Ov, Ukutwishany Kwandamin ku “Chis Chijim, Chakwel . . . [Usalany] Mudimu Ukash”?
1. Ov, “chis chijim” ik chitwanzuridinau mulong wa kusal “mudimu ukash”?
1 Chisu chamwazurilau kambuy Paul “chis chijim, chakwel . . . [asala] mudimu ukash”, ndiy wisakina sens nich mushiku chisu cha kudandamen kulejan kwikalap nchik akankuny avud. (1 Kor. 16:9) Nlel unou in kulejan Want piswimp 642000 mu mangand mawonsu andamidin ku chis chijim mulong asala mudimu ukash ku kukwikal ayibol a rawonsu.
2. Ov, mulong wak chiwapidil chisu ni chisu kushinshikin mwikadil wetu?
2 Mikadil Yikat Kukarumukang: Ap anch mikadil yetu ya katat yikutwish kutukangesh kusal mudimu wetu, mikadil yikat kukarumukang. Chawiy lel, chituwapidil chisu ni chisu kushinshikin mwikadil wetu ayinetu ni kangal twachingel mwikadil uwamp. (Mul. 11:4) Ov, udi nsand usotila kupwish katat shikol ya piur? Ov, udi nvaj ukweta an akusambisha kuya katat kamu ku shikol? Ov, udi piswimp ni kutambul pasho ku mudimu wey? Yikarumok yiney yikutwish ku kushil chisu ni kukutwishish kusal mudimu wa uchibol wa rawonsu. Nambaz umwing wadinga kwisambishil ni yikokujol ya ukash wa mujimbu wakwata mupak wa kusal uchibol pawanyishay mivu 89. Mulong wak? Mulong wasutisha muvu umwing pakad kwandam mu rupital, wiyova anch ukash wa mujimbu wend ukumutwishish kusal uchibol.
3. Mutapu ik witenchikiningau antu amwing chakwel ikala ayibol a rawonsu?
3 Ku mutambu wa Paul, wasota cha kusambish kuyendil akadivar nend a mu Korint. Chikalap nchik mwamu, ndiy watenchikirila ma program mend mulong wa rusangu ruwamp. Antu avud asadina uchibol wa rawonsu nlel unou afanyidin kutenchik yom yivud mulong wa kusal uchibol. Amwing apipeja mwom wau ni kushiken mu kwikal nich mudimu wa chisu chikemp mulong wa kuwanyish maswir mau ma mwom. Asangeridin chisend cha mudimu wau. (1 Tim. 6:6-8) Ambay amwing a uruu atenchika yom mu mwom wau mulong ikundj asala mudimu wa ku mujimbu ni kumushil mband mutapu wa kwikal chibol.
4. Chom ik tukutwisha kusal anch tukwet kashinsh anch tukutwishap kuwanyish masaa mitinau?
4 Kangal wov wom wakwel anch ukutwishap kuwanyish ma saa mitinau chakwel ushadisha chitongijok cha kwikal chibol. Kudi kuswir kwa kusal masaa maad kusu ap ni kusut pa dichuku. Anch ukwet kashinsh anch ukutwish kusal uchibol wa rawonsu, pakish kusal uchibol nkwash ngond umwing ap aad nich rutong ra kusal masaa 70. Yiney yikez kukukwash kuman musangar wa uchibol. (Kus. 34:8) Isamba ni antu asadina katat uchibol. Pamwing ap ni yawiy apandakana milong mudi yeyey. (Jinsw. 15:22) Mwita Yehova chakwel ayukisha usu usadila mulong wa kuwanyish mudimu wey wa kulejan.—1 Yohan 5:14.
5. Ov, mulong wak uchibol wa rawonsu udi mujikit wa usey?
5 Mujikit wa Usey: Kusal mudimu wa uchibol wa rawonsu kuletining yiyukish yivud. Kukez kukukwash kuman musangar ujim udiokila ku kupan. (Midimu 20:35) Uchibol ukez kukudish ukaliweny wey wa kulejan Dizu dia Nzamb dia uyakin mu kutentam. (2 Tim. 2:15) Ukez kwikal nich yisu yivud ya kuman ukwash wa Yehova mu mwom wey. (Midimu 11:21; Filp. 4:11-13) Uchibol ukez kand kukukwash ukudisha mikadil ya mu spiritu, mudi kujijaman, ni kukez kand kukukwash kwikal piswimp nakash nend Yehova. (Yak. 4:8) Ov, ukutwishany kwandamin ku chis chijim chinech cha mujikit wikalany ayibol a rawonsu?