Mutapu ik Tukutwisha Kukwash?
1 Chipul “Mutapu ik Tukutwisha Kukwash?” akat kuchipul kud Atuma a Yehova chisu ni chisu pateshinau ya kusheshik kwasadikina mu chikunku kanang cha ngand. Mud mulejena rusangu ridia ku Midimu 11:27-30, in Kristu mu mivu chitot ya kusambish atenchika ukwash wa kupan kud akadivar adinga mu Yudea mulong wa kamungun kikalaku.
2 Mu yisu ya katat, yijil ya dirijek dietu yapanin kal mbil ya kusadin nfalang mulong wa mujikit wa kupan ukwash kud antu amena mar madiokila ku kusheshik kwa chitangil ap mar masarumwinau antu ni mu yisu yikwau ya maswir.
3 Mud chilakej, muvu wadiap ou akadivar avud apanin nfalang mulong wa kuyikwash antu akwachikina ku kusheshik kwa tsunami mu Aziy wa Kurul. Kwakul kwinoku kwa kashinsh mu mutapu wa kupan nfalang ku chipau cha ukwash cha dirijek akubazin nakash kamu. Pakwez, anch yipan ayipanin pakampwil mulong wa kusheshik kampand, chidi cha usey mu jingand jimwing kusadil nfalang jinej ching mulong wa rutong rijikena kudiay mwin kupan ni mu chirung kampand cha chisu, pamwing ap maswir ma akadivar amawanyishin kal ap kand kal.
4 Mwamu, chiyul chidi anch yipan ya riy ni ya ukwash ayisadil ku mudimu wa mangand mawonsu. Nfalang jinej ajisadidil mulong wa ukwash pamwing ni kutwal kurutu maswir ma muspiritu ma ukadivar wa Ukristu. Anch, mulong wa diyingish kampand, muntu wasot kupan chipan cha ukwash chaurikina nich milambu yikatau kupan mulong wa mudimu wa mangand mawonsu, akuwitiy ni kuusadil kwawonsu kudia maswir ma ukwash. Pakwez, chikwikal chiwamp nakash anch yipan mud yiney ayipana pakad mbil piur pa ndond ni mutapu ukutwishau kuyisadil.
5 Kupan bil yipan yetu ku mudimu wa mangand mawonsu kutwishishin kwikala nfalang jivud ja kusadil kukwatijan nich milad yawonsu ya mudimu wa Want pa ndond pa kuyilam ching kusu mulong wa ukwash wa kurutu. Chinech chovijadin nich kurumburik kwakin kudia ku Efes 4:16, anch tusal pamwing mulong wa kupan yiswiridikina “chakwel [mujimbu] ukudila nawamp ni kukasikan mu rukat.”