kupwa muleja anch usotil wijika ndiy wadiokala mwi ngand ik ni rudim ik rilondiningay. Chad anch wajingunin rudim rend, tal pa tablo ulejena yom yidiamu, tan paj ufanyidina, pwitin yitongijok ya mwin chikumbu pa mulong wa mazu ufundilau mu mamuny majim majal kwiur kwa paj, ni kupwa muleja anch usotil anch ndiy atanga uruu winou. Anch wapwish, mwinkisha trakt wa mu rudim rend ap muleja mulong wa mazu majaurikina, malejena anch usotil kwez kumuchirikin kand nich mukand wa mu rudim rend. Kupwa muleja mulong wa mazu majal mafundinau anch: “Dijin diam,” ni muleja dijin diey. Kupwa muleja mulong wa mazu majal mafundinau anch: “Dijin diey,” chad chingel mwin chikumbu akuleja dijin diend. Salany yitenchik yiwamp chawel weza umuchirikina.

5. Chom ik cha usey chifanyidina kusal mulong wa antu alondila rudim rindjing asangaredina?

⁵ Londulany Yitenchik: Chifanyidin kusal usu wawonsu mulong wa kuyendil antu asangaredina uruu wa Want, pakad kubangaku rudim rau. Anch twaman anch muntu winou umusangaredin Nzamb ni Dizu diend, Bibil, tufanyidin kufund Veuillez suivre l’intérêt (S-43) ni mwinkishay pakad kulab kalam wa ujindj wa chikumangen mulong amutuma ku biro wa mutiy chakwel muntu winou usangaredina amwendina kudi muntu ulondila rudim rend. Kupwa, biro wa mutiy ukumutum fomu winou ku chisak chilondila rudim riner. Anch amutambul, akwisamb ni muntu winou pakad kulabijok. Kalam wa ujindj ukumusadil kalam wa mudimu kopi wa fomu winou chakwel ijika yom yisangaredina chisak cha rudim kanang. Chifanidin kumusadil fomu winou ching anch muntu usangaredin chakin kamu.

6. Anch twatan muntu usangaredina pakwez ulondil rudim rindjing, chisend ik tukwikala nich?

⁶ Pakutwish pasut chisu kudiosh pa kwizwish fomu S-43 kushik ni pa kwezay mwin kulejan wija rudim rend. Chawiy lel, chakwel kukudish musangar wamekeshay, mwin kulejan wizwisha fomu S-43 ukutwish wadandamen nich kukudish kusanger djat ni pakezinay muntu wija rudim rend. Yisu yikwau, chitwishikin kwilej Bibil ni muntu usangaredina. Pakwez, pa chisu chinech, mutapu ik ukutwishay mwin kulejan kutan mikand ya rudim riner?

7. Ditenchik ik didiaku dia kutang mikand ya mu rudim rikwau rilondinau antu tukutwisha kutan?

⁷ Mikand ya mu Jindim Jikwau: Yikumangen yifanyidinap kwikal nich mikand yivud ya mu jindim jikwau. Pakwez, anch kalam wa mudimu waman anch kudi antu avud asangaredina pakwez alondil rudim rikwau, ukuman anch chifanyidin kwikal nich mikand kanang ya mu rudim riner chakwel in kulejan ayisadila. Anch kwikil mikand mu chikumangen ya mu rudim riner, chifanyidin kuyit. Pakutwish pasut chisu pakwel anch mikand ya mu rudim kanang yishika. Chawiy lel, kudi ditenchik dia kutwish kuchap mikand pa kapend ka Internet www.watchtower.org. Apatekin mikand yivud mu jindim jivud yikutwishay mwin kulejan ap muntu usangaredina kutan swa. Pakad kwidjidjek, ditenchik dined dikwikal dia ukwash nakash mulong wa kukudish kusanger kwa antu alondila rudim rindjing.

