Panany Magazet Makata Kumekesh Uman wa Uyakin
1. Ov, Chinong cha Kalam ni Réveillez-vous ! yikwet mudimu ik?
1 Chinong cha kalam chilejena Want wa Yehova ni gazet Réveillez-vous ! yashadil kal pa ndond ya kusambish mu mudimu wa kulejan ni kwikadish in kwilej. (Mat. 24:14; 28:19, 20) Tusangaredin kupan magazet minam maad pakad kujing pa chisu chifanyidina pitukata kwipan mu milad kushalijan ya mudimu wa Want.
2. Ov, kuswimp ik kwamekana mu Chinong cha Kalam ni mu Réveillez-vous !, ni mulong wak?
2 Mu kusut kwa mivu twamen kuswimp mu kujimb ni mu yom yidiamu mu magazet ni mu mitapu tusadidila mulong wa kumapan. Kuswimp kwinoku akusala nich chitong cha kusal anch magazet mikala masangareshina nakash ni ma ukwash, chakwel rusangu ra Want rishika ku michim ya ‘antu awonsu chakwel apanda ni kwijik uyakin.’—1 Tim. 2:4.
3. Ov, mutapu ik ukusadilau magazet mu mudimu wa kulejan?
3 Kudiosh pa Chiwong 2006, twasambisha kusadil misamb kushalijan pa kupan nimero umwing wa ngond ni ngond wa Réveillez-vous ! Katat tukusadil kand chilik chimwing cha misamb pa kupan nimero umwing kusu wa ngond ni ngond wa Chinong cha Kalam Chilejena Want wa Yehova mu mudimu wetu wa kuyilej antu awonsu. Minsamb ya chilikej mulong wa gazet ni gazet yiding pa paj wa nsudiel wa Mudimu Wetu wa Want. Yiney yisu yivud yikasikeshidining umwing wa mitu ya milong ya kusambish mu gazet pakwez katat mitu yikwau ya milong yiyisangareshina antu avud akez kuyikasikeshin. Minsamb ya chilikej yifundinau chitwishikin kuyisadil nawamp nakash anch twij nawamp mutu wa mulong ni kusadil mazu metu ayinetu mulong wa kwambatanish minsamb yiney nich teritwar wetu.
4. Ov, mulong wak chidi cha ukwash kusadil minsamb yikwau kuwejaku pa yaad yilejenau mu Mudimu Wetu wa Want?
4 Ap anch mu Mudimu Wetu wa Want mudi yiyul yaad mulong wa gazet ni gazet, ukwet want ipau wa kusadil minsamb yawonsu yishalijadina. Diyingish dimwing dia kusal mwamu dikutwish kwikal anch mulong umwing wa mitu yikwau ya milong ukutwish kuyisangaresh antu avud adia mu teritwar wey. Ap chikutwish kwikal anch wiyovil anch ukutwish kusadil minsamb yiwamp nakash mu kusadil mutu wa mulong ukusangareshina nakash.
5. Kurutu kwa kurijek minsamb mulong wa gazet ulejenau kupan, yik ufanyidina kusal?
5 Mutapu wa Kurijek Minsamb Yey: Chakusambish pa yawonsu, ufanyidin kwijik nawamp mutu wa mulong utondina mulong wa kusadil. Ukutwishap kwijik chisu chawonsu mutu wawonsu wa mulong ulejenau mu gazet kurutu kwa kusambish kumusadil mu mudimu wa chingand. Pakwez, ufanyidin kumekesh kuzangurok ni win-yakin pantaliken nich mitu ya milong utondina kusadil. Ukutwish kusal mwamu ching anch wij nawamp jinsangu ulejena.
6. Ov, mutapu ik tukutwisha kurijek minsamb yetu ayinetu?
6 Cha kaad, ikal muntu uswapela kuswimp piurijekina mazu mey ma kusambish. Chipul chifanyidina chilangwishina kusanger chovijadina nich mutu wa mulong chitwishikin kuchisadil mulong wa kusambish mambamb. Chisu chawonsu, chingejin usu wa Dizu dia Nzamb mulong wa kushik ku muchim. (Heb. 4:12) Tond verse ufanyidina ulejena mutu wa mulong usambishina kwisambin, nakash kamu verse ujimbwilau mu mutu wa mulong ulejena. Shinshikin mutapu wa kwambatanish verse nich mutu wa mulong.
7. Mutapu ik ukutwisha kuwapish nakash minsamb yetu?
7 Pa Yisu Yawonsu: Chakwel minsamb yikala chakin kamu nich ukwash, chifanyidin kuyisadil. Ipana pamwing nich chikumangen mu kupan uman nich magazet diampos. Pan ma gazet kudi antu itiyijina kal mikand yikwau. Pan magazet chisu chawonsu kudi mwin kwilej ney Bibil ni antu akwau akutwisha kwikalaku piukata kuyichirikin. Ukutwish kupan magazet kudi antu wisambina nau piuyila kuland, piudia mu weny, ap piuchingedina mu biro wa mwingang. Wapish minsamb yey piuyisadidina mwin ngond wa kabuj.
8. Ov, mwin njil ik Chinong cha Kalam ni Réveillez-vous ! yidi ya pakampwil?
8 Chinong cha Kalam ni Réveillez-vous ! yidi ya pakampwil. Madi magazet mamutumbishina Yehova Sakatang wa mangand. (Midimu 4:24) Mayikasikeshin antu nich rusangu ruwamp ra Want wa Nzamb ni makasikeshin ritiy mudiay Yesu Kristu. (Mat. 24:14; Midimu 10:43) Chikwau kand, mababeshin piur pa yinship ya mangand yiwanyishina uprofet wa Bibil. (Mat. 25:13) Yikwasha antu adia mu teritwar wey atana ukwash mu magazet minam kusutil ku kwirijek mulong wa kumapan pa yisu yawonsu yifanyidina!
9. Ov, mutapu ik tukutwisha kutek mufulandal mulong wa kuyichirikin antu?
9 Ang watwish kupan gazet, ap anch wisambin ching kusu mambamb ma urund pa milong ya muspiritu ni muntu kampand, irijeka nich chipul ap chitongijok chibachikina ku kutongijok chikutwisha kukwanzuril njil mulong wa kumuchirikidin kand ni wisamba nend yom yikwau ya muspiritu. Anch tukwet mushiku wa kukun mbut ya uyakin, tukutwish kwikal nich kashinsh anch Yehova ukufungul michim ya antu asotina win-yakin chakwel kumwijik ni kumusadil.—1 Kor. 3:6.