Yakul ku Yipul Yen
◼ Mutapu ik upandikena kuwap wa kupan nfalang mulong wa kuyikwash akadivar adia mu kuswir mu jingand jikwau?
Yisu yimwing, tukat kutesh nsangu ja akadivar mu jingand jikwau ashikedina ku kuswiriken yom ya ku mujimbu mulong wa kuzengol, kusheshik kwa yom, ap mikadil yikwau yikash. Akadivar amwing ayikasikesha kutum nfalang swa ku mabiro ma mitiy mu jingand mud jinej. Kwit nfalang jinej kudi kusadil mulong wa kumukwash muntu kampand, chikumangen kanang, ap mulong wa chitong cha rutung.—2 Kor. 8:1-4.
Anch kubangin kwa rukat mud kwinoku kufanyidin mulong wa ambay akaritiy, yisu yivud kuding maswir ma swa-swa kupandikanamu makwetay mwin kupan mu manangu. Yisu yimwing, uswiridinay kukwash mwin kupan amukwashin kal kwend. Chakin, tukutwish kuchingej anch chisu tutumina nfalang ku biro wa mutiy mulong wa mudimu wa mangand mawonsu, wa Chipau cha Yot ya Want, ap wa ukwash ku yishiken ya mar, nfalang jinej jipaninau akujisadil mud mwajitumangau kudiay mwin kujipan.
Akadivar adia mu mitiy yawonsu ayifumbin kal nawamp mulong wa kusal pakad kulab chakwel kukaturij maswir. Mu yisu yawonsu, mutiy ukat kwijikish mulong winou ku Chisak Chitakedila. Anch kudi kuswir kwa ukwash ukwau, Chisak Chitakedila chikutwish kwit mitiy ya piswimp chakwel yikwasha ap mabiro majim makutwish kutum nfalang swa.—2 Kor. 8:14, 15.
Pa chinech, milambu yawonsu yipaninau mulong wa mudimu wa mangand mawonsu, yitongijok ya rutung mu jingand jikwau, ap ukwash ku yishiken ya mar chifanyidin kuyitum ku biro wa mutiy mwi ngand ushichanya, kusutil ku chikumangen ap kapamp kamwing. Mu mutapu winou, “kashalapol ushishamena ni kubabal,” kusutil ku yitenchik yirijekinau yitekinau kud Chisak Chitakedila, ukukwash maswir ma mangand mawonsu ma akadivar mu mutapu ufanyidina. —Mat. 24:45-47; 1 Kor. 14:33, 40.
[Caption on page 6]
Yakul ku Yipul Yen
◼ Ov, chikumangen chifanyidin kwikal nich kart wa teritwar ulimikinau mu Chot cha Want?
Mwaning, kart wa teritwar ufanyidin kwikal wa kutanguril ni ulimikinau ku rubumb mu Chot cha Want. Kart kafanyidinap kumutek pa tablo wa yijikish. Chifanyidin kumekesh nawamp mimbu yawonsu ya teritwar upaninau wa chikumangen ni mwimbu ya teritwar wa muntu ni muntu nich nimero wa teritwar. Mimbu ya materitwar ma yikumangen yawonsu yisadidila Chot cha Want chimwing yifanyidin kuyilejan. Chinech chikuyikwash atutwambil ni antu asu asangeridina pamwing kwijik teritwar wa chikumangen mushichau. Kulejan jindond ja Dilejan dia Buku dia Chikumangen pa kart kukuyikwash kand awonsu mu kukimb dilejan dia buku kuyituminau. Kart ufanyidin kwikal wa katat.
Kumekesh kart kwinoku kukwashin mud chivurish kud atutwambil awonsu anch, ang chitwishikin, chikutwish kwikal chiwamp kwikal nich teritwar wa pakampwil. Kart udi wa ukwash kud antu asotila kutond teritwar piswimp ni chikumbu chau. Kukwashin kulik kushadish chisu ku yikumangan ya mudimu, ni kumukwash mwin kutakel kulejan swa ku chirund ni chirund cha atutwambil ndond yiyinkishinau kusadil mudimu.
Kart umekeshin kand anch chikumangen achirijekin mulong wa kulejan nawamp uruu wa Want mu teritwar wau.—Luka 9:6.