Dilejan dia Bibil dia Panrey ni dia Dijuku Didi dia Usey!
1. Kubangin ik kutubangidina Chisak Chitakedila pa chisu chinech, ni mulong wak?
1 Mudi muchadinga mu mivu chitot ya kusambish, Chisak Chitakedila chikwatiken mulong wa antu a Yehova. (Mid. 15:6, 28) Mar makash mashej kal piswimp, chidi cha usey anch mwin kulejan win mwawonsu wa Want ikala mu urund wend ni Yehova. Ov, mutapu ik ukeza kusadil chisu chadinga cha Dilejan dia Buku dia Chikumangen? Atukasikeshin etu awonsu chakwel tusadila chisu chinech mulong wa kwifukwil mu dijuku. Kusadil kwa manangu kwa chisu chinech kukez kututwishish kusand nakash mu Dizu diapipelay Nzamb ni kuna mem ma mwom madiamu.—Kus. 1:1-3; Rome 11:33, 34.
2. Mutapu ik ufanyidina kutenchik kwifukwil kwetu kwa mu dijuku urel?
2 Urel wa Kwifukwil mu Dijuku: Mitu ya majuku ayikasikeshin chakwel yisenda yisend yau yisend kurutu kwa Yehova chakwel anch, program wa dilejan dia Bibil mu dijuku udi wa usey ni amulondwil. (Kuv. 6:6, 7) Akadivar ni anambaz ajich akad yisend ya majuku akez kutwish kusadil nawamp chisu chinech mulong wa dilejan dia Bibil dia panrau ni mulong wa kukimbijol. Chidi cha usey kudi etu awonsu ‘twilamina chisu cha muten’ mulong wa kwilej ni kutongijokin chakwel “machuku mayimp.” —Efes 5:15, 16.
3, 4. Yiyul ik yitwinkishinau piur pa mikand yitukutwisha kusadin, nich rutong ik.
3 Yom ya Kwilej: Index des publications Watch Tower ap CD-ROM Watchtower Library ukutwish wakukwashany jinsangu jikutwisha kwikal dilejan dia Bibil dien dikal chisu chisangareshina. Majuku makutwish mashinshikin mitu ya milong yidia mu Chinong cha Kalam mudi mutu wa mulong ulondila anch “Musul wa Musangar mu Dijuku,” “Yilejany Anen,” ni “Malejan Kudi Ansand Etu.” Ni, mu Réveillez-vous ! mudi mutu wa mulong “Les jeunes s’interrogent” ni mitu yikwau yisangareshina nakash yisambidina yom yatangau.
4 Kutang Bibil pakad kujing kukutwish kwakasikeshin yijidik ya Nzamb ni malejan mend mu manangu ni michim ya yid yawonsu ya dijuku. (Heb. 4:12) Pa yisu yikwau, ukutwish watalany ni kwisambin video umwing wapalangeshau mu dirijek. Chisu chidi cha usey mulong kwisamb kwa manangu ni kubudish yitongijok. Ov, mulong wak ulikina kuyipul yid ya mu dijuku diey yikuleja yom yisangaredinau?
5. Mulong wak kwilej Bibil panrey ni mu dijuku kudi kwa usey mu mwom wetu wa katat?
5 Chidi cha Usey Katat: Kukasikesh muspiritu wetu kukez kutwikadish tayad chakwel ‘twimanany dang ni tweza tumana dipandish dia Yehova.’ (Kub. 14:13) Anvaj aswiridin umutakel wa Nzamb chakwel atwisha kuyilil an “mu [chirung chinech] chipengamina ni chirumbangena.” (Filip. 2:15) An aswiridin ukwash chakwel ara nich kwijond kwa mikadil kudia nlel ku mashikol. (Jinsw. 22:3, 6) Ambay atijadina akusal nawamp anch akasikesh “moj wa chibab” wau ni Yehova. (Mul. 4:12) El, tusadilany nich manangu chisu chishadilaku chakwel twitunga ayinetu mu “ritiy . . . ritumbila nakash”!—Yuda 20, Manswik Masu.