Twongojijanany Etu Awonsu mu Ritiy
1. Ov, kwez kwa atulam in kwendangan kuletining chom ik cha pakampwil?
1 Kambuy Paul wafundina chikumangen cha in Rom anch: “Mulong nikat kunanikan kukumanany, chakwel ni kwinkany kupan kwa Spiritu ni en ukujamany. Chinech chawiy am nikwikal ni yenen mu kwongojijan ku ritiy retu.” (Rom. 1:11, 12) Kwez kwa katat kwa atulam in kwendangan kutukwashining twongojijan mu ritiy.
2. Ov, mulong wak kwez kwa kalam wa munyimuku akat ku kwijikishang kurutu?
2 Chikumangan: Kwez kwa kalam wa munyimuku akat ku kwijikishang ku chikumangen piswimp kurutu kwa angond asatu. Chinech chitwinkishining chisu cha kutenchik program wetu chakwel twisakina sens. (Ef. 5:15, 16) Anch usadin mudimu wa ku mujimbu, ukutwish pamwing ap kwit konje mulong usala mudimu wa chingand mu rubing riner. Antu amwing itenchikining chakwel asala mudimu wa uchibol nkwash mwi ngond wezinay kalam wa munyimuku. Anch watenchika kuya mu weny, ov ukutwish kuswimp program wey chakwel wikalaku rubing rinira?
3. Chom ik tufanyidina kusal ayinetu pakatay kwez kalam wa munyimuku chakwel tutambula dikasikesh?
3 Rutong ra kusambish ra kwez kwa kalam wa munyimuku ridi ra kupan dikasikesh dia pakampwil ni kwijidish mu mudimu wa chingand. Ov, ukutwish kwit anch usala pamwing nend ap pamwing ni mukajend anch udi ngatan? Kalam wa munyimuku ukat kusangerang kusal pamwing ni in kulejan kushalijan, ni antu akutwisha kwikal akad ronganyin ap aburedina ukaliweny mu mudimu wa kulejan. Etu awonsu tukutwish kwilej kusutil ku kulejan kwend mu chingand ni kusadil yiyul yawonsu yikutwishay kupan kwa urund. (1 Kor. 4:16, 17) Anch wamutazuk kudia pamwing ney ukez kutaninamu urund ukasikeshina. (Heb. 13:2) Mulong ma diskur mend mambaten nich maswir ma chikumangen, tufanyidin kumatesh nawamp.
4. Mutapu ik tukutwisha kumukasikesh kalam wetu wa munyimuku?
4 Kalam wa Munyimuku: Kambuy Paul wading mudi akadivar awonsu adingay ni kwendil ni ndiy wamana mar ni yikokujol, wading nich kuswir kwa kumukasikesh ni wayijikitisha. (2 Kor. 11:26-28) Chikumangen cha in Rom pachatesha anch Paul, wadinga muntu wa rukan, wading wezin kwinikwa, antu amwing aya kumusankan ku chiku cha Apius ku chintampu cha makilometre 74! “Paul chayimanay wamujikitish Nzamb, muchim wend washimp.” (Midimu 28:15) Ukutwish niyey kumukasikesh chilik chimwing kalam wey wa munyimuku. Mwinkisha “kalimish kawanyidina tupamp twaad” kusutil ku ukwash wey ku kwez kwend. (1 Tim. 5:17) Lejan ni mekesh kujikitish kwey kwa kashinsh mulong wa usu usadinay mulong weyey. Ndiy ni mukajend akez kusangar pakumanau ritiy rey, rukat rey, ni kujijamen kwey.—2 Tes. 1:3, 4.
5. Ov, mulong wak nlel unou etu awonsu tuswiridin dikasikesh?
5 Mu ‘machuku minam ma mar nakash,’ nany pakach petu kaswiridinap dikasikesh? (2 Tim. 3:1) Katat kwat mupak wa kusal mudimu pakad kujing pa rubing ra pakampwil pamwing ni kalam wa munyimuku. Etu awonsu—atulam in kwendangan ni in kulejan kumwing—tukutwish kwongojijan ku ritiy nich musangar. Mu mutapu winou tukez kand “[kwongojijan] pamwing umwing ni mukwau, ni kukudishan”—1 Tes. 5:11.