Tutakelany Malejan ma Bibil Mayila Kurutu

LAM

Chikunku 1:Dilejan dia Bibil

Chom Ik? Anch ukat kwisamb chisu chawonsu mutapu ufanyidina piur pa Bibil, yikalap nchik yiswimp, nich kusadil Bibil ap pamwing ni umwing wa mikand yitinau kusadil, ukat kutakel dilejan dia Bibil. Ukutwish kufund rapor wa dilejan anch waditakedin tupamp twaad kupwa kwa kumekesh mutapu wa kwilej ni anch kudi diyingish dimekeshina anch dilejan dikudandamen.​—⁠km 7/04 p. 1.

Mikand Yifanyidina Kusadil

◼ Nzamb Witin Etu Tusal Ik?

◼ Ronganyin Ritwadila ku Mwom wa Chikupu

◼ Mwifukwila Nzamb Umwing Kusu Wakin

◼ Ukutwish Kwikal Murund Nend Nzamb! akutwish kumusadil mulong wa kwilej nau antu ileja pakemp ap akad kwijik kutang nawamp.

Chikunku 2:Kwirijek Mulong wa Kutakel Dilejan

Tuswiridin kulejan rusangu mu mutapu wa kushik ku muchim wa mwin kwilej. Chinech chitin kwirijek nawamp ni kutongijokin nakash maswir ma mwin kwilej.​—⁠km 8/04 p. 1.

Mutapu wa Kwirijek

◼ Shinshikin mutu wa mulong, tumitu twa milong ni yifwatul ya mwimbu ap dilejan.

◼ Jingunin yakul ku yipul yifundinau, tek yijingidij pa mazu ni pa jintung ja usey.

◼ Tond mifund ya kutang pa chisu cha dilejan. Fund mazu miswimp ku kabet ka dipaper dia mukand wilejinany.

◼ Rijek dichirikin diswimp dia manans majim.

Ambatanish Dilejan ni Muntu ni Muntu

◼ Lembil kud Yehova mulong wa mwin kwilej ni maswir mend.

◼ Sambel kutongin manans makutwisha kumukasiken mwin kwilej kutesh kurumburik ap kwitiy.

◼ Shinshikin: Yom ik yiswiridinay kutesh ap kusal mulong aya kurutu muspiritu? Ov, mutapu ik nikutwisha kumushik ku muchim?

◼ Anch chiswiridikin, rijek chilakej, chirumburil, ap yipul kushalijan mulong wa kumukwash mwin kwilej kwov kurumburik kwa dinans kampand ap kwa mufund kanang.

Chikunku 3:Kusadil Mifund Nawamp

Rutong retu mu kutakel malejan ma Bibil ridi ra ‘kwikadish in kwilej’ kusutil ku kuyikwash antu kwov kurumburik ni kwitiy mafundish ma Dizu dia Nzamb ni kumasadil mu mwom wau. (Mat. 28:​19, 20; 1 Tes. 2:13) Pa chinech, dilejan difanyidin kwimen pa Mifund.​—⁠km 11/04 p. 4.

Fundish Dizu dia Nzamb

◼ Muleja mwin kwilej mutapu wa kuman mikand kanang mu Bibil wend.

◼ Kimb ni kwisambin mikand ya Bibil yilejena dishin dia yitiyij yetu.

◼ Sadil yipul. Pa ndond pa kumurumburil mwin kwilej mifund ya Bibil, mwela ndiy akurumburilay.

◼ Yipipesha. Kangal wapakish kurumburil yom yawonsu ya mufund wa Bibil. Rumburil kusu yom yiswiridikina mulong wa kwovikesh nawamp dinans.

◼ Yisadila nawamp. Mukwasha mwin kwilej kuman mutapu mifund ya Bibil yimutadila ndiy pakampwil.

Chikunku 4:Kuyifumb in Kwilej Kwirijek

Mwin kwilej ukata kutang dilejan kurutu, kutek kashony pa yakul, ni kutong mutapu wa kwakul mu mazu mend amwinend ukat kupam muspiritu swa. Chawiy lel, pakusambisha kamu dilejan kapamp ka kusambish, rijekany dilejan pamwing mulong wa kumulej mwin kwilej mutapu wa kurijek. Nau in kwilej avud, chikwikal cha ukwash kurijek shapitre wa kabuj ap dilejan diawonsu pamwing.​—⁠km 12/04 p. 1. 

