“[Lejanany] Rusangu Ruwamp”
1. Ov, Rusangu ruwamp ik tufanyidina kulejan?
1 Tukwet chisend cha “kulejan rusangu ruwamp ra ranaken ra Nzamb,” mu mangand maburedina rusangu ruwamp. (Mid. 20:24) Mwinomu mudi kwijikish antu anch piswimp ap “machuku ma kwisudiel” ma kwez kushil ndond ku mangand masu matentamina ma Yehova, mwinimwa, “yom yikuru [yikez] yasutil kal.” (2 Tim. 3:1-5; Kubur. 21:4) Pa chisu chinicha kukwikalap mayej. (Is. 33:24) Akatish netu afila kal akubudik mu jinzay ni a kwinung ku dijuku ni ku arund. (Yoh. 5:28, 29) Divu diawonsu akez kudikarumun chakwel dikala paradis upandakena kuwap. (Is. 65:21-23) Chinech chidi kwau chilakej chikemp cha rusangu ruwamp tufanyidina kulejan!
2. Ov, mulong wak chisu cha Chivurikish chidi chisu chiwamp nakash cha kulejan rusangu ruwamp?
2 Ngond wa Rish, Ndol, ni Ndol-Mem akez kutwinkish yisu yiwamp ya kulejan rusang riner ruwamp. Mu angond inay mu jindond jivud pa mangand mwikadil ni kulep kwa muten kukwashining kusutish yisu yivud mu kulejan. Chikwau kand, chisu cha usey nakash pa muvu, Chivurikish, akez kuchivurik pa mangand mawonsu kupwa kwa kwandam kwa muten Diampos, Rish 22. Katat chidi chisu cha kusambish kwirijek mulong wa kujimbish mujikit wetu.
3. Ov, chom ik chikutukwasha kupandikesh mujikit wetu mu majuku?
3 Uchibol Nkwash: Ov, ukutwish kurijek program wey chakwel usala uchibol nkwash mwi ngond umwing, aad ap mu angond awonsu asatu? Sadil chisu kanang pa dilejan diey dia dijuku diezina chakwel kushinshikin pa yom yiney. Nich kovijan kuwamp, chidi chimwing ap yivud ya dijuku yikutwish kusal uchibol nkwash. (Jinsw. 15:22) Yiteka milong yiney mu malembil, ni tal mutapu uyukishinay Yehova usu usadina. (Jinsw. 16:3) Ap anch kwikil muntu ap umwing mu dijuku ukutwisha kusal uchibol nkwash, yid yawonsu ya dijuku yikutwish kwitekin rutong ra pakampwil chakwel kuwejinaku kulejan kwau mu mudimu pakatau kusal pamwing nau atwishina kusal mudimu wa uchibol.
4. Ov, mutapu ik tukutwisha kwitekin program wa yom tusadina chakwel tusala uchibol nkwash anch tudi mu mudimu wa ku mujimbu wa chisu chawonsu?
4 Anch ukwet mudimu wa chisu chawonsu, program muwamp ukutwish kukukwash usala uchibol nkwash. Pamwing ap ukutwish kusadil chikunku cha chisu chey cha pa kupim pa midi chakwel ulejan. Ap ukutwish kutambul teritwar wey piswimp ni kwolikwey ap ni ndond yey ya mudimu ni kulejan mwinimwa saa umwing kurutu ap kupwa kwa mudimu. Ukutwish kwitekin chisu chikwau mu program wey kusutil ku kushemunin mijikit yakad usey kuyitek pa ngond mukwau ni kusutil ku kusal machuku ma kabuj mu kulejan diampos ni diarubing. Antu amwing atwisha kusend dichiku dimwing ap maad ma chisu cha konje mulong wa kwipan mu mudimu wa chingand.
