Mwimburija Kristu mu Mudimu Wey wa Kulejan
1 Yesu watushila chilakej cha kwimburij mu mudimu wetu wa kulejan. Rukat rend ripandikena mulong wa Nzamb ni antu ramekana mu yisu yivud ni mu mitapu kushalijan. Ndiy wayifundisha antu itudishina uyakin ni wamekesha rukat rudimukina kudi ayimanamar ni anenganena.—Mat. 9:35.
2 Chilakej cha Yesu ni Malejan Mend: Yesu kashadishap chisu nich kwiyandjik mu milong ya chipolitik ap mu mudimu wa kuyikwash kwau antu nich yom ya ku mujimbu mulong wa kuwap kwa chisak. Kalikinap yom yiwamp chakwel yimuzuwol ap yimukangesha kusal mudimu wend wa usey. (Luka 8:1) Ndiy wateka muchim wend pa kulejan rusangu ruwamp ra Want wa Nzamb mudi wawiy mulad umwing kusu ukupwisha chikupu milong yikwetau antu. Yesu wading nich mudimu ukash wa kusal ni chisu chikemp cha kuusal. Pasotau antu a mu Kapernaum anch Yesu ashakama kwinikwa, ndiy wayela in kwilej end anch: “Tuyany kwetu ni ku mal makwau nikalejaku kand ni kwinikwa; mulong chinech chawiy chinezila.”—Mako 1:38.
3 Kupwa kwa kuyifundish in kwilej end, Yesu wayituma nich yany yiney ya pakampwil anch: “Ulejanangany anch: ‘Want wa mwiur washikang kal pa chikas.’” (Mat. 10:7) Ndiy wayifundisha in kwilej end kutek yisakin ya Want pa ndond ya kusambish mu mwom wau. (Mat. 6:33) Mazu ma nsudiel ma Yesu mayilejay in kwilej end kurutu kwa kuya mwiur mamekesha patok yafanyidinau kusal. Ndiy walonda anch: “Chawiy en yangany kwen ku michid yawonsu uyikadishany in kwilej.”—Mat. 28:19.
4 Usey wa Want: Minsamb ya Yesu ya kusambish yading yimedin pa Want wa Nzamb, ni ndiy wayikasikesha in kwilej end kwimburij chilakej chend. Antu kakutwishap kupwish milong yikwetau ku usu wau ayinau. (Yer. 10:23) Ching kusu Want wa Nzamb wawiy ukeza kutumbish dijin dia Nzamb ni kudiosh chikupu mar ma antu. (Mat. 6:9, 10) Kuyifundish antu ‘akweta ushon ni kwakam mulong wa yom yitakanena yisadilau,’ uyakin wa Want kuyikwashin kwikal ni mwom wa musangar, upandikena katat ni kuyinkishin ruchingej rakin ra machuku ma kurutu.—Ezek. 9:4.
5 Yesu udandamedin kwikal nich usu mu kulejan rusangu ruwamp ra Want wa Nzamb, ni utwinkishin kashinsh anch ukutukwash. (Mat. 28:20) Ov, mu chilik ik mudimu wetu wa kulejan ufanyidina kwikal mudi chilakej chatushilay Yesu? (1 Pi. 2:21) Mu machuku minam ma nsudiel, tusalany amboku usu wetu wawonsu chakwel kwimburij piswimp nakash chilakej chashay Yesu mu mudimu wa kulejan!