Mulong wak Kumwinkish Kand Muntu Ukweta Yom Yawonsu?

1, 2. Mutapu ik mudiay Yehova mwin kupan?

YEHOVA udi Nzamb mwin kupan. Yom yawonsu tukweta yidiokil kudi ndiy. Yom yawonsu yiwamp yidia pa divu yidi yendendiy ni ukat kuyisadin mulong wa kukwash mwom. (Kuseng 104:13-15; Age 2:8) Mu Bibil, twilejin mutapu wasadinay Yehova yisu yimwing yom yiney yiwamp mu mutapu ushimwokishena mulong wa kuyikwash antu end.

² Chilakej, Yehova waleta mana ni mem mulong wa muchid wa Isarel chisu chadingau mwi mpay mu mivu 40. (Kubudik 16:35) Mudi chibudikin, ikala ni yom yawonsu yadingau nich kuswir. (Nehemiy 9:20, 21) Kupwa, Yehova wamwinkisha muprofet Elisha usu wa kuvudish many makemp ma mwadiamufu ushinshamena. Chipan chinech chidiokila kudi Nzamb chamukwasha kufut mabaz ni washala kand ni nfalang jivud jamukwasha ndiy nau anend kwikal ni mwom. (2 Ant 4:1-7) Nich ukwash wa Yehova, Yesu wasala chilay mulong wa kulet yakudia ni nfalang pa chisu cha maswir.—Mateu 15:35-38; 17:27.

3. Yom ik tukushinshikina mu mutu wa mulong winou?

³ Yehova ukutwish kusadin chom chin chawonsu chitondinay chakwel akwasha yitang yend. Chawiy, uyitin atushalapol end amwinka yom yikutwishau mulong akwasha mudimu wa dirijek diend. (Kubudik 36:3-7; tang Jinswir 3:9.) Mulong wak Yehova uchingejin anch tusadina yom yetu ya usey mulong wa kumwinkish kand? Mutapu ik wakwashau atushalapol a Nzamb a pasak mudimu wend? Dirijek disadidin mutapu ik nfalang jipaninau nlel? Mutu wa mulong winou ukwakul yipul yiney.

MULONG WAK TUKAT KUMWINKISH YEHOVA?

4. Yom ik tumekeshina kudi Yehova anch twakwash mudimu wend?

⁴ Tumwinkishin Yehova mulong tumukatin ni tukat kumusanger. Chisu tutongining piur pa yom yawonsu yatusadinay kal Yehova, michim yetu yikat kutubachik kusal chom kanang. Mwant David wiyova mwamu parumburilay chisu chaswirikenau yom mulong wa kutung tempel. David walonda anch yom yawonsu tukweting yidiokiling kudiay Yehova ni chom chawonsu tumwinkining Yehova chidiokiling ku yom yatwinkishay.—Tang 1 Jinsangu 29:11-14.

5. Mutapu ik utufundishinay Bibil anch kupan pakad choy kudi kwa usey mulong wa difukwil diakin?

⁵ Tumwinkining kand Yehova mulong winou wawiy mutapu uwamp wa kumwifukwil. Mu chishimushimu, kambuy Yohan watesha atushalapol a Yehova mwiur akat kulond anch: “A! [Yehova], Nzamb wetu! Ey yey uwanyidina kutambul uyaj, ni katumb, ni ukash. Mulong yey watanga yom yawonsu, ni yom yawonsu yidiaku yishich mulong wa rusot rey.” (Kujingunik 4:11) Chakin kamu, Yehova uwanyidin uyaj ni katumb, chawiy tufanyidin kamu kumwinkish yom yetu ya usey. Kusutin Moses, Yehova wauleja muchid wa Isarel kusal misambu tupamp tusatu pa muvu. Mu kwifukwil kwau ku misambu yiney mwading kand kumwinkish Yehova yipan. Ayileja antu anch kangal “kwimekesh kurutu kwa [Yehova] makas a makas.” (Kuvurik Yijil 16:16) Nlel kand, chidi cha usey mu difukwil dietu kupan pakad choy. Mu kusal mwamu, tukumekesh anch tukwatin nich usey ni kukwash mudimu wa dirijek dia Yehova.