5. Ov, mutapu ik ukutwisha kumukwash ipal ap chilim chakwel asala uchibol nkwash?
5 Anch udi ipal ap chilim ap uburedin usu, ukutwish kusal uchibol nkwash kusutil ku kusutish chisu chikemp dichuku ni dichuku mu kulejan. Mwita Yehova akwinkisha “ukash upandakena ukash wawonsu.” (2 Kor. 4:7, Manswik Masu) Nambaz umwing wading utwishina kusal uchibol nkwash padingay ni mivu 106! Nich ukwash wa anamakwend in Kristu ni antu akwau mu chikumangen, wading ni kulejan ku chikumbu ni chikumbu, kuyichirikin antu, kuya kutakel malejan ma Bibil, ni kwipan mu milad yikwau ya kulejan. Ndiy wapana ukwash mu kusambish kwa malejan ma Bibil ni antu dikum. Walonda anch: “Pinatongina piur pa chisend chamushena nading nich cha kusal mudi wa uchibol nkwash, muchim wam wizwila nich rukat ni kumujikitish Yehova, Mwanend, ni dirijek Diend dia rukat. Nisotin chakin kamu kulond anch ‘nakujikitish kal, Yehova!’”
6. Mutapu ik chitwishikin kudi ansand ababatishau achidia ku shikol kusal uchibol nkwash?
6 Anch udi nsand wababatishinau kal uchidia ku shikol, ni yey ukutwish kufundish dijin diey mudi chibol nkwash. Mudi antu asadina mu mudimu wa chisu chawonsu, ukez pamwing ap kusadil chakusambish diampos ni diarubing mu program wey mulong wa kulejan. Pamwing ap ukutwish kand kuya kulejan chisu chimwing ap kupwa kwa kwilej ku shikol mu machuku mamwing. Ov, kudi chisu cha konje ku shikol chiukutwisha kusadil mulong wa kwipan mu kulejan? Anch usotil kusal uchibol nkwash, yilejamu anvaj ey.
7. Chom ik amakurump akutwisha kusal chakwel atunga mushiku mulong wa kulejan pa chirung cha Chivurikish?
7 Kudishany Mushiku: Amakurump akutwish kusal usu wa kukudish mushiku wa chikumangen kusutil chilakej chau. (1 Pi. 5:2, 3) Akutwish kutenchik program wa yikumangan yikwau ya mudimu wa chingand mulong wa antu akuya mu kulejan pamanch nakash, kupwa kwa kwilej ku shikol, ap kupwa kwa mudimu. Kalam wa mudimu ufanyidin kwikal nich kashinsh anch in kulejan awanyishina yitinau ayitondin mulong wa kutakel ni kudi teritwar uwanyidina pamwing nich magazet ni mikand ya kusadil mu angond inay a mujikit wa pakampwil.
8. Chom ik twilejina kusutil yashikena mu chikumangen chimwing?
8 Mu chikumangen chimwing, amakurump asambisha kukasikeshin mudimu wa uchibol nkwash angond avud kurutu. Adandamena kulejan ku chikumangen mbing ni mbing piur pa mutapu in kulejan avud itiyija kusal uchibol nkwash. Chinech chayinkisha antu asotina kuwejinaku kwipan kwau mu kulejan kashinsh anch akutambul ukwash uwamp. Yikumangen yikwau ya mudimu wa chingand ayitenchika pamanch nakash ni urel. Chibudikin chading anch in kulejan 53 asala uchibol nkwash mwi Ndol, piswimp ni chikunku cha chikumangen!
9. Mulong wak chirung cha Chivurikish chidi chisu chiwamp nakash, kudi antu awanyishina yitinau, mulong wa kusambish kulejan rusangu ruwamp?
