Kukwash Mudimu wa Want Ndond Ushicha ni mu Mangand Mawonsu

KUKWATIJAN ni kuwanyin kwa uprofet wa Yesu piur pa machuku ma nsudiel, Atuman a Yehova akat kusal mudimu wa kulejan rusangu “djat ni kusudiedila mangand.” (Mid. 1:8; Mat. 24:14) Mulong wa kusal mudimu winou, akat kupan kwa kwikatin chisu ni usu wau mulong wa kulejan yom ya mu spiritu. Akat kumuchingejin Yehova mulong wa kuyiwejinaku in kusal mudimu akwau ni akat kudandamen kutek Want wa Nzamb pa ndond ya kusambish mu mwom wau. (Mat. 6:25-34; 1 Kor. 3:5-9) Yibudikin ya mudimu wau yimekeshin patok anch akwet dilau dia Yehova ni uyiyukishin.

KUKWASH YISAKIN YA WANT PA MANGAND MAWONSU

² Chisu chikatau antu kuman mitapu tusadidina mulong wa kulejan ni kupan Bibil ni mikand yimedina pa Bibil pakad kwit nfalang, antu amwing akat kwiyipul anch: “Mutapu ik usadikina yom yawonsu yiney?” Chakin kamu, kubudish ni kupalangesh Bibil ni mikand yikwau kwitin nfalang jivud. Kutung ni kulam nawamp ma Betel ni antu asadinaku, antu atakedina mudimu wa kulejan ni kusal kand mu mitapu yikwau mulong wa kutwal kurutu rusangu ruwamp chitin nfalang jivud. Chikwau kand, atulam a munyingumuku, amishoner, ayibol a pakampwil ni antu akwau adia mu mudimu wa chisu chawonsu akat kuyinkish nfalang jikemp mulong wa kuyikwash kudandamen ni mudimu wau. Chimeken patok anch mudimu wa kulejan rusangu ruwamp machuku minam, chikala ndond tushicha ap pa mangand mawonsu, witin nfalang jivud nakash. Ov, kwisu kudiokiling nfalang jinej?

³ Antu avud akat kusanger mudimu wa kufundish Bibil usadinau Atuman a Yehova pa mangand mawonsu ni akwet musangar wa kupan yipan ya kwikatin. Pakwez, mudimu akat kuukwash chakusambish kudi Atuman ayinau, amwing pakach pau akat kutum yipan yau ya kwikatin ku mabiro ma mitiy ma Atuman a Yehova. Akat kumekesh muchim wa kupan mudi wamekeshau atushalapol a Nzamb a pasak apana kwa kwikatin mulong wa kutung ndond ya difukwil ya Yehova. (Kub. 35:20-29; 1 Jsng. 29:9) Ap anch akadivar ni anambaz amwing akat kusalang testama mulong dirijek disadina mapit mau, pakwez yisu yivud muntu ni muntu, yikumangen ap minyingumuku yawiy yikata kulet yipan. Yipan yiney anch ayibomb pamwing yikat kusal anch mudimu udandamena kuya kurutu.

⁴ Atuman a Yehova amening anch didi dilau kusadin nfalang ni yom yau yikwau ya usey mulong wa kutwal mudimu wa kulejan kurutu. Yesu ni in kwilejend alamang nfalang mu chipau jasadinangau mulong wa kuwanyish maswir mau. (Yoh. 13:29) Bibil ulejen piur pa amband asadina nfalang jau mulong wa kumukwash Yesu ni en kwilejend. (Mar. 15:40, 41; Luka 8:3) Kambuy Paul witiyang nich kujikitish ukwash wa ku mujimbu wamwinkishangau kudi antu ading akatina anch rusangu ruwamp riya kurutu ni ading akatina kukwash mudimu winou. (Fil. 4:14-16; 1 Tes. 2:9) Atuman a Yehova adandamedin kulondul yilakej yiney pa kulejan nich mushiku ni kupan kwa kwikatin. Mwamu chikuyiswapel antu a kashinsh adia ndond jawonsu kutambul “mem ma mwom.”—Kuj. 22:17.

KWASH MASWIRMA CHIKUMANGEN CHEN

⁵ Nfalang jikata chikumangen kusadin jikat kudiokal ku yipan ya kwikatin yikatau antu kupan. Kakatap kwit nfalang ap kusangish nfalang kwa kuyishindil antu ap kuswadil nfalang kudi antu akwau. Mishet yitekinau mu jindond ja kukumangen yikat kukwash chakwel muntu ni muntu apana “mudi mutongilay amwinend.”—2 Kor. 9:7.

