Kangal Widjidjek Kulejan Uman
1. Ov, kutakaman chom ik, ni mulong wak?
1 Ov, widjidjekining kupan uman ku shikol mulong woviling wom anch akutwish kukuswingish? Chakin kamu, chinech chitin kutakaman chakwel ulond patok pakampwil anch ukwetingap chaku cha kulond. Ov, chom ik chikeza kukukwash?
2. Chisu chiwanyidininga kulejan uman ku shikol, ov, mutapu ik ukubachikininga chitongijok chiwamp?
2 Sadil Chitongijok Chiwamp: Ap anch shikol yimeken mudi teritwar wey wa pakampwil wa kulejan uman kudi antu akwau, vurik anch ukuchingejinap kusambish minsamb ya muspiritu ni muntu ni muntu mudi muwasala piwadinga ni kulejan ku chikumbu ni chikumbu. Sadil chitongijok chiwamp chakwel ujingunin chisu chiukulejana. (Mul. 3:1, 7) Mutu wa mulong wa kwisambin ku shikol ap mudimu ukukwinkishau ku shikol yikutwish kukwinkish chisu cha kumekesh ritiy rey. Ap mbay ney wa shikol ukutwish kukwipul mulong wak usadiningap mijikit kanang. In Kristu amwing ayijikisha alej au kwinsambishil kwa muvu wa shikol anch adi Atuman a Yehova ni ayinkisha alej au mikand yirumburila yitiyij yetu. Akwau akat kusha mikand pa yitwamu yau chakwel yileta yipul kudi ambay nau a shikol piur pa mikand yiney.
3. Ov, mutapu ik ukutwisha kwirijek chakwel ulejan uman ku shikol?
3 Irijeka: Anch wirijek, ruchingej rey rikez kujimb. (1 Pita 3:15) Chawiy, pakish kutongijokin kurutu ku yipul yiukutwishau kukwipul, ni tongijokin kand piur pa mutapu ukutwisha kwakul. (Jinsw. 15:28) Anch chitwishikin, lam Bibil wey ni mikand yikemp, mudi buku Comment raisonner, Les jeunes s’interrogent, ni mikand yisambidina pa yom ya matangil ku shikol, yiukutwisha kusadil anch chiswiridin. Ita anvaj ey chakwel awejinaku yikunku ya usey yiukusadila pa chisu cha kwifukwil kwen kwa mu dijuku.
4. Ov, mulong wak ufanyidin kudandamen kulejan uman ku shikol?
4 Man Yom mu Mutapu Uwamp: Kangal watong anch ambay ney a shikol akez chisu chawonsu kukuswingish pa chisu ulejena uyakin. Amwing akez kukusanger mulong wa kutakaman kwey ni akutwish pamwing ap kutesh. Pakwez kangal waziy anch kwikil muntu ap umwing witiyijina. Yehova ukez kusangar anch wapakish kusal mwamu. (Heb. 13:15, 16) Dandamen kumwit ndiy chakwel akukwasha ‘kudandamen kulond nich pakad wom.’ (Mid. 4:29; 2 Tim. 1:7, 8) Tongin pa mutapu ukeza kusangar chisu chikeza kutesh muntu kanang. Muntu winou ukutwish kwikal mbay netu kashalapol wa Yehova!