Twimburijany Uwamp wa Yehova
1 Kupwa kwa kuman kuzwek kuwamp kwa muten ap kusanger yakudia yitadina, ov tudiap abachikinau kumujikitish Yehova, musul wa yom yawonsu yiwamp? Uwamp wend utubachikin kusot kumwimburij. (Kus. 119:66, 68; Ef. 5:1) Mutapu ik lel tukutwisha kumekesh ngikadil ya uwamp?
2 Pantaliken nau Antu Akad Ritiy: Njil yimwing tukutwisha kwimburijin uwamp wa Yehova yidi kusutil ku kumekesh kuyibangin kwa kashinsh antu akad kwikal akaritiy netu. (Gal. 6:10) Kumekesh uwamp mu mitapu yifanyina kusadil kukutwish kwikal nich chibudikin chiwamp pa mutapu ukatau kuyiman Atuman’a Yehova ni uruu tukata kuyitwadil.
3 Chilakej, padiay ni kuchingel ku rupital, mukadivar umwing nsand udia chibol washakama piswimp nend ipal mband wadinga umekena kwikal muyej nakash kupandakan ayej awonsu adingap. Chisu chend cha kumanijan nend dokter pichashika, ndiy wamushila mband ndond yend. Kupwa wamusankana kand, kapamp kakwau mu chiku, mband winou wasangara nakash pa kumuman. Ap anch kadingap ni kwitiyij rusangu ruwamp, walonda anch, katat nij chakin kamu anch Atuman’a Yehova ayikatin akwau antu. Chibol wasambisha kwilej nend Baibel.
4 Pantaliken nau Akadivar Netu: Tukat kwimburij kand uwamp wa Yehova pitukata kwipan ayinetu mu kuyikwash ambay netu mu ritiy. Mu yisu ya yinship ya mar, tuding pakach pa antu a kusambish kwez kuyikwash akadivar netu. Tukat kumekesh chitongijok chawiy chimwing pitukata kuyikwash antu aswiridina mutapu wa kuya ku yikumangan, kuyital ayilim, ni kutanduril rukat retu kud antu twakad kwijik nawamp adia mu chikumangen.—2 Kor. 6:11-13; Heb. 13:16.
5 Njil yikwau yikatay Yehova kumekeshin uwamp yidi ‘kwitenchik kwend mu kulikishilan.’ (Kus. 86:5) Mu kumwimburij, tukutwish kumekesh rukat retu ra uwamp kusutil kuyilikishin antu akwau. (Ef. 4:32) Chinech chikat kukwash kwikadish urund wetu nau ambay netu akaritiy wikala ‘uwamp ni wa musangar.’—Kus. 133:1-3.
6 Likany uvud wa uwamp wa Yehova utwizwisha sens nich kumushiman ni kwikal isumpodila nich musangar. Ni utubachika twikasikesha kwimburij uwamp wend mu yom yawonsu tusadila.—Kus. 145:7; Jer. 31:12, NW.