⁶ Nfalang jikatau kupan, akat kujisadin chakusambish mulong wa kurijek ni kulam nich Chot cha Want. Chisak cha amakurump chikutwish kukwat mupak wa kutum chikunku cha nfalang ku biro wa mutiy wa Atuman a Yehova mulong wa kukwash mudimu usadikina pa mangand mawonsu. Chikumangen chifanyidin kwitiy mulong wa kutum nfalang jinej. Mu mutapu winou, yikumangen yivud yikat kupan yipan chisu chawonsu mulong wa mudimu usadikina pa mangand mawonsu. Anch antu awonsu ij maswir makata kushiken chisu ni chisu, amakurump kakwikalap kwau ni kuswir kwa kwijikish chisu chawonsu mulong wa milong ya nfalang.

MUTAPU UKATAU KUSADIN YIPAN

⁷ Kupwa kwa chikumangan chawonsu, akadivar aad atondau kudi chisak cha amakurump akat kunon nfalang jawonsu jidia mu mishet ya yipan ni akat kufund uvud wa nfalang jinej pa dipaper. (2 Ant 12:9, 10; 2 Kor. 8:20) Chisak cha amakurump chikurijek yom mulong wa kulam nfalang jinej djat ni pakujituminau ku biro wa mutiy ap kujisadin mulong wa maswir ma chikumangen. Chinech chikutwish kwit anch chikumangen chifungwisha kont ku bank mulong wa kulaminaku nfalang jinej. Mukadivar ulamina nfalang ja chikumangen ukat kusal rapor ku chikumangen ngond ni ngond, ni kupwa kwa angond asatu ntakel wa chisak cha amakurump ukat kurijek yom mulong wa kushinshikin milong ya nfalang ja chikumangen.

NFALANG JA KUSAL NICH YITENTAM YA MUNYINGUMUKU

⁸ Nfalang jikatau kusal nich yitentam jidiokiling ku yipan ya kwikatin ya Atuman adia mu munyingumuku winou. Akat kutek mishet ya yipan ndond ya chitentam chakwel antu atekamu yipan mulong wa kukwash munyingumuku. Mukadivar utondinau kudi kalam wa munyingumuku ndiy ukata kulam nfalang ja munyingumuku.

⁹ Chidi chakin anch, nfalang jikatau kudiosh mu mishet jawiy jikatau kusadin mulong wa kukwash chitentam. Anch aman anch nfalang jikepin kupwa kwa chitentam ni aman anch munyingumuku ukupan nfalang jinej mulong wa kuwanyish maswir minam, chidiap cha usey kwijikish yikumangen pa mulong winou. Pakwez, anch kwikil nfalang jiwanyidina mu munyingumuku mulong wa kuwanyish maswir ma chitentam chinech ap chikwezap, mudi nfalang ja kufutin ndond ya kusadin chitentam, kalam wa munyingumuku ufanyidin kufund ku yikumangen mulong wa kuyijikish anch afanyidin niyau kupan nfalang. Chisak ni chisak cha amakurump akwisambin mulong winou ni kuman uvud wa nfalang ukutwisha chikumangen chau kupan ku munyingumuku. Akutwish kwambamb mulong wa kuman uvud wa nfalang jikupanau.

¹⁰ Chisu chikukumanganau mulong wa chitentam, amakurump afanyidin kwambambin piur pa mutapu ukusadinau nfalang ja munyingumuku jidiaku. Mipak yau yikwimen pa nfalang jikusadinau mulong wa chitentam, kuland yom ya munyingumuku, ni jikusadinay kalam wa munyingumuku ap katum wa biro wa mutiy. Akutwish kukwat mupak wa kupan nfalang mulong wa mudimu usadikina pa mangand mawonsu, kutung Yot ya Want, kutung Chot cha Yitentam cha pol pen ap yom yikwau ya usey.

¹¹ Mipak yikwau kulik ching ya kusadin nfalang akuyikwat ni kuyisadin kudi amakurump awonsu. Mipak yiney afanyidin kuyifund pa dipaper ni kulejan chisu chawonsu uvud wakin wa nfalang jasadinangau mu kont wa munyingumuku. Nfalang ja munyingumuku akutwish kujitum ku biro wa mutiy kushik ni pakujikalau kand nich kuswir. Kalam wa munyingumuku ukurijek yom mulong wa kushinshikin milong ya nfalang ja munyingumuku kupwa kwa chitentam chawonsu cha munyingumuku.

KUYIKWASH ATUZWENDJ

¹² Nfalang jalamangay Yesu ni in kwilejend jading kand mulong wa kuyikwash nich atuzwendj. (Mar. 14:3-5; Yoh. 13:29) Mulong chisend chinech chafanyina kudandamen, Yesu walonda anch: “En ushichany nau atuzwendj machuku mawonsu.” (Mar. 14:7) Ov, Mutapu ik uwanyishinau Atuman a Yehova chisend chinech nlel?

