“Anlondul Lel”
1 Antu avud imedin pa mwom wakwisangaresh ayinau, pakwez kakwetap musangar. Chinyim ni chinech, Yesu walejana mutapu wa kupan ukata kulet musangar wakin. (Midimu 20:35) Walond anch: “Anch muntu wel anch anlondul panyim pam, ilika bil amwinend, . . . anlondul lel.” (Marko 8:34) Chinech chitin yivud kupandikanamu kulik misangar yimwing ya chisu ni chisu. Chirumburikin kushakam dichuku ni dichuku, chidiap mulong wa kwisangaresh ayinetu, pakwez mulong wa kumusangaresh Yehova.—Rom 14:8; 15:3.
2 Tushinshikinany chilakej cha kambuy Paul. Paul walika yisakin yend ni kwipan amwinend chakwel kutwal yisakin ya Want kurutu “mulong wa kumwijik Kristu Yesu Nsalejam kwapandikana yawonsu kuwap.” (Filp. 3:7, 8) Ulondil kand anch: “Am nikez kasangar kushesh yom yam ni kwishesh” mulong wa kuyisadil akwetu. (2 Kor. 12:15) Muntu ni muntu pakach petu ufanyidin kwiyipul anch: ‘Mutapu ik nikata kusadil chisu cham, usu wam, ukaliweny wam, ni mapit mam? Ov, nikat kutongin pa kuwejin yisakin yam amwinam bil anch nikat kukimb kumusangaresh Yehova?’
3 Mitapu ya Kupan: Muvu ni muvu, antu a Nzamb akat kusutish tutikit twa asa mu mudimu wa kulejan Want chakwel kupandish mwom wa antu. Mu chikumangen, ansand nau amakurump akat kusal midimu kushalijan mulong wa kukwash antu akwau. Kudi kand midimu yikata kusadik mulong wa yitentam ya pakampwil, ya munyimuku, ni ya distrik ni kusadil kand mu mudimu wa rutung ni kurijek yikumbu yisadidilau mulong wa kutwal yisakin ya difukwil diakin kurutu. Ni vurik ukwash wa rukat upaninau akadivar akata kusadil mu Komite wa Ukwash ku Milong ya Rupital ni Yirund ya Kutal Ayej (groupe de visites aux malades). Yisal yiney yawonsu ya usu wa kwipan yidi chiyukish ku chisak cha ukadivar wetu wa Ukristu!—Kus. 110:3.
4 Tukwet mitapu ya kwipan ayinetu mu jinjil kushalijan chisu kukata kushiken yak yikash ya chitangil ap chisu chitina ukwash wa swa. Chawiy lel, chisu chivud, tukutwish kamu kujingunin anch ambay netu in Kristu aswiridin ukwash ni dikasikesh. (Jinsw. 17:17) Tukat kwimburij chilakej cha Yesu, chisu twipanina nakash ayinetu chakwel kuyikwash akwetu ni kutwal yisakin ya Want kurutu. (Filp. 2:5-8) Tudandamenany amboku kwikasikesh mu kusal mwamu.