“Mulondulany Kristu!” Chitentam cha Distrik cha 2007 cha Atuman a Yehova
1, 2. (a) Ov, mutapu ik wayikasikeshay Moses in Isarel chakwel atana ukwash mu kukumangan pamwing? (b) Yirijek ik tuswiridina kusambish kusal katat kamu?
1 Moses wayinkisha in Isarel ni angez awonsu mbil ya kukumangan pamwing pa mivu yawonsu sambwad sambwad mulong wa kuyitangin Chijil. Ov, mulong wak? “Chakwel niyau atesha, [ileja].” (Kuv. 31:10-12) Yehova wamana usey wa kuyikumangej antu end mu yisak yijim yijim. Machuku madia piswimp kamu ap, antu a Yehova akez kukumangan kand mu machuku masatu, ku Chitentam cha Distrik “Mulondulany Kristu!”
2 Ov, wasambishin kal kwirijek? Ov, uswiridin kwit konje kudi mukurump wey wa mudimu? Ov, ukutwish kuyikwash antu wilejina nau Bibil ap yid ya dijuku kukumangan pamwing ney ku chitentam? Ov, kudi antu akwau mu chikumangen aswiridina ukwash chakwel kukumangan ni yawiy? Ov, wirijekin mulong wa kukumangan ku chitentam chikeza kusadikin ndond kushalijan ni yitondinau mulong wa chikumangen chen? Ov, ukwikal nich kuswir kwa ndond ya kulal? Rusangu rilondwila er rikez kukukwash kwirijek.
3. (a) Ov, kuwanyin ik kwa Isay 25:6 kushikedina ilel unou? (b) Yom ik yikata kumekan Diakatan ku chitentam, ni chom ik tufanyidina kusal ayinetu?
3 Kumangan Machuku Mawonsu Masatu: Yehova upanin yakudia yivud ya mu spiritu kudi antu end. (Is. 25:6) Mu yakudia yiney mudi musambu wa mu spiritu usadilau ku yitentam ya pa muvu. Chimeken anch Diakatan ku chitentam antu ading akemp nakash kupandakanamu machuku makwau. Itekina rutong ra kukumangan mu machuku mawonsu masatu ma chitentam chisangareshina chitenchikinau kudi dirijek dia Yehova mulong wetwetu! Anch ukimbin kwit konje kudi mukurump wey wa mudimu, tek milong yiney mu malembil. Chawiy lel, ‘jijaman’ mu kwisamb ni mukurump wey katat kamu ak pijikishinau dichuku dia chitentam chen. (1 Tes. 2:2; Neh. 2:4, 5) Chikutwish kwikal cha usey kumulej anch chitentam chen cha muvu chidi chikunku cha difukwil diey. Kusal mwamu kurutu kwa saa kukutwish kumukwash mukurump wey wa mudimu kutenchik program wa mudimu chakwel itiya yiumwitina.
4. Ov, mutapu ik tukutwisha kuyirijek in kwilej netu Bibil ni yidi ya dijuku yakad kwitiy mulong wa chitentam?
4 Yirijeka in Kwilej Ney Bibil ni Dijuku Diey: Chikwikal cha musangar mudi ik anch waman in Kwilej ney Bibil akumangan pamwing ney ku chitentam, ni kwimenap ayinau chirungil cha ukadivar “mu kukumangan kujim”! (Kus. 22:25) Yileja nawamp kurutu kwa saa chakwel akutwish kwitekin chisu cha kwez ni kukumangan. Yileja mulong wak ukwetinga musangar wa kukumangan ku yitentam. Ukutwish kuyirijek in kwilej mulong wa yom yichingejinau ku yitentam kusutil ku kuyilej maband video makweta yikunku yiswimp ya yitentam yasutina kal, mudi band video Unis grâce à l’enseignement divin. Sal anch yid ya dijuku diey yakad kwikal mu ritiy ijika program wen. Pamwing ap akutwish kwirijek chakwel kutal dram ap kukumangan dichuku ap dimwing kusu dia chitentam pamwing ney.
5. Ov, mutapu ik tukutwisha kumekesh muchim wa kupan kukwatijan nich 1 Timoteu 6:18?
5 Yikwasha Akadivar Ney ni Anambaz: Kambuy Paul wayiyula in Kristu adinga ampich anch: “Asala nawamp, ikala ampich mu midimu yiwamp, iliken mu kudimuk ni kuyovil akwau riy.” (1 Tim. 6:17, 18) Tukutwish kumekesh muchim wa kupan wakasikeshinay Paul anch twashinshikin mwikadil wa amapal ni ayibid, antu akata kusal mudimu wa chisu chawonsu, majuku makweta nvaj umwing, pamwing ap antu akwau adia mu chikumangen akutwish kuswiriken ukwash chakwel akumangana ku chitentam. Chisend cha kuwanyish maswir ma antu inay chidi cha kusambish cha anamakwau mu ritiy, pakwez amakurump ni antu akwau akutwish kujingunin maswir mau ni kupan ukwash uswiridinau.—Gal. 6:10; 1 Tim. 5:4.