6. Mulong wak chidi chiwamp kudi etu kupan? (Tal chipich cha kwisambishin.)

⁶ Chidi chiwamp kudi etu kupan kwa kwikatin pakad kwau kuchingejin ching kutambul. (Tang Jinswir 29:21.) Tong piur pa mwan mukemp winkishangau nfalang jikemp kudi anvajend, pakwez ndiy wasadin chikunku mulong wa kuyilandin anvajend chipan. Chipan chinech chikuyovish anvajend mutapu ik? Ap tong kand piur pa nsand udia chibol ushicha pamwing nau anvajend ni wayinkish nfalang jimwing mulong wa kufutin chikumbu ap mulong wa kuland yakudia ya dijuku diau. Anvaj kakutwishap kuchingejin anch mwan asala mwamu, pakwez akwitiy chipan chend. Mulong wak? Mulong udi mutapu uwamp wa kumekesh kujikitish mulong wa yom yawonsu yamusadinau. Chilik chimwing, Yehova wij anch chidi chiwamp kudi etu kumwinkish yom yetu ya usey.

MUTAPU WAPANANGAU ATUSHALAPOL A NZAMB A PAKUR

7, 8. Mutapu ik washau atushalapol a Nzamb a pakur chilakej chisu chapanangau (a) mulong wa midimu ya pakampwil? (b) mulong wa kukwash mudimu wend?

⁷ Mu Bibil, twilejin anch antu a Yehova apanang milambu mulong wa kukwash mudimu wend. Yisu yimwing apanang mulong wa midimu ya pakampwil. Chilakej, Moses wayikasikesha in Isarel kupan milambu mulong wa kutung dizang. Kupwa, Mwant David wasala niyend chilik chimwing mulong wa kutung tempel. (Kubudik 35:5; 1 Jinsangu 29:5-9) Chisu cha winyikel wa Mwant Jowas, in kupesh arijeka tempel pasadinau nfalang jaletau antu. (2 Ant 12:4, 5) Mu mivu chitot ya kusambish, in Kristu ijika anch kwading kamungun mu Yudeya ni akadivar ading akwet kuswir kwa kuyikwash. Chawiy mwin Kristu mwawonsu wakwata mupak wa kupan chom chikutwishay kupan mulong wa kuyitumin akadivar.—Midimu 11:27-30.

⁸ Antu a Yehova apanang kand nfalang mulong wa kuyikwash antu atakedina mudimu wend. Chilakej, mu Chijil cha Moses, in Levi kadingap ni uswan mudi mwading michid yikwau. Chawiy in Isarel akwau ayinkishang in Levi cha dikum cha yom yadingau nich. Chinech chayikwasha in Levi kushinshikin pa mudimu wau wasalangau mu dizang. (Kuchind Michid 18:21) Chilik chimwing, amband ading ni muchim wa kupan asadinang yom yau mulong wa kumukwash Yesu ni atwimbuy end.—Luka 8:1-3.

9. Kwisu kwadiokalang milambu yapanangau pakur?

⁹ Milambu yiney yadiokalang ku jindond kushalijan. In Isarel akwasha nich milambu mulong wa kutung dizang apana yom yau ya usey yadiokalau nich mu Idjibit. (Kubudik 3:21, 22; 35:22-24) Mu mivu chitot ya kusambish, in Kristu amwing alandisha yom yau yadingau nich, mudi yir ni yikumbu ni apanang nfalang jau kudi atwimbuy. Atwimbuy asadinang nfalang jinej mulong wa kuyikwash akadivar nau anambaz ading mu maswir. (Midimu 4:34, 35) In Kristu akwau alamang nfalang jau chisu chawonsu chakwel akutwish kujipan mulong wa kukwash nich mudimu. (1 Korint 16:2) Chawiy, ikalap nchik mpich nakash ap kazwendj nakash, muntu ni muntu wapanang chom kanang.—Luka 21:1-4.

MUTAPU TUPANINA NLEL

10, 11. (a) Mutapu ik tukutwisha kuyimburij atushalapol a Yehova apanang kwa kwikatin chisu cha pakur? (b) Mutapu ik wiyovila piur pa kukwash mudimu wa Want?

¹⁰ Nlel, akutwish niyetu kutulej kupan milambu mulong wa mudimu kanang. Pamwing ap chikumangen chen chikat kwitenchik mulong wa kurijek Chot chen cha Want ap kutung Chot chisu. Ap pamwing ap biro wen wa mutiy akwet kuswir kwa kumurijek. Tukutwish kand kukwash ni nfalang chisu cha chitentam chetu. Ap akadivar netu a ndond yikwau amen mar mulong kwasadikin mar ma chitangil ni aswirikedin ukwash wetu. Milambu yetu yikat kuyikwashang kand amishoner, ayibol a pakampwil, atulam a minyingumuku, antu asadina ku biro mujim wa pa mangand mawonsu ni asadina ku ma biro ma mitiy mwi ngand ya kabuj. Chikumangen chen chikutwish kand kutumang milambu chisu chawonsu mulong wa kukwash kutung Yot ya Yitentam ni Yot ya Want mulong wa akadivar netu adia ku jindond jikwau pa mangand.

