Etu Tukat Kubumon Mpwembu Jikash
1 Mu kusut kwa yitot ya mivu, Satan watunga kal jimpwembu mu michim ni mu manangu ma antu avud nich malejan ma makasu. Wapalangesha kal malejan mudi Usatu, mupim wakad kufang ni karung ka misiny. Upalangeshin kwidjidjek piur pa kwikalaku kwa Sakatang ni ntad piur pa ukinakin wa Bibil. Katond ka ulomb wa yikit ni wan a ngand jidi jimpwembu jikwau jikash jiyikangeshina antu kutesh uyakin. (2 Kor. 4:4) Ov, mutapu ik tukutwisha kubumon yitiyij yiney yajika kal mij?—2 Kor. 10:4, 5.
2 Yovil Yikwachikin: Yitiyij ya chirelijon yitiyijinau antu anch yidi yakin yayandama kal nakash. Antu amwing itiyija kurumbuk kwinoku kudiosh kamu mu wanikanch wau. Chakwel kuyikwash antu mudi inay, tuswiridin kulond mu mutapu umekeshina anch tulimishin yitongijok yau.—1 Pita 3:15.
3 Tukutwish kuyilimish antu inay kusutil ku kuyilik arumburila yitiyijinau ni mulong wak uyitiyijinau. (Yak. 1:19) Pamwingap itiyijining malejan ma mupim wakad kufang mulong afisha kal akatish nau ni akwet impu yikash ya kuyiman kand. Ap akat kusal misambu ya machuku matumbila mulong akatining kushakam pamwing ni majuku mau pa machuku minam. Kutesh yilondilau kukutwish kwatwinkish njingunin piur pa yovil yau ni kukutwish kwatukwash tumana mutapu uwamp wa kuyakul.—Jinsw. 16:23.
4 Tumwimburijany Yesu: Yesu watushila chilakej chiwamp pa chisu chamwakulay ikundj wadinga wija nawamp Chijil. Yesu kamwakulap kapamp kamwing, ing ikundj winou wela kulik mulong wa yitiyij yend yadinga yikatinay. Pakwez, Yesu wajimbula Mifund, wamwipula alonda yitonginay, ni wamukwasha atongijokina kusutil ku chishimu.—Luka 10:25-37.
5 Dizu dia Nzamb didiap mwi njil ap yimwing chilik chimwing nich malejan ma makasu. (Heb. 4:12) Kusutil ku kupukun ku michim yau nich kushimpish, tukutwish kuyikwash antu alika makasu ni itiyija uyakin ukutwisha kuyikol.—Yoh. 8:32.