6. Ov, mulong wak tufanyidina kukumangan ku chitentam chitondinau mulong wa chikumangen chetu?
6 Kukumangan ku Chitentam Chindjing: Pakwel anch kwikala ndond ya kushakam, mikand, tupalikany twa kulal tuwanyidina, ni yikwau, in kulejan ayikasikeshin kuya ku chitentam chitondinau mulong wa chikumangen chau. Pakwez, anch mikadil yey yikukangeshin kukumangan ku chitentam chitondinau mulong wa chikumangen chen, ikal ni want ipey wa kukumangan ku chitentam chikwau.
7-9. (a) Ov, manans ik ma usey tufanyidina kulam mu manangu anch tukwet kuswir kwa ndond ya kulal, ni mulong wak? (b) Ov, yitenchik ya mutapu ik yifanyidina kusal anch akadivar ni anambaz ayitekin mu Chot cha Want? (c) Ov, manans ik mamwing mafanyidina kushinshikin mulong wa Chitentam cha Distrik? (Tal mushet udia pa paj wa 4.)
7 Jindond ja Kulal: Ndond ja kulal mu musumb musadikidina chitentam yisu yivud jiding mu yikumbu yayen (yikumbu ya akadivar), mu Yot ya Want ap ku yid ya dijuku. Dipang dia jindond jawonsu ja chitentam akudilamik ku tablo wa yijikish ya chikumangen kupwa kwa kushinshikin wenjil winou ku Chikumangan cha Mudimu. Chiyul chidi anch awonsu ashinshikin mu malembil ku chitentam ik kukutwishau kukumangan mu 2007.
8 Anch usotil kushiken ku chikumbu cha mukadivar, ap ku Chot cha Want, kalam wa ujindj ufanyidin kusal kurutu kwa chisu dipang (list) dia in kulejan asotila ndond ya kulal ni kuditum ku Departema wa Kuladikan ku musumb kukusadikina chitentam. Ufanyidin kulejan dijin dia mwin kulejan, kulejan anch udi ikundj ap mband, mivu yikwetay, kuvarikan mu dijuku kwa mwin kulejan mwawonsu pa dipang dined. Chinech chikuyinkish akadivar akweta chisend mu Departema wa Kuladikan chisu cha kukimb ndond ja kulal mulong wa antu awonsu. Komite wa Mudimu wa Chikumangen ufanyidin kushinshikin yaku ya in kulejan kurutu kwa kutum kwit kwinoku ku Departema wa Kuladikan. Anch atwinkish ndond, chiwapinap kwovijan ku ujindj mulong wa kushakam kand ni mukadivar mukwau ap ni murund. Chinech chikutwish kuvundangesh yom mulong wa akadivar akweta chisend cha Departema wa Kuladikan. Pakwez, anch muntu watong kushiken mu chirung cha chitentam kwa mwanamakwend wakad kwikal mukadivar mu spiritu, ndiy kafanyidinap kupan dijin ni kuditumin pa fomu wa kwit kapalikany ka kulal.
9 Tukat kulejan pinap yany kanang piur pa mutapu wa kusadil ndond jidia ku Chot cha Want. Komite wa Chitentam cha Distrik ukutond mukurump ukutakela ditenchik dined. Ukwikal ni nkwash, nakash mukurump mukwau ap nkwash a mudimu uwanyishinau mu spiritu. Chot afanyidin kuchangan mu yikunku yaad: chikunku chimwing mulong wa anambaz nau an au akemp, nau ayangadim, chikunku chikwau mulong wa akadivar ni an akwau amakundj. Chot cha Want chifanyidin kuchisadil mulong wa kulal kusu. Dichuku didiau awonsu kwi ndond ya chitentam, kukwikal kutenchik chakwel kwikala atulam akuswinkanijana mulong wa kwipuk kwiy yom ya antu. Atulam akusadilau afanyidin kwikal akadivar akudila mu spiritu, antu a kashinsh. Chifanyidinap kwisukin yakudia mu Chot cha Want. Akutwish kutung kapish mu rupang kakusadilau mudi ndond ya kwisukin mu chirung cha chitentam kusu. Kupwa kwa chitentam, akez kukawupul. Chidi cha usey kulam chot pamwing ni rupang, yinangina ni pakad kanvundangesh. Chifanyidin kutal anch kangal ayipish chom ap chimwing. Antu ashichamu afanyidin kusal usu wau wawonsu wa kumekesh mwikadil ufanyidina wa in Kristu akin umwing ni mukwau pamwing kand ni amutej nau.—1 Kor. 10:31.
