Yakul Ku Yipul Yen

◼ Ov, chiwapin kurijek chikumbu mulong wa kulandish yom ap mijikit yikwau ya kuvudish nfalang chakwel kukwash chikumangen?

Yirijek ya marelijon yikweting chaku cha kutek nfalang mu mijikit ya kuvudish nfalang, mudi misambu, kulandish yom ap masengan. Ap anch antu amwing akutwish kutong anch chiwapin kusal mwamu, mijikit yiney yidi mitapu ya kwit milambu. Atuman a Yehova kakutambulangap ukwash wa nfalang mu mutapu winou.

Piur pa kulik kwetu kwimburij ma egliz ni kwit nfalang, nimero wa kaad wa Chinong Cha Kalam cha Kafumpul 1879, (Inglish) ulondin anch: “Tukat kwitiyij anch YEHOVA udi nkwash wa ‘Phare de la Tour de Sion,’ ni anch chidi mwamu tukutwishap kwilemb ap kwit ukwash wa antu. Yehova amwinend ulondin anch: ‘Utad wa argent ni utad wa or wawonsu wa mikandu udi wamam,’ anch walik kukwash nfalang jiswiridinau, tukez kwijik anch chawiy chisu cha kwimik kupalangesh mikand.”

Tukat kudandamen kulondul chijidik cha Bibil chilondin anch: “Muntu ni muntu asala mudi mwalonday mu muchim wend; kangal wapan ni ushon mu muchim wey wakad kufanyin; mulong Nzamb ukatil mwin kupan ukat kupan ni musangar.” (2 Kor. 9:⁠7) Mishet ya milambu yidi mu Chot Cha Want chakwel muntu ni muntu ateka milambu ya kwisotin anch asot. (2 Ant 12:⁠9) Milambu yidiap ya kwit; ap ya kupan nich chitongijok cha kutaninamu.