Witekidinany kal Chisu cha Kwilej Bibil?
MUVU wadiap ou, Chisak Chitakedila chatuleja mutapu watenchikinau program wa yikumangan ya chikumangen chakwel twikala nich chisu chijim cha kwilej Bibil ni minsamb mu dijuku. Anch udi mutu wa dijuku, shinshikin anch ukwetany program muwamp wa kwilej Bibil mu dijuku pamwing ni mukajey ni aney. Antu aad atijadina akad an afanyidin kusadil chisu chinech chakwel ileja Bibil pamwing. Akadivar ni anambaz ajich akad yisend ya dijuku akutwish asadil chisu chinech mulong wa kwilej kwau Bibil ayinau.
Antu avud asangaredin nakash ditenchik dia kwikal nich urel wa Difukwil dia mu Dijuku. Chilakej, Kevin, udia mukurump, wafunda anch: “Kulond anch ‘wajitishany’ kuwanyidinap kamu mulong wa kusot kumekesh mutapu utwovila mu chikumangen. Chitudia amakurump, twisambidin piur pa mutapu utusadidila urel watwakadia ni cha kusal mulong wa kusal mudi kamu mutwitina Chisak Chitakedila kusal—kwilej ni majuku metu.”
Nfumwend a Jodi, udi mukurump ni wafunda anch: “Tukwet anetu ayangadim asatu, umwing ukwet mivu 15, ou mivu 11 ni mukwau ukwet mivu 2. Twasokidin katat mu chikumangen chikata kusadil dizu dia yijingidij. Chikat kutwish chisu chivud chakwel kurijek yikumangan yawonsu. Katat, mulong wa ditenchik dined, twikadilaku kal ni chisu chikwau cha urel chitutwishishina kukasikeshidin pa difukwil dia mu dijuku!”
John nenday JoAnn, atijadina, ading ayibol a rawonsu, afunda anch: “Dilejan dietu dia Bibil mu Dijuku didi dia pa chipatu mulong twadinga tufanyidin kukimb pa chisu cha kuditek mulong wa mijikit yivud ya chikumangen. Pakwez ditenchik dined dia katat didi chipan chidiokila kudiay Yehova chitutudishina muspiritu—anch twasadil chisu mu mutapu utufanyidina kuchisadil.”
Tony, mukadivar udia mujich ukweta mivu 20 ni kusut, witekina urel wa Diakaad mulong wa kwilej kwend amwinend. Wadinga ni kusadil yisu yikwau mu rubing mulong wa kurijek yikumangan ya chikumangen. Pakwez, Tony ulondil anch: “Nikat kuchingejin ni impu yikash Diakaad diawonsu.” Mulong wak? “Urel wa dichuku dined uding chisu cham cha pakampwil ni Yehova.” Tony urumburil anch: “Mu asaa piswimp aad, nikat kwilej jinsangu jikasikeshininga urund wam ni Yehova. Kwikal nich chisu chijim cha kwilej kukat kwintwishish nitongijokina pa maverse ma Bibil minitangina.” Kwikala chibudikin ik? “Chiyul cha Yehova chishindamin kamu mu muchim wam kupandakanamu muchadinga pasak.” Ov, ukutwish wikal chilakej? “Natanga mu buku Étude perspicace, piur pa urund wadingau nich David nenday Yonatan. Nileja yom yivud piur pa muchim uwamp wa Yonatan. Chilakej chend chankwasha nimana nawamp chirumburikina kwikal murund muwamp. Nichingejin anch kurutu oku, nikujingunin yom yikwau yivud ya usey nakash pa urel ni urel wa Diakaad!”
Pakad kwidjidjek, atushalapol awonsu a Yehova akez kutaninamu nakash ang asadil nawamp chisu chikwetau katat mulong dilejan dia usey dia Bibil ni mulong wa kwifukwil mu dijuku.