Anch Mwin Chikumbu Ulondil Rudim Rindjing
1. Ov, mulong wak kudia kuswir kujim kwa kwovijan anch ukat kusadilany teritwar umwing?
1 Chisu ni chisu, in kulejan a Want mu mangand akat kuyitan antu asangaredina alondila rudim rindjing rishalijadina ni risadidinau mu chikumangen. Chakwel tuyikwasha antu inay muspiritu, mitiy yivud yamen kal anch chidi cha usey asala yirund ya jindim jikwau ni ap chikumangen. Chitwishikin mu mwab umwing alondamu jindim jivud, yikumangen yivud yisadidila jindim kushalijan jikutwish jalejan mu teritwar ndiy umwing. Ov, yikumangen yikusal nchik mu kwovijan chakwel kushinshikin anch mudimu wa kulejan usadikin nawamp?—1 Kor. 14:33.
2. Pitulejena ku chis ni chis, mutapu ik tufanyidina kwovijan ni chirund ap chikumangen yidia mu mwab wetu?
2 Kwovijan Kuwamp: Pitulejena mu mikombil ap pitulejena cha kukashimuk, mwin kulejan ukwet want ipend wa kwisambish ni muntu win usotilay, pamwing ni antu akutwisha kulond rudim rindjing, ni kumwinkish mikand ya rudim rikatinay muntu kutang. Pakwez, pituyila mu kulejan ku chikumbu ni chikumbu mu mwab mukatau kusadil yirund ap chikumangen chilondila rudim rindjing, mwin kulejan ufanyidin nakash nakash kwasin pa yikumbu ya antu alondilinga rudim ra chikumangen chikatay kuya mwin kulejan. Anch yikumangen kushalijan yilejen mu mwab wawiy umwing, chidi cha usey nakash kufund yom. Atulam a mudimu afanyidin kwisambin pamwing chisu ni chisu ni kutakel nawamp yom mu mutapu wa kwovijan. (Jinsw. 11:14) Pakwez, anch wamutanany muntu ulondila rudim rindjing piulejenanya ku chis ni chis ni kwikil chikumangen chisadidila rudim riner piswimp, mwin kulejan ufanyidin kusal usu wa kumulej uman ni kubangin mutapu wa kulondul kusanger.
3. Mutapu ik tufanyidina kusal anch twayitan in kulejan a mu chirund ap chikumangen chisadidila rudim rindjing akat kulejan mu teritwar mu tulejena?
3 Mudimu Udi Kwau Umwing: Mutapu ik ufanyidina kupwish yom anch chamekan anch in kulejan a mu chikumangen chikwau alejen pa dichuku diawiy dimwing mu mwab wawiy umwing? Chakin, rukat ra Ukristu rawiy rikupandakana rudim ap risu, ni awonsu afanyidin kutongin bil maswir ma teritwar. (Yoh. 13:34, 35) Chawiy lel, in kutal akez kushinshikin nawamp nich rukat pa kukwat mupak anch chirund chimwing chifanyidin chiyaku kwindjing mu kachisu.—Yak. 3:17, 18.
4. Uprofet ik uwanyidina ilel?
4 Bibil wasambela kulond anch antu a jindim jawonsu akez kutesh rusangu ruwamp. (Kubur. 14:6, 7) Chitwishikin kwipuk ruvundu ra chamwamu kusutil ku kusal pamwing kwa in kulejan ni chitwishikin kuyishiken antu avud nich rusangu ruwamp, pamwing ni in alondila rudim rindjing.—Efes 4:16.