9 Yikwashany Akwau Alejana: Pakatau antu asu ni ansand kuwanyish yitinau mulong wa kusambish kulejan, akutwish kuyit asala mudimu wa chingand pamwing ni in kulejan akweta ukaliweny. Chisu chinech chikutwish kwikalaku pa chirung cha Chivurikish chisu chikezau antu avud mu chikumangen kutwish kupandikesh mujikit wau. Ov, ukwet mwin kwilej Bibil uyila kurutu wambatanisha kal mwom wend nich yijil yitentamina ya Yehova? Ov, ukwet an apamina ayila kurutu pakwez kand kal ikala in kulejan? Anch antu inay amekeshin rusot rau ra kwikal in kulejan akad kubabatishiu ni umen anch awanyishin yitinau, mwijikisha chad mukurump umwing. Kalam ntakel ukusal mulong wa amakurump aad isamba ney pamwing ni mwaney ap mwin kwilej ney pa mulong winou.
10. Chom ik chikutwishau kusal amakurump chakwel ayikwasha antu akad kusalang?
10 Angond ezina kurutu akwikal kand chisu chipandakena kuwap kudi antu adinga akad kusalang chakwel kuwanyish mujikit wau pamwing nich chikumangen. Kalam wa Dilejan dia Buku ni amakurump akwau afanyidin kusal usu nakash mulong wa kuyendil antu inay ni kuyinkish diladikij dikash dia pakampwil chakwel asala nau mu kulejan. Anch ading akad kusalang mu chisu chilemp, amakurump aad a kwisamb nau cha kusambish mulong wa kujingunin anch awanyishin yitinau—km 11/00 p. 3.
11. Chom ik chidia chimekesh chijim nakash cha “ranaken ra Nzamb?”
11 Irijekany Mulong wa Chivurikish: Difut didi chimekesh chijim cha “ranaken ra Nzamb.” (Mid. 20:24) Tutikit twa antu asangaredina mu mangand mawonsu tukez kukumangan Diampos, Rish 22, kupwa kwa muten kwandam, mulong wa kusal Chivurikish cha rufu ra Kristu. Tusotin kuyitazuk ni kuyikwash antu akweta michim yiwamp chakwel akumangana pa chisu chinech cha usey chipanina uman wa ranaken ra Yehova mulong wa antu.
12. Ov, nany tufanyidina kutazuk ku Chivurikish?
12 Sal dipang dia antu usotina kutazuk. Pakad kwidjidjek pa dipang diey pakwikal anamaku, amutej, ambay a mudimu ap a shikol, in kwilej nau Bibil pasak ap katat, ni antu akwau awonsu ukata kwendilang chisu ni chisu. Anch antu amwing utazukina akwet yipul piur pa Chivurikish, ukutwish kutan ukwash mu kusadil mutu wa mulong udia mu apendis wisambidina Yakudia ya Urel ya Nsalejetu pa paj wa 206-208 wa buku Chifundishinay Bibil. Chinech chikutwish kwazuril njil ku dilejan dia Bibil, mulong chikez ku kwinkish chisu cha kulejan mukand tukata kusadil mulong wa kutakel malejan ma Bibil.
13. Mutapu ik Yehova wayukishay usu wa in kulejan aad akwata mupak wa kuyitazuk antu akwau ku Chivurikish?
13 Nambaz umwing wasala dipang dia majuku 48 ma kutazuk. Padingay ni kuyitazuk, wading ni kujimish majin mau ni kufund dichuku dia ngond diayitazukay. Wadinga ni musangar mudi ik pezau antu 26 atazukay ku Chivurikish! Mukadivar umwing wadinga nich makashing mend watazuka muntu umwing wadinga ni kumusadil mudimu wadinga mwimpel pasak. Muntu winou wakumangana ni kupwa walonda anch: “Nileja kal yom yivud piur pa Bibil mu chisu chimwing kupandakanamu ni yinileja mu mivu 30 yinasala mu Katolik.” Piswimp ap kupwa kwa Chivurikish, ndiy witiyija dilejan dia buku Chifundishinay Bibil.
