Mudimu Ukasikeshina
Uruu wa Baibel uyikasikeshin antu in awonsu akata kuwitiy ni kuusadil mu mwom wau. (Kus. 19:7, 8) Ukat kuyikwash kukwolik ku malejan ma makasu, ku yisal yiyimp ni kuyinkish ruchingej rakin ra kurutu. Pakwez, kadiap ching kusu antu atambwila rusangu ruwamp akata kutaninamu ukwash. Antu akata kuyilej akwau uyakin wa Baibel ukasikeshina akat kand niyawiy kuyikasikesh.—Jinsw. 11:25.
2 Akasikeshinau Kusutil ku Mudimu: Yesu walonda anch antu itiyijina kusend mpand ya kwikal in kwilej a Kristu, mudia kand mudimu wa kulejan ni kusal in kwilej, akez ‘kutan diswedish mulong wa mipim yau.’ (Mat. 11:29) Yesu amwinend wajingunina anch kupan uman kud antu akwau kukat kulet usu. Kwadinga mud yakudia yend. (Yohan 4:34) Payitumay in kwilej 70 kulejan, asangara pamanau ukwash wa Yehova pa usu wau.—Luka 10:17.
3 Chawiy chimwing nlel unou, in Kristu avud adi akasikeshinau kusutil ku kusadil kwau pamwing mu mudimu wa kulejan. Nambaz umwing walonda anch: “Mudimu ukat kwinkasikesh mulong utakedil mwom wam ni ukwet rutong. Milong yam ni yikokujol yam ya pichuku-pichuku yiding pa ndond ya kaad pinidia mu mudimu.” Mwilomb mukwau mwin mushiku walonda anch: “Mudimu . . . umwikadishin Yehova wa kashinsh kud am pichuku-pichuku ni wingikishin chisambu ni chilik cha musangar wa mu muchim wakad kutwish kutan mwi njil yikwau ap yimwing.” Didi dilau mud ik kwikal ‘in kusal mudimu nend Nzamb’!—1 Kor. 3:9.
4 Mpand ya Kristu Yiswapel: Payibachikinau in Kristu chakwel ‘kwikasikesh,’ Yesu kitinap yipandakenamu yitukutwisha kupan. (Luka 13:24) Chakin kamu, ndiy ututazukin nich rukat ‘kusend pamwing nend mpand yend.’ (Mat. 11:29, note) Antu afanyidina kurish nich mikadil yikash akutwish kuchingejin anch mudimu usadinau nich mupim wau wawonsu, wikalap nchik ukemp, umusangareshin Nzamb.—Marko 14:6-8; Kol. 3:23.
5 Chikasikeshin mud ik kumusadil Nzamb ukata kusanger chom chin chawonsu tusadila mulong wa dijin diend! (Heb. 6:10) Twikasikeshany chisu chawonsu kumwinkish chipandakenamu kuwap kwetu.