¹¹ Etu awonsu tukutwish kupan chom kampand mulong wa kukwash mudimu usadinau kudi dirijek dia Yehova mu machuku minam ma nsudiel. Kalejeningap majin ma antu apanining yipan yiney. Chisu tutekining nfalang mu mishet ku Chot cha Want ap kupanin milambu yetu kusutin kapend ka jw.org, tukusalangap anch akwetu ijika uvud wa nfalang twapana kal. Pakwez chikwikal nchik anch umen anch mulambu wey udi kwau ukemp? Uyakin udi anch yipan yivud yitambwilau mu dirijek yidiokiling ku tuyipan tukemp tuvud pa ndond pa yipan yijim. Ap akadivar netu akweta nfalang jikemp akat kuyimburij in Kristu a kusambish a mu Masedon. Ading “atuzwendj nakash,” pakwez ilemba anch ayilika apana ni apana nich muchim umwing.—2 Korint 8:1-4.

12. Mutapu ik usadina dirijek usu wa kusadin milambu mu mutapu uwamp?

¹² Chisak Chitakedila chishinshamen ni chibabel mu mutapu chisadidina milambu. (Mateu 24:45) Antu adia mu chisak chinech akat kulembil mulong wa kukwat mipak yiwamp ni akat kurijek kamu nawamp mutapu wa kusadin nfalang. (Luka 14:28) Mu chisu cha pakur, antu ashinshamena atalang milong ya milambu ading akwet kashinsh anch milambu ayisadinang kamu ching mulong wa kumwifukwil Yehova. Chilakej, Esidera wachirika ku Yerusalem ni yipan ya usey yamwinkau kudi mwant wa in Peris, milambu yiney mwading kand utad wa or, wa argent ni yom yikwau yading yikweta usey nakash kusutamu mamiliyon 100 ma madolar nlel. Esidera wamana milambu yiney mudi yipan mulong wa Yehova. Chawiy wapana mbil ya pakampwil mulong wa kuking milambu yiney pading pasutinau mu jindond ja ubaj. (Esidera 8:24-34) Kupwa kwa mivu yivud, kambuy Paul wakumangeja nfalang mulong wa kuyikwash akadivar a mu Yudeya ading mu maswir. Wading nich kashinsh anch antu apanang nfalang jinej chakwel ajisadina mulong wa “yom yitentamina ku mes ma [Yehova] ni ku mes ma antu kand.” (Tang 2 Korint 8:18-21.) Nlel, dirijek dietu dimwimburijin Esidera ni Paul ni disadidin milambu mu mutapu uwamp.

13. Mulong wak dirijek diasadin kuswimp kumwing machuku minam?

¹³ Dijuku dikutwish kusal kuswimp kumwing mulong wa kulam nfalang jau chakwel kangal asadina nfalang jivud kusutamu jandjikinau. Ap akutwish kukimb mitapu yimwing yikutwishau kusal mulong apipeja mwom yau chakwel asala yom yivud mu mudimu wa Yehova. Chinech chidi kand mwamu mu dirijek dia Yehova. Machuku minam, kudi midimu yimwing yisu yisangareshina, ni yisu yimwing, akat kusadin nfalang jivud kusutamu jikatau kwandjik. Chawiy dirijek didi kand mudi dijuku, dikat kukimb mitapu ya kulam nfalang ni kupipej midimu, chakwel ditwisha kusadin nawamp milambu yen upaninanya.

KUTANINAMU MU MILAMBU YEN

14-16. (a) Mutapu ik usadidinau milambu yen? (b) Midimu yiney yakukwashin ey mutapu ik?

¹⁴ Antu avud asadina kal mivu yivud mu uyakin alondin anch katat tutambwil yipan yivud mu dirijek kusutamu pakur. Katat tukwet kapend ka jw.org ni JW Télédiffusion. Tukwet kand Bibil wa Les Saintes Écritures. Traduction du monde nouveau mu mazu mavud. Mu muvu wa 2014/2015, kwasadika Chitentam cha pa mangand mawonsu cha machuku masatu chading ni mutu wa mulong ulondina anch “Dandamenany Kukimb bil Want wa Nzamb”, chitentam chinech chasadikina mu mastad majim mu misumb 14 pa mangand mawonsu. Muntu mwawonsu wakumangana wading ni musangar wa kwikalaku!