Tushony ni Yijingidij

◼ Rumburil mutapu wa kutan kapamp kamwing yakul ku yipul yifundinau.

◼ Muleja mwin kwilej kopi wey wa buku wa kwilej mu watekina kal tushony pa mazu majim ap jintung.

◼ Mukwasha mwin kwilej chakwel amana anch mufund ni mufund ujimbwilau ukasikeshidin dinans kanang mu paragraf, ni muleja mutapu wa kutek yijingidij yiswimp kuns kwa dipaper dia buku wend wa kwilej.

Kushinshikin ni Kuchirikin

◼ Muleja mwin kwilej mutapu wa kushinshikin mutu wa mulong wa shapitre ap wa dilejan, tumitu twa milong, ni yipich kurutu kwa kusambish kwirijek.

◼ Mukasikesha mwin kwilej kuchirikin manans majim kupwa kwa kwirijek.

Chikunku 5: Kwijik Uvud wa Yom ya Kwilej

Uvud wa yom ya kwilej ukutwishau kushinshikin ukwimen pa ukaliweny ni mikadil ya mulej ni ya mwin kwilej.​—⁠km 1/05 p. 1.

Tung Ritiy Rikash

◼ Ipuk kusutang mau-mau mu chilik cha kumukangesh mwin kwilej kutesh Dizu dia Nzamb.

◼ Itekina chisu chifanyidina chakwel kumukwash mwin kwilej kwov kurumburik ni kwitiyij yilejinay mu Dizu dia Nzamb.

◼ Itekinaku chisu chiwanyidina cha kushinshikin maverse ma usey masadila mufulandal wa malejan.

Imen pa Mutu wa Mulong wa Dilejan

◼ Anch mwin kwilej usotil kulond chisu chilemp milong yend ya pakampwil, ukutwish kwirijek kuyisambin kupwa kwa dilejan.

◼ Kangal kulond yivud nakash pa chisu cha dilejan. Kangal wisambin nakash manans makwau ap yiwamana mu chilik cha kumukangesh mwin kwilej kwak ronganyin rakin ra mafundish ma Bibil ma dishin.

Chikunku 6: Chisu chipwilay Mwin Kwilej Chipul

Anch kamu dilejan dia Bibil diashakam nawamp, chiding yisu yivud chipandikena kuwap kushinshikin mafundish ma Bibil mu mutapu umalondulijadina nawamp pa ndond pa kumatik mutu wa mulong ni kuya ku mutu wa mulong ukwau. Chinech chikat kumukwash mwin kwilej kutung mufulandal wa ronganyin rakin ni kuya kurutu muspiritu.​—⁠km 2/05 p. 6.

Ikal Mwin Kujingunin

◼ Yipul yambatena nich dilejan ushinshikidinany, ukutwish kuyakul kapamp kamwing.

◼ Yipul yakad kwambatan nich yiwilejinany ap yitina kukimbijol ukutwishany kuyishinshikin pa chisu chikwau. Chikutwish kwikal cha ukwash kufund yipul mud yiney.

◼ Anch chimukasikedin mwin kwilej kwitiy mafundish kanang, shinshikinany malejan makwau misambidina mutapu ukurukina mutu wa mulong.

◼ Anch mwin kwilej kitiyijinap, utula mutu wa mulong winau pansh chakwel kuwisambin chisu chikwau ni dandamenany nich dilejan.

Ikal Mwin Kwikepish

◼ Anch wijap nawamp chakul ku chipul kanang, ipuk kupan chakul.

◼ Muleja pakemp-pakemp mwin kwilej mutapu wa kukimb yakul.

Chikunku 7:Kulembil pa Chisu cha Dilejan

Chakwel anch in kwilej Bibil aya kurutu muspiritu, chidi cha usey kwit chiyukish cha Yehova. Chawiy lel, chidi chifanyidina kamu kusambish ni kupwish dilejan nich malembil.​—⁠km 3/05 p. 4.

Mutapu wa Kusambish Nich Malembil

◼ Tukutwish kulembil kamu kapamp ka kusambish ka dilejan nau antu ipanina nakash kud Nzamb.

