Ov, Aney Adi Tayad?
1. Ov, mulong wak chiswirikedin kudi an a shikol kwirijek?
1 Chisu chishejin piswimp chakwel muvu wa shikol yikwau ya mudimu usambisha. Pakad kwidjidjek, aney akez kura nich yikokujol ni yakamish yisu. Akez kwikal kand nich yisu yiwamp ya “kulejan uyakin.” (Yoh. 18:37) Ov, adi tayad?
2. Ov, chom ik chifanyidina aney kwijik chakwel irijeka?
2 Ov, aney ateshin nawamp chom chitazukinau anch kwikalaku ku misambu ya chipolitik ap ku misambu ya apagan ni mulong wak kusal nau pamwing chidi chiyimp? Ov, irijekin kal piur pa chakamish chikezau kutan chakwel adandamen nich shikol ya piur, dichuku dimwing, ni kusadil kwa maar ma kuleushan ap mon wa kuleushan? Ov, akutwish ching kulond anch mujikit uyimp aulikishin mu relijon wau, ap iji mutapu wa kurumburil yitiyij yau?—1 Pita 3:15.
3. Ov, mutapu ik ukutwisha anvaj kusadil urel wau wa Kwifukwil mu Dijuku chakwel ayirijek anau?
3 Sadil Urel wa Kwifukwil mu Dijuku: Chakin kamu, ukez kwisambinany piur pa muvu wa shikol anch anen aman yakamish yisu. Usu wen wa pakampwil usadilanya chakwel ushinshikinany milong yifanyidinau anen kutan ku kalas kurutu kwa kusambishiril shikol ukez kuyinkish ruchingej. Ov, mulong wak ukutwishap kusadil urel umwing ap maurel mavud ma Kwifukwil mu Dijuku pa mulong winou? Ufanyidinany kwipul anen yom yikata kuyiletin minan piur pa milong yitadina kuchirik kwa shikol. Ufanyidin kuchirikin katat yom washinshikinanya mu mivu yasutila ey anch an apamin kal ni awejidinaku mutapu wau wa kutesh. (Kus. 119:95) Ukutwish kuwejamu yikunku yimwing ukatina kufundish, mwin kuyulan, ap nsand a shikol mukwau. Yileja aney mutapu wa kwakul ni Bibil ni sadil yom yimwing yidia mu mabuku mudi Comment raisonner ni Les jeunes s’interrogent. Nvaj umwing wasadidina yikunku ya kwiyijidish mulong wa kurijek anend chakwel amana mutapu wa kuyisejin alej au asu kwinsambishil kwa muvu ni muvu wa shikol ni kuyilej anch awiy adi Atuman a Yehova.—Tal Chinong cha Kalam cha pa Kachirikin 15, 2010, pa paj wa 3-5.
4. Ov, chom ik chikezau anvaj in manangu kusal?
4 Yikokujol yifanyidinau kurish nich kudi ansand in Kristu mu machuku ma kwisudiel minam yiding yisu yivud “mar nakash.” (2 Tim. 3:1) Anvaj in manangu akupakish kutongin kurutu piur pa milong yimeningau anau ni kuyirijek mutapu wa kuyipandakan. (Jinsw. 22:3) Kurutu kwa kusambish muvu usu wa shikol, salany amboku yawonsu ukutwishanya chakwel uyikwashany anen kwikal tayad.