14. Ov, kampany ik wa pa mangand mawonsu ukusambisha pa Rish 1?
14 Kampany: Kusambishin pa Diampos, Rish 1, ni kushik ku Rish 22, diladikij dia pakampwil ku Chivurikish akez kudipalangesh mu mangand mawonsu. In kulejan awonsu akusot kwipan nakash mu kampany winou wa usey. Chiwapidil kumwinkish mwin chikumbu dipapel dia diladikij amwinend pa ndond pa kudisha ku chis. Pakwez, anch ukwet teritwar mujim, amakurump akutwish kutal anch mapapel ma diladikij akutwish kumasha nich nkeu ku yikumbu kwakad antu. Diampos ni diarubing tukupan kand magazet ma katat.
15. Mutapu ik tukutwisha kupan dipapel dia Chivurikish?
15 Mulong tukwet chisu chikemp cha kupalangesh mapapel ma diladikij, chiwapidil kwikal nich mazu ma kusambish nich misamb mu wiswimp. Ikal murund ni mwin kuzangurok. Ukutwish kulond anch: “Tusotin ku kwijikish anch, akutazukin ey ni yid ya dijuku diey ni arund ney ku chinship cha usey chikusadika pa Rish 22. Dined diawiy dipapel diey dia diladikij. Afundin kachom pa kachom pa dipapel dined.” Mwin chikumbu ukutwish kwikal nich yipul. Ap ukutwish kwitiy dipapel dia diladikij ni ap kulond anch ukwez. Shinshikin kusanger kumekeshinay, ni irijeka mulong wa kumuchirikin.
16. Chom ik chashikena chimekeshina usey wa kampany wa kuyitazuk antu adia mu teritwar ku Chivurikish?
16 Mu muvu wasutina isalay umwing watana dipapel dia diladikij ku chis chend. Ndiy wakwata mupak wa kukumangan pakwez wafanyidina kwit mbil kudi mukurump wend sergent. Pamulejay sergent dipapel dia diladikij, sergent wikuchika zoong, ni kupwa walonda anch anvaj end adi Atuman a Yehova ni ndiy wading ni kukumangan pasak pamwing nau. Kamwinkishap isalay ching kusu mbil ya kukumangan pakwez sergent waya nend pamwing ku Chivurikish!
17. Mutapu ik tukata kumekesh anch kitwaburedinap ranaken ra Nzamb?
17 Mekeshany Kujikitish: Pashejina piswimp chisu cha Chivurikish cha muvu wa 2008 muntu ni muntu pakach petu ufanyidin kutongin amboku pa ranaken ra Yehova mulong wetwetu. Kambuy Paul wafunda anch: ‘Tukat kunilembilany chakwel kangal utambulany ranaken ra Nzamb ni kuburen rutong.’ (2 Kor. 6:1) Mutapu ik tukata kumekesh anch kitwatambulap ranaken ra Nzamb ni kuburen rutong? Paul wafunda anch: “Pakwez mu yom yawonsu tusotil kwimekesh mudi in mudimu a Nzamb.” (2 Kor. 6:4) Pakwez, tumekeshin kujikitish kwetu mulong wa chipan cha Yehova kusutil ku mwikadil wetu uwamp ni kusutil ku kulejan rusangu ruwamp nich mushiku. Pa chirung chinech cha Chivurikish tukwikal nich chisu chiwamp nakash cha kujimbish mujikit wetu, kupan nawamp uman wa rusangu ruwamp.
[Picture on page 3]
Nany Ukutwisha Kwikal Pakach pa Antu Akutwisha Kusal Mudimu wa Uchibol Nkwash?
◼ Majuku
◼ Antu asadina mudimu wa ku mujimbu wa chisu chawonsu
◼ Amapal ni ayilim
◼ Antu ilejina ku shikol
[Picture on page 4]
Mu Kwangan Mapaper Ma Diladikij dia Chivurikish:
◼ Lejan mu wiswimp; londany nich kuzangurok
◼ Fund antu asangaredina ni yichirikina
◼ Pan magazet diampos ni diarubing