Kukumangan Pakad Kujing—Kudi kwa Usey
1 Majuku ma in Kristu mamen nich usey kukumangan pakad kujing. Pakwez yom yitina mwom nlel yikutwish yalet yikokujol. Ov, yisend ya dijuku, kusal mudimu, ap mudimu wa shikol yikutwish kusambish kusend chisu utenchikina mulong wa difukwil dia Yehova? Kuman yom mud muyimenay Yehova kukutukwash kulam yom tumena kwikal ya usey.— 1 Sam. 24:6; 26:11.
2 Payay ni kuchay nkuny dichuku dia Sabat, ikundj umwing mwin Isarel wakanganya ku rukat rend kushinshikin chitong cha Yehova. Pamwing ap watonga anch wasala mwamu mulong wa dijuku diend ap anch kading kwau kamulong kakemp. Pakwez, kusutil ku dirumburish diasadika, Yehova wamekesha anch kusal midimu ya ku mujimbu mu yisu yitondinau mulong wa kwifukwil udi mulong ujim nakash.— Kuch. 15:32-36.
3 Kurish Nich Chikangesh: Kud antu avud jidi njit jikatau kurish chakwel mudimu wau kangal upwitijan nich yisu ya kukumangan. Amwing apandakana chikangesh chinech ku kwisamb nau amakurump au a mudimu, ku kwovijan kuswimp yisu nau ambay nau a mudimu, kukimb mudimu uwanyidina, ap kupipesh mulad wa mwom wau. Chakin kamu, kwipan kwinoku mu yisakin ya difukwil diakin kukat kumusangarish Nzamb. —Heb. 13:16.
4 Mudimu wa shikol ukutwish ni wawiy kwikal mulong ukash. Changadim umwing walonda anch: “Nikat kusal mudimu wa shikol kurutu kwa yikumangan ni yikushalaku pinikuchirika ku chikumbu.” Anch midimu yiyinkishinau ansand a shikol kayiwanyishinap urel wa yikumangan, anvaj amwing ayirumburila alej anch kukumangan ku yikumangan ya Ukristu kudi kwa usey mu dijuku diau.
5 Kwovijan ni kutenchik kuwamp yidi mitapu ya kusal midimu ya dijuku mu kwirijek mulong wa kukumangan ku yikumangan mud dijuku pa chisu. (Jinsw. 20:18) An akemp akutwish kuyifundish kudjal ni kwirijek mulong wa kuya ku chikumangan pa chisu chifanyidina. Ku chilikej chau, anvaj akutwish kuyikasikeshin anau usey wa yikumangan.— Jinsw. 20:7
6 Mutapu yiyila yikokujol ya ditenchik dia yom ni kuvulijan, chidi cha usey anch tukumangana pakad kujing ku yikumangan ya chikumangen. Tudandamenany kuman yom mud muyimenay Yehova ni kusal kukumangan pakad kujing ku yikumangan kwikal kwa usey. —Heb. 10:24, 25.