Mutapu wa Kukwash Anch Kwashiken Mar

Nlel yinship ya mar madiokila ku yom yatangau yivulijadin nakash. Anch mar minam mashiken, chitining kurijek nawamp mutapu wa kuyikwash antu. Chawiy, Chisak Chitakedila chatenchikin kal chakwel mu mutiy ni mutiy mwikal Departema wa Kupan Ukwash kwi Ndond Kushikedina Mar.

Anch akadivar a mu departema winou ayijikish anch kwashikenang mar kwi ndond kanang, akat kuyitazuk pakad kulab amakurump a yikumangen ya ndond yiniya mulong wa kwijik yom yikuswirikenau in kulejan. Anch kwasheshikang yom yivud nakash ni in kulejan kakwetap mutapu wa kupwish mulong winou ayinau, biro wa mutiy ukutum akadivar awanyishina yitinau mulong wa kutakel mudimu wa kupan ukwash. Akadivar inay akutwish kwit ukwash wa in kwisotin ap yipan ya mulad kanang, ap kand akutwish kulandin yom yiswirikedinau akadivar ni anambaz kwi ndond kwashikenang mar, ni kuyangenay.

Kusal yom mu mutapu winou kukat kukwash nakash. Kukat kukwash kwipuk midimu ya kuchirokin, kwipuk kanrumbangesh, ni kulik kushesh nfalang ni yom, yibudikin yikata kwikalaku anch akadivar asal yom ayinau pakad umutakel.

Akadivar atekinau kud biro wa mutiy akutwish kwijik uvud wa nfalang ni wa in kwisotin witina mulong wa kuyikwash akadivar ni anambaz. Akutwish kand kwisamb nau antakel a ndond yiniya, akutwisha kutukwash kusal yom mau mau. Chawiy, antu kafanyidinap kusangish nfalang, kutum yom, ap kuya kwi ndond kwasadikang chinship cha mar anch kayilejinap kusal mwamu.

Chakin kamu, anch kwashiken mar tukatining kukwash. (Heb 13:16) Mulong tuyikatin akadivar netu! Pa chinech, yom ik tukutwisha kusal mulong wa kuyikwash? Cha usey nakash, tukutwish kuyilembil akadivar ni anambaz adia kwi ndond kwasadikang mar ni awonsu ayikwashina. Tukutwish kand kupan yipan mulong wa mudimu wa pa mangand mawonsu. Kusutil umutakel wa Chisak Chitakedila, mabiro ma mitiy mij nawamp nakash kwisu kukutwisha yipan yiney kukwash nakash. Ni anch tusotin kukwash kusutil kwipan ayinetu pakampwil, tukutwish kumekesh mwamu kusutil kwizwish formiler Demande d’admission comme volontaire local développement/construction (DC-50).

TAL VIDEO MABEB NAKASH MU BREZIL, KUPWA AKUL KU CHIPUL ECH:

Yom ik yikusangareshina piur pa usu wasalau Atuman a Yehova mulong wa kuyikwash ambay nau in Kristu kupwa kwa mabeb mashikedina mu Brezil muvu wa 2020?