Yikimbany Antu Akweta Michim Yiwamp
1. Mutapu ik tukata kumekesh kusanger kwetu dilau ditukweta dia kusal mudimu wa kulejan?
1 Yesu pasalay mudimu wend wa kulejan, waya kulemp ni mu chilik cha kuyongoj antu ikepishina nich rusangu ruwamp. (Isay 61:1, 2) Mudi antimesh ni atutum pa ndond ya Kristu, nlel niyetu twitapidil dilau dia kumwimburij mu mudimu wetu wa kuyikimbijol pakad kuziy antu akweta michim yiwamp adia mu teritwar wetu.—Mat. 10:11; 2 Kor. 5:20.
2. Mutapu ik wamekana anch Paul wadinga ni kulondul mudi mudia mwikadil, ni kwikala yibudikin ik?
2 Londulany Mwikadil: Kambuy Paul wadinga ni chaku cha kuya bil akalejana ku sinagog kwadingau Ayuda ni antu a michid akarumuka. (Mid. 14:1) Pashikau mu Filipoi, ndiy ni Silas aya ni kuyikimb antu ‘kwindond ya kulembil.’ Asambisha kuyilej amband adingaku, ni kapamp kamwing umwing wau, Lidi, witiyija uyakin.—Mid. 16:12-15.
3. Mitapu ik yikwau ya mudimu yitukutwisha kwikal nich kuwejin pa mudimu wetu wa kulejan ku chikumbu ni chikumbu?
3 Kuwejin pa teritwar wey wa kulejan ku chikumbu ni chikumbu, ov, ukutwish wayilejany kand antu asutila mu motak ayila mu ma weny, adia mu mapark, asadila mudimu ku mabiro, adia pa mansang padingau antu avud, adia mu miab ya kwisakin ni mu jindond ja kuladishin yom jidia mu teritwar wen? Pamwingap ukutwish wayilejany antu ashicha mu yikumbu ya antu avud yidinga yikash pa kwandamamu kusutil ku mikand ap ku telefon. Kushinshikin yom ni kulondwish mwikadil pantaliken nich kuswimp kwa maswir mu teritwar wen kukez kukutwishishany ‘kusal nich mushiku midimu ya Nsalejetu.’—1 Kor. 15:58.
4. Mitapu ik yikwau yitukweta anch chikumangen chetu chikwet teritwar mukemp?
4 In kulejan avud ikala kal nich mutapu wa kutanduril mudimu wau wa kulejan kusutil ku kuya kushakam ku chikumangen chikwau mwi ngand yau ap mwi ngand ya wingendj. Akwau niyau ileja kal rudim rindjing chakwel atwisha kuyilej antu adiokala mwi ngand yikwau.
5. Mutapu ik tufanyidina kuman chisu chitudia ech, ni tufanyidin tukwata mupak wa kusal chom ik?
5 Etwawonsu tufanyidin twijika anch “chingand mawiy mangand.” (Mat. 9:37; 13:38) Pa kuman kushejin piswimp kwa nsudiel ya ditenchik dined diyimp dia yom, muntu ni muntu udia pakach petu ufanyidin kushinshikin nawamp mwikadil wend amwinend, nkeu jend, mitapu yikwetay ni mitapu ya kutanduril mudimu wend wa kulejan. Yehova utwinkishin kashinsh anch, ang twatek yisakin ya Want pa ndond ya kusambish, ndiy ukez kuyukish usu wetu wakinakin utusadila mulong wa kutanduril mudimu wetu wa kulejan.—Mat. 6:33.