10, 11. (a) Ov, yirijek ik yisadiningau kurutu kwetwetu kushik pa ndond ya chitentam? (b) Ov, mutapu ik tukata kumekesh kusanger ni kujikitish mulong wa mudimu wawonsu ukatau kusal mulong wetwetu? (Tang Hebreu 13:17.)
10 Sadil Kwambatan Nich Yitenchik: Pitukata kushik pa ndond ya chitentam, chimekening anch kusadikining mudimu uvud chakwel kurijek kushik kwetu. Akadivar in rukat akata kusal mudimu wa kwakan akat kutulangwish, kutwinkish program, ni kutwinkish ndond ya kushakam. Akadivar ni anambaz akat kukombang pa ndond ni kurijek chimet chipandakena kuwap. Kusadikining kand mudimu wa usey mu ujindj mudi kurijek yikunku ya program, jindond ja Kulal, ni midimu yikwau yivud.
11 Mulong wa chitentam ni chitentam, antu avud akat kusal midimu mu angond avud chakwel kutenchik mutapu chiswiridikina, ni majuku mau makat kuyikwash chakwel ikala ni chisu cha kusal midimu yiney ya usey nakash. Ov, tukatap kusanger kwipan kukatau kwipan mulong wa ukwash wetu? Tukutwish kumekesh kujikitish kusutil ku kulondul yany yidia mu mutu wa mulong winou pamwing nich umutakel ukwau tukutwisha kutambul kurutu kwa chitentam chetu. (Heb. 13:17) Rusot ra kusadil pamwing ni muntu mwawonsu rukat kusal anch yom yawonsu “ayisala mu kuwanyin ni mu kufanyin.”—1 Kor. 14:40.
12. (a) Mulong wak yikumangan ya antu a Yehova yidi ya usey nakash pa chisu chetu? (b) Ov, chom ik chikutwishay kusal katat muntu ni muntu pakach petu?
12 Pitumena ‘dichuku chidisejidina piswimp,’ kukumangan kwawonsu kwa antu a Nzamb kudi kwa usey nakash. (Heb. 10:25) Ku yitentam yetu ya win Kristu, chisak cha kashalapol ushinshamena ni kubabal chikat kupan rusangu chakwel kutukwash etu ‘kulam ni kusadil mazu mawonsu’ matusotinay Yehova kulondul. (Kuv. 31:12) Sambish kwirijek katat kamu ak chakwel kukumangan machuku mawonsu masatu ma Chitentam cha Distrik “Mulondulany Kristu!” chawiy lel ukez kutambul ukwash udiokila ku yany yawonsu ya mu spiritu ni urund usangareshina!
[Caption on page 3]
[Picture on page 3]
Program
[Caption on page 3]
[Picture on page 3]
Diakatan ni Diampos
9:20 pamanch - 5:05 kupwa kwa midi
Diarubing
9:20 pamanch - 4:10 kupwa kwa midi
[Caption on page 4]
[Picture on page 4]
Manans ma kushinshikin Mulong wa Chitentam cha Distrik
1. Anch usotil kukas weny ulemp mulong wa kukumangan ku chitentam, sambish kulam nfalang jifanyidina mulong wa weny wey ni dijuku diey, ni ja kuland nich yakudia.
2. Tongin kand kukwash yirijek ya chitentam nich milambu yey ya kwisotil. ‘Kangal muntu ap kusu umwing kwez kurutu kwa Yehova makas a makas,’ pakwez ‘Mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Chisu cha chitentam, tukat kutumbish dijin dia Yehova kusutil ku mwikadil wetu uwamp ni kudjal maswin minangina ni mafanyidina.—1 Kor. 10:31.
4. Sadil mu kovijan pamwing nau in kwakan ni akadivar akweta chisend cha kwandjik ni kushichik antu. Kangal wakwatin jindond chamwamu, ching kusu mulong wa yid ya dijuku diey ap antu wezina nau pamwing.
5. Mulong wa kwisakin sens yikunku ya kupwa kwa midi, diang yakudia yipipela kupwa kwa chikunku cha pamanch. Yakudia yivud ap yilimina yikutwish kuletish tul.—Luka 8:18.
6. Kwinang kukat kumulimish Yehova. Kwisudiel kwa chikunku ni chikunku, muntu ni muntu ukutwish kusal usu wa kusha ndond ya chitentam yinangina mu kunonol mapaper ni yishoshot ni kuyidjibul mwi ndond yitekinau mulong wa yishoshot.—1 Pi. 1:15, 16.