Mudimu Usadinau ku Usu wa Nzamb
1 Pakach pa atushalapol a Nzamb nlel, adi akemp ilejina shikol yijim, adia ampich, ap akweta ntumb mu ditenchik dia katat dia yom. Pa chinech, antu amwing akat kudiurol mudimu wetu anch udi kwau wa chamwamu. (Isa. 53:3) Pakwez, mudimu tusadina wa kufundish Baibel mu mangand uletin dikasikesh ni ruchingej kud tutikit twa antu mu mangand. Ov, mutapu ik antu a chamwamu muwanyishinau yom yiney? Chidi kusu ku usu wa Nzamb. (Mat. 28:19, 20; Midimu 1:8) Mupostol Paul warumburila anch “Nzamb watonda yom ya mangand yisupila, chakwel akwatish nich yom yikweta usu usany.”—1 Kor. 1:26-29.
2 Apostol ni Akristu akwau a mu chitot cha mivu ya kusambish ading kwau “antu amwamu akad kwilej.” (Midimu 4:13) Chikalap nchik mwamu, awiy adandamena kulejan rusangu ruwamp nich mushiku, ni Yehova wayukisha usu wau. Yikalap nchik yikangesh ni rupompat, “dizu dia Nzamb diapalangana pakach pa antu nich usu.” Kwadingap chom chela kwimik mudimu mulong wasadika ku usu wa Nzamb. (Mid. 5:38, 39; 19:20) Chidi kand chilik chimwing mu chirung cha katat. Kwikil ap rupompat ra anyikel akweta dikand rikutwisha kwimik kuya kurutu ni kupalangan kwa rusangu ruwamp. —Isa. 54:17.
3 Ntumb Yawonsu Yidi ya Nzamb: Ov, kwikal kwetu atushalapol a Nzamb kutwinkishin diyingish dia kwitutul ayinetu? Bwat kamu. Pisambinay Paul mudimu wa Ukristu, ndiy wafunda anch: “Tukwet chipau chinech cha usey ukash mu jimpas ja pansh, chakwel amana kujimb kwa usu mwamu ou udiokil kudi Nzamb, kiudiokilip kudi etu.” (2 Kor. 4:7) Paul wijika anch watwisha kusal mudimu wend kusutil ku usu udiokila kud Nzamb.—Ef. 6:19, 20; Filp. 4:13.
4 Chawiy niyetu twij anch chidi mulong tukwet ‘ukwash wa Nzamb,’ chawiy tuwanyishina mudimu wa kulejan. (Midimu 26:22) Kusutin ku kulejan mu mangand mawonsu, Yehova ukat kutusadil mu mutapu ujim chakwel kutwal chidjimin kud akamichid —chijingidij cha dirumburish dia kusheshik didia piswimp ap. (Hag. 2:7) Ntumb mud ik tukweta ya kwikal “in mudimu nend Nzamb” mu kwangul kujim kwa muspiritu! —1 Kor. 3:6-9.