Kwovijan Nawamp Mulong wa Kulejan mu Teritwar Mulondinau Mazu Mavud

Yisu yivud antu akat kwitiy uruu wa Want pakatau kuutesh akat kuulejan mu dizu diau dia chivadik. Pamwing ap chawiy chasala anch ku Pentekot wa muvu wa 33 C.C., Yehova warijeka mulong “in Yuda adiokala mu mangand mawonsu” atesha rusangu ruwamp ‘mu mazu mau ma chivadik,’ ap anch ading alondin dizu diading dilondinau kudi antu awonsu, mudi Hebereu ap Grek. (Mid 2:5, 8) Mu materitwar mulondinau mazu kushalijan nlel, yikumangen yisadina yikumangan mu mazu kushalijan yikutwish kwikal ni teritwar ndiy umwing. Mutapu ik ukutwishau in kulejan a mu yikumangen yiney kusal mu kwovijan mulong wa kupan uman kudi muntu mwawonsu ni kwipuk kushesh usu ap kuyijimeshish in yikumbu?

• 

  Kwambamb (Jnsw 15:22): Antakel a mudimu wa kulejan afanyidin kwambamb ni kutenchik program mulong wa kulejan rusangu ruwamp ukusangaresha yikumangen yawonsu. Anch teritwar wau ukepin, yikumangen yilejena mu mazu makwau yikutwish kukat anch chikumangen chen chimatika yikumbu ya antu alondina dizu dia teritwar wau. Pakwez, anch katwishinap kulejan mu teritwar wau mwawonsu mulong ujimbin ap ulepin nakash, akukat anch utalany yikumbu yawonsu ni kuyijikish anch muntu wa mu teritwar wau usangaredina uyakin. (od paj 93 par. 37) Ap akutwish kwit anch chikumangen chen chiyikwasha kutan antu alondina dizu dia chikumangen chau ni kuyitumin ma adres ma antu adia mu teritwar winou. (km 7/12 paj 5, kamushet) Ijik anch yisu yimwing, antu a mu chikumbu chimwing akutwish kulond mazu mavud. Kutenchik usadinanya mulong wa kulejan mu teritwar mwawonsu kufanyidin kukwatijan ni yijil yichidijina mutapu wa kusadin jinsangu ja an a ngand.

• 

  Kwovijan (Ef 4:16): Londul nawamp umutakel udiokila kudi ntakel wen wa mudimu wa kulejan. Ov, utakedin dilejan dia Bibil ni muntu ukatina dizu diakad kwikal dia chikumangen chen? Mwin kwilej ukuya kurutu nakash anch wamupan kudi mbay ney wa chikumangen ap chisak chilondina dizu diend.

• 

  Kwirijek (Jnsw 15:28; 16:1): Anch muntu utanijadina nend mu teritwar wey ulondin dizu dindj, sal yawonsu ukutwisha mulong wa kumulej rusangu ruwamp. Ukutwish kwirijek kusutin kutong kurutu piur pa mazu ukutwisha kutan mu teritwar ni kutambul kurutu mikand ya Bibil ni mavideo mu telefon ap mu tablet wey. Ukutwish kand kusadin application JW Language mulong wa kwilej mutapu wa kupan moy mu mazu mamwing.