◼ Nau in kwilej akwau, tuswiridin kujingunin chisu chifanyidina cha kusambish nich malembil.

◼ Ukutwish kusadil Kuseng 25:​4, 5 ni 1 Yohan 5:14 chakwel kurumburil mulong wak tufanyidina kulembil.

◼ Ukutwish kusadil Yohan 15:16 chakwel kumekesh anch tufanyidin kulembil kud Yehova kusutil kud Yesu Kristu.

Yifanyidina Kwikal mu Malembil

◼ Chifanyidin kumushiman Yehova mud Musul wa mafundish.

◼ Mekesh kusanger kwa kashinsh mudiay mwin kwilej.

◼ Mekesh kujikitish mulong wa dirijek disadidilay Yehova.

◼ It chiyukish cha Yehova mulong wa usu usadilay mwin kwilej chakwel kusadil yom yilejinay.

Chikunku 8: Kuyitwal in Kwilej ku Dirijek

Rutong retu mu kutakel malejan ma Bibil ridiap kusu ra kulejan jinsangu jitadila mafundish pakwez ridi kand ra kuyikwash antu twilejina nau kwikal yid ya chikumangen cha Ukristu. Itekinap aminit akemp rubing ni rubing pa chisu cha dilejan mulong wa kwisambin dinans dimwing piur pa dirijek dia Yehova.​—⁠km 4/05 p. 8.

Yikumangan ya Chikumangen

◼ Rumburil chikumangan chimwing ku chimwing. Kudiosh kamu pa dilejan dia kusambish, yita kwez kukumangan.

◼ Isambina manans majim misambidinau ku yikumangan.

◼ Kudish kusanger mulong wa Chivurikish, yitentam, ni mulong wa kwez kwa kalam wa munyimuku.

◼ Sadil yipich yidia mu mikand yetu mulong wa kuyikwash kuman yom yisadikina.

◼ Yikasikesha kutang broshir Les Témoins de Jéhovah : Qui sont-ils ? Quelles sont leurs croyances ?

Sadil Mavideo Chakwel Kukudish Kujikitish

◼ Les Témoins de Jéhovah : un nom, une organisation

◼ Toute la communauté des frères

◼ Unis grâce à l’enseignement divin

◼ Jusqu’aux extrémités de la terre

Chikunku 9: Kuyirijek in Kwilej Kupan Uman wa Kukashimwish

Pasambishinau in kwilej Bibil kutek ritiy mu yom yilejinau, ayikasikeshin kulond piur pa yom yilejinau​—⁠km 5/05 p. 1.

Yikasikesha Kupan Uman

◼ Ov, kudi arund ap yid ya dijuku akutwishau kutazuk kwibomb nau ku dilejan?

◼ Ov, kudi ambay a mudimu, a shikol ap antu akwau a chijiken amakeshina kusanger?

Yijidisha Kulond ya Yitiyij Yau

◼ Pa manans ma kutond pa chisu cha dilejan, mwipula mwin kwilej anch, “Mutapu ik ukutwisha kusadil Bibil mulong wa kurumburil uyakin winou mu dijuku diey?”

◼ Mukwasha kwov maswir ma kusadil kujingunin ni kwikal wilimishina ni mwin masip chisu chilondilay nau akwau piur pa Nzamb ni ntong jend.

◼ In kwilej akutwish kusadil broshir Les Témoins de Jéhovah : Qui sont-ils ? Quelles sont leurs croyances ? mulong wa kuyikwash arund nau ni yid ya dijuku diau kutesh yitiyij yetu yimedina pa Bibil ni mijikit yetu.

Chikunku 10: Tuyijidishany in Kwilej mu Mudimu wa ku Chikumbu ni Chikumbu

Chisu chikujinguninau amakurump anch mwin kwilej wa Bibil uwanyidin kwikal mwin kulejan wakad kubabatishiu, ndiy ukutwish kusambish kubombakan ni chikumangen mu mudimu wa patok wa kulejan.​—⁠km 6/05 p. 1.

Kwirijek Pamwing

◼ Muleja mwin kwilej kwisu kukutwishay kutan mazu ma kusambish nich minsamb.

◼ Mukwasha kutond muzu maswapela madia ma ukwash mulong wa teritwar wen.

