Endany Mudi Antu Ababela
1 Payipulau in kuta ansh anying kudi Yesu chakwel ikala in kwilej end, awiy ateka ntong jau kwinyim ni pakwez “awiy . . . amulondula.” (Mat. 4:18-22) Chisu Saul mwin Taris chitiyijay ni kusambish kuman, ndiy katonginap kusal dichuku dikwau kapamp kamwing “ndiy wamulejan Yesu mu masinagog anch, Udi Mwan a Nzamb.” (Midimu 9:20) Chisu chidandamedin kusut swa; anch chasut, chasut kal kamu chikupu. Chawiy lel, chidi cha usey kudi etu ‘kwend mudi antu ababela’ ni kushinshikin mutapu tusadidina chisu chetu.—Ef. 5:15, 16.
2 Chisu Cha Mar: Yisu tukweta lel ya kumusadin Yehova yikutwish kuburen diamashik. (Yak. 4:14) Kwikil muntu ap umwing ukutwisha kwipuk “chisu cha mar.” (Mul. 9:11) Chikwau kand, etu awonsu tukat kunanap, ni “machuku mayimp” ma upal matekina mupak ku yitukutwisha kusal mu mudimu wa Yehova tukutwishap kumipuk mu ditenchik dined dia yom dia katat. (Mul. 12:1) Pakwez, chidap cha manangu kulik kwipan kudi Yehova ap kuchingel yisu yiwamp mulong wa kujimbish mudimu wetu wa kulejan mu chilik chitwishikina katat. (Luka 9:59-62) Abraham watana chisambu mu mivu yend ya nsudiel, wafa “wading wananap kal nakash, [nich] mivu yivud” mulong wasadina mwom wend nich manangu, waupana wawonsu kudi Yehova.—Dis. 25:8.
3 Chisu Chidi Chiswimp: Tusotin niyetu kusadil chisu chetu nich manangu mulong “kwashal kal chisu chiswimp.” (1 Kor. 7:29-31) Piswimp ap ditenchik dined dia yom dikez kusheshik. Yisu ya kusal mudimu wa kukumangej kujim kwa amikoku pa chisu cha “kwangul” yikez kusut. (Kubur. 14:15) Tufanyidin kubabal kangal twalikidil yakamish ya mwom ni kuzuwol kutushadishina chisu cha kusal mudimu. (Luka 21:34, 35) Chikez kutusangaresh nakash anch twatongin pa yom twasadina ni kwijik anch twasutishin chisu chawonsu mu mudimu wa kwangul!
4 Tufanyidin kudimuk chisu chawonsu chakwel kangal tushadisha chisend chetu chisangareshina cha mudimu chitukutwisha kwikal nich. Tukwatany mupak wa kusal yawonsu yitukutwisha kusal chakwel kumusadil Yehova “pituteshina dizu dia Mukand wa Nzamb ulondila mulong wetwetu anch: ‘Ilel unou.’ Salany mwamu.” (Heb. 3:13, Manswik Masu) Anch twasal mwamu, tukez kumekesh ayinetu anch tudi chakin kamu nich manangu, mulong “wawonsu ukusala rukat ra Nzamb ushich chikupu.”—1 Yohan 2:17.