Tulejanany Ruchingej Retu ra Want

¹ Mu machuku minam makash ma nsudiel, mu mangand antu avud kakwetap ruchingej. (Ef. 2:12) Antu akwau atekin pakad manangu ruchingej mu mapit ma ku mujimbu, antakel a ukauntu, siyans wa katat, ni yom yikwau. Tukwet musangar mudi ik wa kwikal nich ruchingej rakin ra machuku ma kurutu, ruchingej “ridi mudi chom chikwadikina ku mupim, ridi rakin ni kudandamen”!—Heb. 6:19.

² Mwishin mwa wintakel wa Want wa Nzamb, divu dikez kwikal paradis. Akatish netu afila akez kusanguk. (Midimu 24:15) Uzweny, mafef, mayej, upal, ni rufu yikezap kwikalaku kand. (Kus. 9:18; Mat. 12:20, 21; Kubur. 21:3, 4) Yawiy yom yimwing ya kushilamu kwa Yehova yikeza kuwanyin piswimp ap. Ov, mwikadil ik wa ruchingej retu tuchingejina pakampwil?

³ Tulejanany Rusangu Ruwamp: Tufanyidinap kulam ruchingej ra Want ayinetu. Rukat ra Nzamb ni mutej netu ritubachikin kumwimburij Yesu ni kuyilej “atuzwendj jinsangu jiwamp, . . . kuyilej apitilau ya kuyikol, ni mwakupanyin mes kudi amputames, ni kuyikol alaminau.” (Luka 4:18) Kambuy Paul walejana rusangu ruwamp mu chiku ni kwawonsu kwadinga antu. Ndiy wading nich mudimu ukash wa kulejan. (Midimu 18:5) Kwimburij chilakej chend cha kulejan nich mushiku kukez kutuking ku “yisotijol ya mangand, ni rupit ra makasu,” yikata kushadish ruchingej retu ra win Kristu.—Marko 4:19.

⁴ Ruchingej retu ra Want rikatap kushadik pitukata kusankan antu alikina kwitiyij, akata kumekesh kusanger kukemp mu uruu wa Want, ap antu amekena anch atupompatin. “Tulamany kwitiyil kwa ruchingej retu rakad kushemunik.” (Heb. 10:23) Pakwez kitukatap kwov “wom [usany] wa katumb kawamp.” (Rom 1:16) Chitwishikin anch kwitiyij nich muchim umwing ni kujijaman kwetu kukez pamwing ap kuyibachik antu amwing atutesha.

⁵ Ap anch tufanyidin kushinshikin pa kusheshik kwa mikadil ya mangand yiwanyishina uprofet wa Bibil, tudap in kulejan ching kusheshik. Pakwez, mudimu wetu wimedin pa ruchingej retu ra Want—rusangu ruwamp ra Want wa Nzamb. Tulejanany amboku rusangu riner ruwamp nich kashinsh ni mushiku “wa kudandamen kwinoku kwa kuwanyish kwa ruchingej ni kushik kwisudiel.”—Heb. 6:11.