Mutapu Ukata Kutukwol Uyakin
1 Dichuku dimwing, Yesu wayileja in Yuda amwitiyija anch: “Ukez kwijikany uyakin, chad uyakin ukez kukukwolany.” (Yohan 8:32) Ndiy wadinga ni kwisambin wan ipau upandakena wan ipau wa chamwamu wa antu, wan ipau utwishikina kud antu in awonsu—mpich ap kazwendj, mwin kwilej ap wakad kwilej. Yesu walejana uyakin wa kulet wan ipau wa kudiokal mu moj wa chitil ni rufu. Chidi mud mwalonday Yesu anch, “muntu mwawonsu ukata kusal chitil udi muswik wa chitil.” (Yohan 8:34) Chakin kamu tukat kuchingel nich impu yikash chisu chikezau antu awonsu aziyidila “kudiokal kand ayinau mu uswik wa yom yivundila, ni kwez ku kwikwol kwa uyaj wa an a Nzamb”!—Rom 8:21.
2 Uyakin piur pa Yesu ni ndond yend mu rutong ra mudimu wa Nzamb wawiy uletina wan ipau winou. Uyakin winou uwejidinaku kand ronganyin piur pa yakupesh ya difut yapanay mulong wetwetu. (Rom 3:24) Ap katat, kwitiyij ni kuziyil kwa kwikatin ku uyakin wa Baibel kukat kututwishish kusanger chilik kanang cha wan ipau ku wom, ku kuburen ruchingej, ni ku yisalijok yawonsu yiyimp.
3 Wan Ipau ku Wom ni ku Kuburen Ruchingej: Tukwetap kuswir kwa kuburen ruchingej piur pa mikadil ya mangand mulong twij diyingish dia kwikalaku kwa uyimp ni twij anch akuudiosh katat kamu ak pa divu. (Kus. 37:10, 11; 2 Tim. 3:1; Kuj. 12:12) Chikwau kand, uyakin utukwodil ku malejan ma makasu piur pa mwikadil wa afu. Twij anch afu kakutwishap kutusal nayimp, anch awiy kakatap kuman mar ma chikupu, ni twij kand anch Nzamb kakatap kuyijip antu chakwel anch aya akashakama nend pamwing mwi ndond ya muspiritu.—Mul. 9:5; Midimu 24:15.
4 Uyakin winou wamukwasha tatuku umwing ni maku kampand chisu chafay mwanau ku chak. “Tuburedin chom chimwing mu mwom wetu chom chakad kutwish kuman djat ni pitukeza kumuman kand kakwau mwanetu ikundj ku divumbuk,” mwamu mwalonday makwend. “Pakwez twij anch kusansan kwetu kudi kwau kwa kachisu kakemp.”
5 Wan Ipau ku Yisalijok Yiyimp: Uyakin wa Baibel ukutwish kukarumun yitongijok ya muntu ni untu wend, ni kulet wan ipau ku kwiyep ku milong. (Ef. 4:20-24) Kusadilang win-yakin ni mushiku kukutwish kukwash kupwish uzwendj. (Jinsw. 13:4) Kumekeshang kwipan kwa rukat kukat kuwapish urund ni antu akwau. (Kol. 3:13, 14) Kulimish umutu wa win Kristu kukat kukepish matat mu dijuku. (Ef. 5:33–6:1) Kwipuk kukwachik maar, masandj, kuna ruwand, ni yakuna ya kulewish kukat kukwash kwikal nich ukash wa mujimbu uwamp.—Jinsw. 7:21-23; 23:29, 30; 2 Kor. 7:1.
6 Nsand umwing katwishap mu mivu chidivu kulik chaku cha kuna yakuna ya kulewish. Dichuku dimwing ndiy wasankanijana ni nambaz umwing mwin kulejan padingay ni kupan uman mu balibal. Witiya kutambul mukand, ni ovijana chakwel kumwendil kwol kwend. Dilejan dia Baibel diasambisha. Kupwa kwa angond aad ikundj winou walika rawonsu kusadil yakuna ya kulewish, ni kupwa kwa angond chinan a kwilej, ndiy watambula dibatish. Pamumanau walik kal chaku cha kuna yakuna ya kulewish, chinech chayibachika yayend ni nkwedend ni yawiy kusambish kwilej Baibel.
7 Yikwasha Antu Akwau Kutan Wan Ipau: Antu asadila kal mivu yivud mu mwom wau mu uswik wa malejan ma makasu akutwish kuman anch chikasiken kutan wan ipau udiokila ku Dizu dia Nzamb. Kushik ku michim yau kwitining kwikasikesh kwa pakampwil ni kwirijek kuwamp ku mutambu wa mulej. (2 Tim. 4:2, 5) Chinech chidiap chisu cha kuziy mu mudimu wetu wa ‘kulejan rusangu ra kukwolik kud antu adia mu uswik.’ (Is. 61:1, NW) Wan ipau wa Ukristu udi wa usey nakash. Kuutan kurumburikin mwom wa chikupu.—1 Tim. 4:16.