Kangal Wayivuramenany Antu Akad Kusalang Mudimu
1. Ov, mutapu ik tufanyidina kuyikasikesh antu ikadila kal akad kusalang mudimu?
1 Ov, wij muntu kanang wikadila kal wakad kusalang mudimu? Pamwing ap walikin kal kuya ku chikumangan ni wapumbukin kal kwend. Ukutwish kusankanijan ni muntu winou mu mudimu wa kulejan ku chikumbu ni chikumbu. Tufanyidin kwijik anch muntu winou wakad kusalang mudimu udandamedin kwikal mukadivar netu mu spiritu. Tusotin kumumekeshin rukat retu ni kumukwash chakwel achirika ku chikumangen ni kudiay ‘Kafung ni Mwin kulam wa mipim yetu.’—1 Pi. 2:25.
2. Ov, mutapu ik tukutwisha kuyikasikesh antu akad kusalang mudimu?
2 Mekeshany Kuyibangin: Kwambamb mu wiswimp ku telefon ap kumwendil kukutwish kumukasikesh muntu wakad kusalang mudimu kwijik anch tumuvuramedinap. Chom ik tukutwisha kulond? Tukutwish kwikal in kumukasikesh kusutil ku kumwijikish kusu anch tukat kumuvurik. Dandamen kwisambin yom yisangareshina ni yikasikeshina. (Filip. 4:8) Tukutwish kwisambin mulong twasangeridina ku chikumangan chasutina. Tukutwish kand kumutazuk kwez ku chikumangan ap ku chitentam ni kumulamin ndond ya kushakam ap kumufutin motak.
3. Mutapu ik wamukwashau nambaz umwing kusambish kusal mudimu wa kulejan?
3 Mu teritwar umwing amutana nambaz umwing wading wakad kusalang mudimu mu mivu 20 ni kusut. Ap anch kasotap kwitiy dilejan dia Bibil, nambaz wamutana wadandamena kumwendil, ni kumushil magazet masu. Kupwa kwa chitentam cha distrik, in kulejan isambina manans mamwing majim pamwing ni nambaz winou wakad kusalang mudimu wa kulejan, ni wasambisha kand kusal mudimu.
4. Mutapu ik tufanyidina kushakam ni muntu usambishina kand kukumangan?
4 Anch Muntu Wachirik: Anch mukadivar wakad kusalang mudimu wasambish kwez ku yikumangan, ov, mutapu ik tufanyidina kushakam nend? Kupwa kwa kumulik chisu chikemp kudi in kwilej end, mutapu ik washakamay Yesu nau in kwilej end? Ndiy wayisambina nich musangar anch adi “akadivar” nend ni wayitekina ruchingej. Ndiy wayinkisha mudimu wa usey. (Mat. 28:10, 18, 19) Kupwa kwa machuku makemp, awiy “kalikap” kusal mudimu wa kulejan rusangu ruwamp.—Midimu 5:42.
5. Jimbul mikadil mutufanyidina kuyijikish amakurump piur pa muntu kanang udia wakad kusalang mudimu.
5 Kurutu kwa kusambish kwilej nend Bibil ap kumwit mukadivar wading wakad kusalang mudimu kuya mu mudimu wa kulejan, tufanyidin kukimb ukwash wa amakurump. Anch twasankan mwin kulejan wakad kusalang mudimu mu teritwar, tufanyidin kuyijikish amakurump chakwel amukwasha kukwatijan nich maswir mend.
6. Musangar ik tukutwisha kwikal nich mu kuyikwash antu akad kusalang mudimu?
6 Mudi muchilejena Bibil patok, ching kusu antu akata kujijaman djat ni kwisudiel awiy akeza kupand. (Mat. 24:13) Chawiy lel, yishinshikinany antu akutwisha kwipwakal ap kupumbuk. Anch twamekesh rukat ra Yehova nich kushimpish muchim kusutil ku kuyimekeshin antu inay kusanger kwakin, tukutwish kwikal nich musangar wa kuyiman kuchirikin mudimu wau utumbila ku mutambu wetu.—Luka 15:4-10.