Tulejanany Dizu Swa!
1. Dikasikesh ik dia Paul ditina kubabal mu machuku metu?
1 “Lejan dizu, ulamat kulejan nakash.” (2 Tim. 4:2) Mulong wak dikasikesh dia Paul didi dia usey mu machuku metu? Mazu minam makwet usu mutapu ik mu mwom wetu ni kudi antu akwau?
2. Mulong wak tukimbin ni mushiku antu akad kuteshang rusangu ruwamp?
2 Mom udi mu Chak: kuchid ma miliyon ma antu aswiridin kutesh rusangu ruwamp rikutwisha kuyishikij ku kupand. (Rome 10:13-15; 1 Tim. 4:16) Antu avud akweta michim yitentamina ading mu teritwar uyilingau in kulejan kusal mudimu chisu chin chawonsu. Anch twayendin dichuku dindjing ap chisu chindjing, tukutwish twatan antu kushalijan. Anch twayikimb ni mushiku mutapu winou, kom ketu kakwikal katok ni tukwipuk dibaz dia mash.—Mid. 20:26.
3. Ov, mutapu ik tukutwisha kusadil chisu chetu ni manangu mu mudimu wetu wa kulejan?
3 Ap anch ayirisha nakash, In Kristu a mu mivu chitot ya kusambish ‘izwisha Yerusalem nich malejan mend.’ (Mid. 5:28) Ov, ni yetu kand twakwatil mupak wa “kumekesh uman”? (Mid. 10:42, MM) Pitudia mu mudimu wa kulejan, ov, tukat kusadil chisu chetu ni manangu? Pituchingedina akwetu achirikanga kutal antu akwau, ov, tukwatining mupak wa kulejan rusangu kudi antu asutila mwinjil?
4. Mutapu ik kulejan nich mushiku kutukwashina kucha ku mes?
4 Kukasikeshining Kudimuk Kwetu: Chitudia piswimp ni nsudiel ya ditenchik dia yom ya mangand, tufanyidin kudimuk, kucha ku mes. (1 Tes. 5:1-6) Pitulejeninga chisu ni chisu piur pa ruchingej retu ra Want, tukat kwipuk anch ditenchik dia yom ya mangand dituziyisha. (Luka 21:34-36) Chikwau kand, anch twalam dichuku dia Yehova “mu manangu,” yitubachikin kuvudish mutapu wetu wa kusal mudimu wetu wa kulejan upandishina mom ya antu.—2 Pita 3:11, 12, NW.
5. Kulimish mom ya antu kukutwish kutubachik kusal ik mu mudimu wa kulejan?
5 Pitukata kulejan nich mushiku, tukat kwimburij mutapu umeningay Yehova mwom: “Kasotilip kal umwing ajiya, pakwez usotil amwing akarumun michim yau.” (2 Pita 3:9; Ezek. 33:11) Tukutwish amboku twakwat mupak wa kuyilej antu avud a mu teritwar wetu anch chitwishikin, chakwel kumushiman Yehova!—Kus. 109:30.