¹⁵ Antu avud alonda mutapu wasangarau mulong wa yipan yiney yidiokila ku dirijek dia Yehova. Chilakej, ambay a uruw asadidina mu Aziy afunda anch: “Tusadidin mu kamusumb kakemp. Mudi chibudikin, yisu yimwing tukat kwiyov anch tudi ayinetu ni tukat kuvuramen swa kujimb kwa mudimu wa Yehova. Pakwez chisu tukata kutal maprogram kushalijan ma JW Télédiffusion, tukat kuvurik anch tudi kamu mu uumwing wa ukadivar wa pa mangand mawonsu. Akadivar nau anambaz netu a pa ul wetu akat kusanger nakash JW Télédiffusion. Kupwa kwa kutal program wa pa ngond, tukat kuyitesh yisu yivud akat kulond anch iyovil kamu anch adi piswimp nau antu adia mu Chisak Chitakedila. Katat asanger kamu nakash kwikal mu dirijek dia Nzamb.”

¹⁶ Pa mangand mawonsu, akat kutung ni kurijek Yot ya Want piswimp 2 500. Antu a chikumangen chimwing cha mu Honduras alonda anch ading akat kulat anch akwet Chot chau cha Want, pakwez katat chilat chinech chikadin chakin. Afunda anch: “Tukwet kamu musangar wa kwikal mu dijuku dia ngand yakabuj dia Yehova ni tusanger mulong wa uumwing wa ukadivar wa pa mangand mawonsu.” Antu amwing alonda niyau yom mudi yiney chisu chatambulau Bibil ni mikand yikwau mu mazu mau, chisu chayikwashau kudi akadivar nau anambaz kupwa kwa mar ma chitangil ap chisu chamanau yibudikin yiwamp papanau uman pa ndond yidia antu avud ni mu misumb yijim mu ma teritwar mau.

17. Mutapu ik twija anch Yehova ukwashin dirijek diend nlel?

¹⁷ Antu avud akad kwikal Atuman a Yehova kakutwishap kutesh mutapu tusadina yom yawonsu yiney kusutin kwau yipan ya kwikatin. Mukurump umwing wa sosiete mujim weza kutal ndond yimwing yidia mashin ma kuchapin mikand yetu. Washimoka nakash pamanay anch midimu yawonsu ayisadin kudi in kwikatin, ni yipan ya kwikatin ni pakad ditenchik dikwau dia kukumangej nfalang. Walonda anch yom tusadina yiswapelap. Cha kashinsh kamu! Twij anch chinech chiswapel mulong Yehova ndiy ukwashina mudimu.—Job 42:2.

YIYUKISH TUKUTAMBULA ANCH TWAMWINKISH YEHOVA

18. (a) Yiyukish ik tukutambula anch twapan yom mulong wa kukwash Want? (b) Mutapu ik tukutwisha kuyifundish anetu ni antu adia asu mu uyakin kusal mwamu?

¹⁸ Yehova utwinkishin chisend ni mutapu wa kukwash mudimu ujim wa Want. Utulejin nich kashinsh anch ang twasal mwamu, ukutuyukish. (Malakiy 3:10) Yehova ukanin anch ang twapan ni muchim umwing, yom tukusala yikurumburik ni yikuwap. (Tang Jinswir 11:24, 25.) Utulejin kand anch tukwikal ni musangar anch twapan, mulong “chiyukish cha mwin kupan chipandakenamu cha mwin kutambul.” (Midimu 20:35) Kusutin yom tulondina ni tusadina, tukutwish kuyifundish anetu ni antu adia asu mu uyakin mutapu ukutwishau niyau kusal mulong wa kukwash mudimu winou ni kusanger yiyukish yivud.

19. Mutapu ik wakukasikesha kal mutu wa mulong winou?

¹⁹ Yom yawonsu tukweta yidiokil kudi Yehova. Anch twamwinkish, tumekeshin anch tumukatin ni tukwatin nich usey yom yawonsu yasalay mulong wetwetu. (1 Jinsangu 29:17) Paletangau in Isarel milambu mulong wa kutung tempel, awiy “asangara mulong wa yom yapanau, mulong awiy apana mulambu wakad [kuyishindil] kudi [Yehova].” (1 Jinsangu 29:9) El amboku niyetu tudandamena kusangar chisu tumwinkina Yehova yom yatwinkishay kal.