8. Chikumangen chikwet chisend ik pa mulong wa kukudish kusanger kwa antu alondila rudim rindjing?

⁸ Chisend cha Chikumangen: Pa yisu yimwing anch kuding chisak chijim cha antu alondila rudim rindjing, kukutwish kwaburen chikumangen chidia piswimp chisadilinga yikumangan mu rudim riner. Chawiy lel, chifanyidin kuyit antu asangaredina alondina rudim rindjing eza kukumangan ku yikumangan yen. Kuyak ni chirungul ni kuyisanger muntu ni muntu kukutwish kwayikasikesh kwez kukumangan nen chisu ni chisu. Pa kusambish, chaku chau ni rudim rau yikutwish yikal mudi yikangesh, pakwez, kwikiling yikangesh ku rukat rakin ra Ukristu mu chisak cha Atuman a Yehova a mu mangand mawonsu. (Sof. 3:9; Yoh. 13:35) Ov, wij kulond nawamp rudim rikwau? Anch wij ni usotil kuyendil antu alondila rudim riner, mwijikisha amboku kalam wa ujindj wa chikumangen chen chakwel niyend ijikisha biro wa mutiy. Chom chinech chikwikal cha ukwash nakash ku biro anch akimb mwin kulejan chakwel akudisha kusanger.

9. Chisu ik chifanyidina kusadil yany ya rudim piur pa in kulejan, ni mulong wak chiwapina kusal mwamu?

⁹ Yany ya Kusadil Piur pa Rudim: Anch uyikwashin antu alondila rudim rindjing, chidi chiwamp kuyikasikesh chakwel asambisha kukumangan ku yikumangan ya mu rudim rau anch akutwish kusal mwamu. Pakwez, anch chitwishikinap in kulejan amwing akutwish akwat mupak wa kwilej rudim rindjing chakwel atwisha kuyikwash antu asangaredina. Anch kwikil chikumangen piswimp chilondila rudim riner, pamwingap biro wa mutiy ukutwish walond anch, mulong wa kuvul kwa angendj ap in ngand, ayinkish kal mbil ya kusadil rudim kanang. Anch chidi mwamu, biro wa mutiy ukwijikish chikumangen chidia piswimp maswir minam ma chisak chilondila rudim rindjing. Antu asotina kwilej rudim riner afanyidin kwikal nich rutong ra kushemunikin ku chisak chinicha ap ku chikumangen chinicha mulong wa kukwash chingand cha rudim riner.

10. Chisu ik chifanyidina kusal chisak cha rudim ra wingendj, ni mutapu ik ukushikenanya ku kukwat mupak winou?

¹⁰ Kusal Chisak: Pakwel anch usalany chisak cha rudim kanang, chifanyidin kuwanyish yom yiney yijim yinying. (1) Kufanyidin kwikal antu avud asangaredina ni kumekana kwez kukul kwa chingand cha rudim rikwau. (2) Kufanyidin kwikalaku in kulejan amwing ija ap ilejina rudim riner. (3) Kufanyidin kwikalaku mukurump ap nkwash a mudimu chifuvu ukutakela chikumangan ap chimwing kusu mu rudim riner pa rubing. (4) Kufanyidin kwikalaku chisak cha amakurump chisotina kuchikwash chisak chinech. Anch yom yiney yiwanyidin mu chilik chiwamp, chad lel chisak cha amakurump chikufundin biro wa mutiy piur pa yom kanang ya pakampwil ya chisak chinech ni chikwit anch chikumangen kanang chijikana anch chawiy chikwashina chisak cha rudim ra wingendj. (Tal Atenchikinau, p. 106-107.) Mukurump ap nkwash a mudimu utakedina akumujimbul anch, “kalam wa chisak” ap anch “nkwash wa chisak” ukwet chisend cha kulam chisak.

11. Mulong wak chidia kwitapil dilau dia kukudish chingand cha rudim ra wingendj mu teritwar wetu?

¹¹ Kukudish chingand cha rudim ra wingendj mu teritwar wetu kudi chikunku cha usey cha mudimu wa kulejan pa mangand mawonsu wasambishay Chilakej chetu, Yesu Kristu. Tusalany nich mushiku chikunku chetu ni tumutalany Yehova mutapu ukunyikeshay michid chakwel adioshamu antu amusangareshina. (Hag. 2:7) Chidi cha musangar mudi ik kudi etu kusal nakash pa mulong winou! Yehova ayukisha usu wetu utusadina mulong wa kukudish chingand cha rudim ra wingendj mu teritwar wa chikumangen chetu ni kwijik anch chikalap nchik yikangesh ya jindim ja antu, Nzamb ukusal chakwel chikula!—1 Kor. 3:6-9.