Katat Chawiy Chisu cha Kulejan!

1. Ov, mulong wak katat chawiy chisu cha kulejan?

¹ “Mwovany Nzamb wom, umwinkany uyaj.” Mwishin mwa umutakel wa mwangel, uruu winou aulejen ku “michid yawonsu, ni majuku, ni jindjim ni antu.” Ov, mulong wak? ‘Mulong muten wa dirumburish diend [Nzamb] wez kal.’ Nlel, tushich ‘pa muten wa dirumburish,’ muten utwadila ku disheshik dia ditenchik dined dia yom. Chidi cha usey anch antu ‘amwifukwila Ndiy watanga diur ni divu ni karung, ni misul ya mem.’ Kwikil mudimu ukwau usadilau nlel ukutwisha kwisikan mu usey ap mu kuswakej ni mudimu wa kulejan “rusangu ruwamp ra chikupu.” Inge, katat chawiy chisu cha kulejan!​—⁠Kuj. 14:​6, 7.

2. Mutapu ik umekeshinau atushalapol a Yehova anch amen kuswapej kwa chirung tushicha?

² Mu chintampu cha mivu dikum ya kwinyim ey, atushalapol a Yehova asadil piswimp asaa amiliyar 12 mu mudimu wa kulejan Want ni wa kwikadish in kwilej. Avud atenchikin mutapu wau wa kushakam chakwel kusal chisu chivud mu mudimu wa kwangul kwa muspiritu. (Mat. 9:​37, 38) Chilakej, muvu wadiap ou, in kulejan piswimp 850 000 asadil ngond ni ngond mud ayibol. Kud ayibol a rawonsu, chinech chitin kusal piswimp asaa 70 ngond ni ngond mu mudimu wa kulejan. Kud ayibol ankwash, ayitin asaa 50.

3. Yitenchik ik yiswiridinau kusal in kulejan chakwel kwikal ayibol?

³ Yitinau Chakwel Kwikal Chibol: Chijau anch “kwashal kal chisu chiswimp,” ayibol akat kwikasikesh kulam mwom wau uswapela. (1 Kor. 7:​29, 31) Akimbining mitapu ya kukepish nfalang ja kusadil chakwel atwisha kwikal nich chisu chikemp cha kusal mudimu wa ku mujimbu. Chilakej, amwing asokidin kal mu tuyikumbu tukemp. Akwau niyawiy adioshin kal yom yakad usey ya ku mujimbu. (Mat. 6:​19-21) Chisu chivud, afanyidin kand kukepish kukimbijol kwa muntu ipend. Yawonsu yiney akat kuyisal nich rutong ra kusal chisu chivud ni kuta muchim nakash ku mudimu wa kulejan. (Efe. 5:​15, 16) Nich kujijaman, spiritu wa kwipan ni kumuchingejin Yehova mu malembil, in kulejan avud atwishin kutenchik program umwing uyikwashina kwikal ayibol.

4. Nzau ik jifanyidina kukukwash kwirijek nich rutong ra kwikal chibol?

⁴ Ov, ukutwish kwikal chibol? Ov, mulong wak kulik kuyipulap ayibol mutapu utwishinau kusal mudimu wau? Sal nau pamwing mu mudimu wa chingand, ni kuman musangar ukwetau. Shinshikin jinsangu piur pa mudimu wa uchibol jabudishau kal mu mikand yetu. Itekinap ntong jifanyidina jikutwisha kukukwash kusambish mudimu wa uchibol. Anch kudi yikangesh yikukangeshina katat kusadil mud chibol, mulejay Yehova mu malembil, ni kumwit ukwash wa kuyipandakan.​—⁠Jinsw. 16:⁠3.

5. Mudimu wa uchibol utukwashin nchik kuwapish ukaliweny wetu mu mudimu?

⁵ Yiyukish ni Misangar: Kusal mudimu wa uchibol kukat kuwapish ukaliweny wetu wa kusadil Dizu dia Nzamb, chom chikata kutuletin musangar uvud. Nambaz changadim umwing chibol walonda anch: “Kutwish kurumburil kamu zenzal Dizu dia Nzamb dia uyakin udi ukwash wa kashinsh. Piusadina mudimu wa uchibol, ukat kusadil Bibil chisu chivud nakash. Katat pinikata kuya mu mudimu wa ku chis ni chis, nikutwish kutongin mifund yimufanyidina muntu ni muntu ni kwisamb nend.”​—⁠2 Tim. 2:⁠15.

6. Mudimu wa uchibol upanining diyiy ik?

⁶ Kusal mudimu wa uchibol kufundishining kand ukaliweny uvud ukweta usey mu mwom. Kukutwish kuyikwash ansand kwilej mutapu wa kusadil chisu nich manangu, mutapu wa kusadil nfalang, ni mutapu wa kushakam nau antu. Avud akudishining chitongijok cha muspiritu piur pa mwom mulong wa mudimu wa uchibol. (Efe. 4:13) Chikwau kand, ayibol itapidiling chisu chivud dilau dia kuman mutapu ukatay kuyikwash Yehova ni kuyinkish yiyukish yivud.​—⁠Midimu 11:21; Filp. 4:​11-13.

7. Mudimu wa uchibol utukwashin nchik kumushejin Yehova piswimp?

⁷ Pamwing ap chimwing cha yiyukish yijim ya mudimu wa uchibol chidi anch mudimu winou utukwashin kumushejin Yehova. Chinech chikutwish kutukwash mu yoziu. Nambaz umwing wajijaman ku mar makash mu chirung kanang walonda anch: “Urund wa piswimp nakudisha nend Yehova kusutil ku mudimu wa uchibol wankwasha kujijaman ku mar mawonsu nadinga nich.” Ndiy wawejaku anch: “Nikwet musangar nakash anch nasutisha mwom wam wa ukurump mu kumusadil Yehova chisu chawonsu. Chantwishisha kwipan amwinam mu mitapu yimwing yinakad am kutwish kutongin anch nela kutwish.” (Midimu 20:35) Chilik chimwing kand niyetu el twimenap yiyukish yipitishina pitusadina yawonsu tukutwisha mu mudimu winou upandakena usey wa kulejan.​—⁠Jinsw. 10:⁠22.