¹³ Yisu yimwing, in Kristu amwing ashinshamena adia mu chikumangen akutwish kwikal ni kuswir kwa kuyikwash ni yom ya ku mujimbu mulong wa upal, ulim, ap kand mulong wa yom yikwau yiyishikedina. Antu a mu dijuku, anvaj ni antu akwau ija maswir mau akutwish kuyikwash. Kusal mwamu kukwatijadin ni mazu malonday kambuy Yohan anch: “Anch muntu ukwet mapit ma mangand minam, chad ndiy umumen mwanamakwend uburedin chom, pakwez ndiy walik kumwovil riy, ov, rukat ra Nzamb rikwikal nchik mu muchim wend? Anam akarukat, kichifanyidinap rukat retu rikal kusu ra kulond mazu mawamp, pakwez rifanyidin kwikal rukat rakin rimekedina mu yisalijok yetu yiwamp.” (1 Yoh. 3:17, 18; 2 Tes. 3:6-12) Difukwil diakin dimedin kand pa kuyikwash antu akweta maswir ma yom ya ku mujimbu.—Jak. 1:27; 2:14-17.

¹⁴ Mu mukand wend wamufundinay Timote, kambuy Paul walonda piur pa yom yafanyinau kusal mulong wa kuyikwash antu inay aburedina. Yiyul yiney yidi mu mukand wa 1 Timote 5:3-21. Chisend chinech chimutadin chakusambish mwin Kristu mwawonsu mulong wa kubangin maswir ma dijuku diend. Amapal ap ayilim akuyikwash kudi anau, ijikurau ap anamakwau akwau a piswimp. Yisu yimwing, mbur matad ap yitenchik yikwau yikat kupan ukwash, mwamu antu a mu dijuku diau ap antu akwau akutwish kuyikwash chakwel asambisha kutambul ukwash winou. Kudi yom yimwing yikutwisha kusal anch chikumangen chakabuj chitongina piur pa kuyikwash akadivar ni anambaz aburedina amusadidina Nzamb ni kushinshaman mu mivu yivud. Anch kakwetap anvaj ap anamakwau afanyidina kuyikwash ni anch kwikil ukwash wa mbur matad, chisak cha amakurump chikutwish kusal usu mulong wa kuyikwash. In Kristu ij anch chidi chisend chiwamp nakash cha kuyikwash antu aburedina.

¹⁵ Akadivar nau anambaz avud akat kushiken ku kwikal ni maswir mulong wa kuzengol, njit, kuzal kwa divu, kwizul kwa mem, kamungun, ap mar makwau mashikedina mu machuku minam mayimp. (Mat. 24:7-9) Anch yikumangen ya pol pen yiburedin yom ya kukwashijan, Chisak Chitakedila chikat kusal anch akadivar adia ndond jindjing aleta yom ya akadivar adia mu maswir. Wawiy mutapu wasalau in Kristu a ku Aziy Mukemp pa kuyinkish akadivar a ku Yudeya yakudia chisu chadingau ni nzal. (1 Kor. 16:1-4; 2 Kor. 9:1-5) Anch twalondul chilakej chau, tumekeshin anch tuyikatin akadivar netu ni tumekeshin kand anch tudi in kwilej akin a Yesu Kristu.—Yoh. 13:35.

KUPALANGESH MIKAND

¹⁶ Bibil ni mikand yimedina pa Bibil yidi ya usey nakash mulong wa kulejan nich rusangu ra Want. Nakash nakash, chisak cha amakurump chikat kutond nkwash wa mudimu mulong wa kulam mikand ya chikumangen, ni mukwau akat kumwink chisend cha kulam magazet. Akadivar inkinau chisend chinech akat kuchilam ni usey nakash. Akat kushinshikin yom nawamp chakwel chikumangen chikala ni mikand yiwanyidina kusadin kukwatijan ni maswir mach.

¹⁷ Mulong tudi in Kristu ipanina kal, twij nawamp anch chisu chetu, usu wetu, ukaliweny wetu, yom yetu ya usey ni mwom wetu yidi yipan yidiokila kudi Nzamb tufanyidina kusadin mu mudimu wend. (Luka 17:10; 1 Kor. 4:7) Anch twasadin nawamp yom yetu yawonsu tukweta, tumekeshin anch tumukatin Yehova nakash kamu. Tukwet kuswir kwa kumutumbish Yehova ni yom yetu ya usey, ni twij anch ukat kusanger yipan anch twamwikishay ni muchim wetu wawonsu. (Jinsw. 3:9; Mar. 14:3-9; Luka 21:1-4; Kol. 3:23, 24) Yesu walonda anch: “En watambwilany chamwamu, panany chamwamu.” (Mat. 10:8) Pitwipanina ni kupan kand yom yetu ya usey mu mudimu wa Yehova, tukat kwikal ni musangar nakash.—Mid. 20:35.