◼ Mukasikesha kusadil Bibil mu mudimu wend.

◼ Chirikinany en awonsu pamwing. Muleja mutapu wa kwakul nich nkeu.

Kulejan Pamwing

◼ Mulika mwin kwilej ashinshikina piusadidila minsamb warijekangany pamwing.

◼ Shinshikin untu ni ukaliweny wa mwin kwilej. Yisu yimwing, chikutwish kwikal chiwamp nakash kud mwin kulejan musu kusadil kusu chikunku cha minsamb.

◼ Mukwasha mwin kulejan musu kutek program wakad kujing mulong wa kwipan mu mudimu.

Chikunku 11: Kuyikwash in Kwilej Kusal Kuchirikinamu Kusu

Kwirijek mulong wa kuchirikinamu kusu kukat kusambish pa kumanijan kwa kusambish. Mukasikesha mwin kwilej kwikal mwin kuyisanger kwa kashinsh antu alondishinay. Mwijidisha mwin kwilej pakemp-pakemp kuyit in chikumbu kulond yitonginau, kutesh yirumburil yau, ni kushinshik yom yiyikwatina awiy.​—⁠km 7/05 p. 1.

Kwirijek Chakwel Kuchirikinamu

◼ Chirikin kumanijan kwa kusambish, ni mukwasha mwin kwilej kutond mutu wa mulong ukeza kumusangaresh mwin chikumbu.

◼ Rijekany pamwing minsamb yiswimp yikusadila mufund umwing wa Bibil pamwing ni pagraf umwing mu buku.

◼ Rijekany chipul cha kwipul kwisudiel kwa mambamb.

Kulondul Kusanger Nich Mushiku

◼ Mukasikesha mwin kwilej kuyichirikin awonsu amekeshina kusanger swa-swa.

◼ Mukwasha mwin kwilej kuman maswir ma kudandamen mu kupakish kuyitan antu akasikena kutan ku chikumbu.

◼ Mufundisha mwin kwilej mutapu wa kwovijan mulong wa kuchirik kand, ni kumukwash kwov kurumburik kwa usey wa kuchirik mud mwakanangay.

Chikunku 12: Kuyikwash in Kwilej Kusambish ni Kutakel Malejan ma Bibil

Kumwimburij kwey Yesu kusutil ku kupan chilakej chifanyidina mu mudimu wey wa kulejan kudi kwa usey nakash. Muntu wilejina nend pamenay chilakej chiwamp mu mudimu, ndiy ukez kutesh kamu anch rutong ra kusal kuchirikinamu kusu ridi ra kusambish malejan ma Bibil.​—⁠km 8/05 p. 1.

Kusambish Dilejan dia Bibil

◼ Murumburila mwin kwilej anch chidiap cha usey chisu chawonsu kurumburil mutapu ukata kusadik dilejan ni mu tuyom tukemp-tukemp.

◼ Chisu chivud chiding kwau chiwamp nakash kulejan mutapu wa kutakel dilejan nich kusadil paragraf umwing ap maad mu mukand wa kwilej.

◼ Chirikinany ni kusutirik mu chimwing cha yiyul ya kusambish nich Malejan ma Bibil.​—⁠km 8/05 p. 8; km 1/02 p. 6.

Yifundisha in Kwilej Kwikal Alej

◼ Yikasikesha in kwilej kufundishish majin ku Shikol ya Mudimu wa Uteokras.

◼ Tenchik chakwel anch in kulejan asu akubachikija ku malejan makwau ma Bibil kukutwishau niyawiy kufundish ap pakemp.

[Caption on page 1]

Wenjil winou udi kukung pamwing kwa manans majim ma mitu ya milong yilondulijadina piur pa kutakel malejan ma Bibil mayila kurutu yabudikina mu Mudimu Wetu wa Want. Tuyikasikeshin awonsu kulam wenjil winou ni kumushinshikin chisu tutakedila malejan ma Bibil. Chikwau kand, manans ma wenjil winou akutwish kumisambin pa chisu cha yikumangan ya mudimu wa chingand, ni atulam a mudimu akutwish kumasadil mud dishin dia madiskur mau makatau kusal chisu cha kwendil yirund ya dilejan dia buku.