Tusangerany Dilejan Dietu dia Buku Chom ik Chakin Kamu Chifundishinay Bibil?
1 Chikunku chisangareshina cha Chitentam cha Distrik “Kumuziyil Nzamb” chadinga kubudikin kwa buku Chom ik Chakin Kamu Chifundishinay Bibil? Tukumusadil chipandakena kurutu oku mu mudimu wetu wa chingand, nakash chisu tutakedila malejan ma Bibil ma ku chikumbu. Chawiy lel, tuswiridin kwikal iyijidishina nawamp nich buku musu winou. Chinech chikwikal chiswapela mulong tukumwilej ku Dilejan dia Buku dia Chikumangen kusambish pa rubing ra Kafumpul 4, 2008.
2 Kalam wa Dilejan dia Buku dia Chikumangen ukuta muchim ku yipul yidia kwinsambishil kwa shapitre ni shapitre. Kupwa dilejan akuditakel nich kusadil yipul yidia kwishin kwa paj. Mifund yisendina yitongijok yijim akuyitang ni kuyisambin, ni mushet “Chifundishinay Bibil” udia kwinsudiel kwa shapitre ni shapitre ukwikal wa ukwash mu kuchirikin malejan mulong mushet ukwet yakul ya Mifund ku yipul ya kusambish ya shapitre. Ukusangar kushimunin mulong buku winou ukwet mitu ya milong mu mutapu wovikena, upipela, ni usangareshina.
3 Apendis wa buku winou ulejen chom ni chom pa jinsangu kushalijan. Tukutwish kusadil malejan minam chisu chiswiridinau in kwilej Bibil jinsangu jivud pa mitu ya milong kampand. Yikunku ya apendis akuyisambin yisu yimwing chisu cha Dilejan dia Buku dia Chikumangen. Malejan mawonsu ma apendis pa mutu wa mulong akumatang kudiay mwin kutang wa dilejan dia buku, ni mitu ya milong yilemp akutwish kuyilej mu yikunku. Yipul ya dilejan yidiap mu apendis. Pakwez kalam ukutwish kubudish patok yirumburil ya antu akumangena kusutil ku kwipul yipul yikasikeshidina manans majim.
4 Malejan ma buku Chifundishinay Bibil makuya swa pa Dilejan dia Buku dia Chikumangen. Katwitinap kuya swa-swa chisu twilejina buku winou nau antu akwau, nakash anch akwet ronganyin rikemp ra Bibil ap anch kakwetap. (Mid. 26:28, 29) Mu chisu cha malejan ma Bibil ku chikumbu, tukwikal nich kuswir kwa kwisambin mifund nakash, kurumburil yipich, ni yikwau. Rutong rey rikal ra kukumangan rubing ni rubing ni kwipan nakash mu dilejan dietu dia buku Chom ik Chakin Kamu Chifundishinay Bibil?